ކޮވިޑުން ދިފާއުވާން ވެކްސިން ޖަހަން ޖެހޭ އާބާދީގެ 90ޕަސެންޓް މީހުން ދެ ޑޯޒު ފުރިހަމަކޮށްފައިވާ ރަށްތަކަށް ޕީސީއާރު ޓެސްޓު ނުހަދައި އަންނަ މަހުގެ އެކަކުން ފެށިގެން ދަތުރުކުރެވޭ ގޮތަށް ހަމަޖައްސައިފި އެވެ.
ހެލްތު އިމަޖެންސީ އޮޕަރޭޝަން ސެންޓަރުގެ ތަރުޖަމާން ޑރ. ނަޒްލާ ރަފީގް ވިދާޅުވީ ޕޮޒިޓިވިޓީ ރޭޓު ފަސް ޕަސެންޓަށް ވުރެން ދަށް ރަށްތަކުން ދަތުރުކުރާއިރު ހަދަން ޖެހޭ ޕީސީއާރަށް ލުޔެއް ދީފައިވާ ކަމަށެވެ. އެކަމަކު އެއީ ވެކްސިން ޖަހާ އުމުރު ފުރައިގެ 12 އަހަރުން މަތީގެ އެންމެން ހިމެނޭ ގޮތުން 90 ޕަސެންޓް މީހުންނަށް ވެކްސިން ފުރިހަމަ ކުރެވެމުންނެވެ.
އެ ރަށެއްގައި ގެސްޓް ހައުސް ހިންގާ ނަމަ އެ ދާއިރާގެ 95 ޕަސެންޓް މީހުން ވެކްސިން ފުރިހަމަ ކުރަން ޖެހެ އެވެ.
އެޗްޕީއޭ އިން އެންމެ ފަހުން އާއްމުކޮށްފައިވާ ހިސާބުތަކަށް ބަލާ ނަމަ ޕީސީއާރު ނުހަދައި 30 އަށް ވުރެން ގިނަ ރަށަށް އަންނަ މަހުގެ އެކަކުން ފެށިގެން ދަތުރުކުރެވިދާނެ އެވެ. އެއީ, އެ ރަށްތަކުން ވެކްސިން އާބާދީގެ 90 ޕަސެންޓް ދެ ޑޯޒު މިހާތަނަށް ވެސް ފުރިހަމަކޮށްފައިވާތީ އެވެ.
ބައެއް ރަށްތަކުގައި ކުޑަކުދިންނަށް ވެކްސިން ޖަހަން ނުފަށަ އެވެ. އެޗްޕީއޭ ބުނާ ޝަރުތު ހަމަވާނީ 12 އަހަރުން ފެށިގެން އެންމެން ވެކްސިން ފުރިހަމަ ކުރުމުންނެވެ.
މީގެ އިތުރުން މިއަދު އިއުލާންކުރި ލުއިތަކުގެ ތެރޭގައި ކެފޭތަކާއި ރެސްޓޯރަންޓްތައް ކޮވިޑުގެ ކުރިއެކޭ އެއްގޮތަށް ހުޅުވާފައި ބަހައްޓާ ގަޑިތަކަށް ހިދުމަތް ދިނުމުގެ ފުރުސަތު ދިނުމާއި ކައިވެނި ޕާޓީތަކާއި ހަފުލާތައް ބޭއްވުމުގެ ހުއްދަ ދިނުން ހިމެނެ އެވެ.
މި ލުއި ދިނުމާ އެކު ވެކްސިން ނުޖަހާ މީހުންނަށް އިތުރަށް ދަތިވާ ގޮތަށް އުސޫލް ވަނީ ބަދަލުކޮށްފަ އެވެ. އެގޮތުން ވެކްސިން ނުޖަހާ ދަތުރުކުރާއިރު ކަރަންޓީންވެފައި ނަގާ ރިލީޒް ސާމްޕަލަށް ފައިސާ ދައްކަން ޖެހޭނީ އަމިއްލަ އަށެވެ. މިހާރު އެ ސާމްޕަލް ނަގައިދެނީ ހިލެ އެވެ.
ސަރުކާރުގެ އަމާޒަކީ މި މަސް ނިމެންވާއިރަށް ވެކްސިނަށް ޝަރުތު ހަމަވާ އާބާދީގެ 90 ޕަސެންޓަށް ޖަހައި ނިންމުމެވެ. އެ އަދަދަށް ވެކްސިން ރާއްޖެ އަށް ވަނީ ގެނެސްފަ އެވެ.
