ކުއަލަ ލަމްޕޫރް، މެލޭޝިއާ (އޯގަސްޓް 8) - ވެކްސިން ފުރިހަމަކޮށްފައިވާ މީހުންނަށް ބޮޑެތި ލުއިތަކެއް ދޭން މެލޭޝިއާއިން ނިންމައިފި އެވެ.
އަންނަ އަންގާރަ ދުވަހުން ފެށިގެން އަމަލު ކުރާ އުސޫލުގެ ދަށުން އެތައް މިލިއަން ބަޔަކަށް ޑިސްޓްރިކްޓުތަކުގެ ބޯޑަރު ހުރަސްކޮށް ދަތުރު ކުރުމުގެ މަގުފަހިވާނެ އެވެ. އޭގެ އިތުރުން ބޭރުގައި ކުޅިވަރު ކުޅުމާއި ރެސްޓޯރެންޓުތަކުގައި ކެއުމުގެ ފުރުސަތު ވެސް އަށް ސްޓޭޓެއްގައި ވެކްސިން ފުރިހަމަކޮށްފައިވާ މީހުންނަށް ލިބޭނެ އެވެ.
މި ލުއި ދިނުމަށް ސަރުކާރުން ކަނޑައެޅި އަށް ސްޓޭޓުގައި މުޅި އަބާދީގެ 50 ޕަސެންޓު މީހުން ދިރިއުޅޭ އިރު އެ ތަންތަނުގައި ވެކްސިން ޖެހުން އިތުރުވެ، ކޮވިޑްގެ އާ ކޭސްތައް ވަނީ މަދުވެފަ އެވެ.
މިދިޔަ ޖޫން މަހުން ފެށިގެން ލޮކްޑައުން ކުރުމުގެ ސަބަބުން އެތައް ހާސް ވިޔަފާރިއަކަށް ބުރޫ އެރުމުގެ އިތުރުން އާއިލާތަކުގެ މެމްބަރުންނާ ބައްދަލުނުވެ އެތައް ދުވަހެއް ވި އެވެ.
"ގިނަ މީހުން ދަނީ ވެކްސިން ފުރިހަމަ ކުރަމުން... އެއާއެކު އާއްމު ސިއްހީ ނިޒާމަށް އޮތް ބުރަ ކުޑަވެގެން ދާނެ،" ބޮޑު ވަޒީރު މުހްޔިއްދީން ޔާސީން ޓީވީ މެދުވެރިކޮށް ދެއްވި ބަޔާނެއްގައި ވިދާޅުވި އެވެ.
"އިގްތިސާދީ އަދި އިޖުތިމާއީ އެކި ހަރަކާތްތަކަށް އެކި މަރުހަލާތަކުގެ ދަށުން ފުރުސަތު ދެމުން ދާނެ. ރާވައިގެން ވިސްނުންތެރިކަމާ އެކު މި ބަލިމަޑުކަމުން އަރައިގަނެވޭނެ".
ލުއިތަކެއް ދިން ނަމަވެސް ވެރިރަށް ކުއަލަ ލަމްޕޫރް އާއި ސެލަންގޯ ފަދަ ކޮންމެ ދުވަހަކު ވެސް އެތައް ހާސް އާ ކޭސް ފެންނަމުންދާ ސްޓޭޓުތަކުގައި އަޅާފައިވާ ފިޔަވަޅުތަކަށް މާ ބޮޑު ބަދަލެއް ނާދެ އެވެ.
ދެކުނު އިރުމަތީ އޭޝިއާގައި އޮންނަ މެލޭޝިއާގެ ވެކްސިން ޕްރޮގްރާމް ފެށީ ވަރަށް ދުވެލި މަޑުކޮށް ނަމަވެސް މިހާރު ކޮންމެ ދުވަހަކު 400،000 އަށް ވުރެ ގިނަ ޑޯޒް ދަނީ ޖަހަމުންނެވެ.
އާބާދީގެ 33 މިލިއަން މީހުންގެ ތެރެއިން 8.25 މިލިއަން މީހުން ވެކްސިން ފުރިހަމަކޮށްފައި ވާއިރު 23.6 މިލިއަން މީހުން ވަނީ އެއް ޑޯޒް ޖަހާފަ އެވެ.
ވެކްސިން ފުރިހަމަކޮށްފައިވާ މީހުންނަށް ލުއިތަކެއް ދޭން ނިންމިއިރު، މި ވަގުތު މެލޭޝިއާއަށް ދިމާވެފައިވާ ރާޅަކީ މި ބަލިމަޑުކަމުގައި މިހާތަނަށް ކުރިމަތިވި އެންމެ ނުރައްކާތެރި ރާޅެވެ.
އެގޮތުން ދުވާލަކު 20،000 ކޭސް ފެންނަމުން ދާއިރު، އެތައް ސަތޭކަ ބަޔަކު މަރުވެ އެވެ. އާދީއްތަ ދުވަހު ރިކޯޑު އަދަދަކަށް 360 މީހުން މަރުވި އެވެ. އެއާއެކު މަރުވި މީހުންގެ ޖުމްލަ ވަނީ 10،749 އަށް އަރާފަ އެވެ.
