ނެވާޑާ، ޔުނައިޓެޑް ސްޓޭޓްސް (އޮގަސްޓް 2) - އުތުރު އެމެރިކާ (ކޮންކާކަފް)ގެ އެންމެ ފޯރިގަދަ ފުޓްބޯޅަ މުބާރާތް ކަމަށްވާ ގޯލްޑް ކަޕްގެ ފައިނަލުގައި 1-0 އިން މެކްސިކޯ ބަލިކޮށް އެމެރިކާ އިން މުބާރާތުގެ ޗެމްޕިއަންކަން ހޯދައިފި އެވެ.
މިދިޔަ ޖޫން މަހު ހަ ވަނަ ދުވަހު އުތުރު އެމެރިކާގެ ނޭޝަންސް ލީގުގެ ފައިނަލުގައި އެމެރިކާ އިން ވަނީ 3-2 އިން މެކްސިކޯ ބަލިކޮށްފަ އެވެ. އަދި ރޭގެ ފައިނަލުގައި ވެސް އެމެރިކާ އިން ވަނީ 1-0 އިން މެކްސިކޯގެ މައްޗަށް ކުރި ހޯދައިފަ އެވެ. ދެ ފަހަރު ވެސް އެމެރިކާ މޮޅުވީ އިތުރު ވަގުތުގެ ދެ ވަނަ ހާފްގައި ގޯލު ޖަހައިގެންނެވެ.
ނެވާޑާގެ އެލިޖަންޓް ސްޓޭޑިއަމްގައި 60،000 ސަޕޯޓަރުން ކުރިމަތީގައި ކުޅުނު ފައިނަލް މެޗުގައި އެމެރިކާގެ ގޯލު ޖެހީ އިތުރު ވަގުތުގެ ދެ ވަނަ ހާފްގެ ވެސް ފަހު ކޮޅުގަ އެވެ.
އިތުރު ވަގުތުގެ ދެ ވަނަ ހާފްގެ ކުޅުން ނިމެން ކުޑަ ވަގުތު ކޮޅަކަށް ވެފައި ވަނިކޮށް މެޗުގެ 117 ވަނަ މިނިޓްގައި އެމެރިކާ މޮޅުކޮށްދިން ގޯލު ޖެހީ މައިލްސް ރޮބިންސަން އެވެ. ކެލީން އަކޮސްޓާ ހިލޭ ޖެހުމަކުން ނަގައިދިން ބޯޅަ ރޮބިންސަން ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ.
މިއީ އެމެރިކާ އިން ގޯލްޑް ކަޕް ކާމިޔާބުކުރި ހަތް ވަަނަ ފަހަރެވެ. އެ ޓީމު އެންމެ ފަހުން ގޯލްޑް ކަޕް ކާމިޔާބުކުރީ 2017 ވަނަ އަހަރު ފައިނަލުގައި ޖެމެއިކާ ބަލިކޮށްފަ އެވެ. އެންމެ ފަހުން މެކްސިކޯ ބަލިކޮށް އެމެރިކާ ގޯލްޑް ކަޕް ތަށި އުފުލާލީ 2007 ވަނަ އަހަރު އެވެ.
މެކްސިކޯ އިން ވަނީ 2019 ވަނަ އަހަރު އެމެރިކާ ބަލިކޮށް މި މުބާރާތުގެ ޗެމްޕިއަންކަން ހޯދައިފަ އެވެ. އެހެންކަމުން ރޭގެ ފައިނަލަކީ އެ މެޗުގެ ރަނގަޅު ބަދަލުހިފުމެކެވެ.
އެމެރިކާ އިން މި ފަހަރުގެ ގޯލްޑް ކަޕް ކާމިޔާބުކުރީ ކުޅުނު ހުރިހާ މެޗަކުން މޮޅުވެގެންނެވެ. މި ފަހަރުގެ މުބާރާތުގައި އެމެރިކާ އިން ކުޅުނީ މަޝްހޫރު ކުޅުންތެރިން ނުލަ އެވެ. އޭގެ ތެރޭގައި ކްރިސްޓިއަން ޕުލިސިޗް އާއި ޖިއޯ ރެއިނާ އަދި ސާޖީނިއޯ ޑެސްޓް ފަދަ ކުޅުންތެރިން ހިމެނެ އެވެ.
