ކުއަލަ ލަމްޕޫރު، މެލޭޝިއާ (ޖުލައި 29) - ކޮވިޑާ ގުޅިގެން އަޅާފައިވާ ފިޔަވަޅުތަކާ ގުޅޭ ގޮތުން ގާނޫނު ހަދާ މަޖިލީހަށް އޮޅުވާލެއްވި ކަމަށް މެލޭޝިއާގެ ރަސްގެފާނު އެ ގައުމުގެ ބޮޑުވަޒީރަށް ތުހުމަތު ކުރެއްވުމާއެކު އިސްތިއުފާ ދޭން ޕްރެޝަރު ބޮޑުވެއްޖެ އެވެ.
ބޮޑުވަޒީރު މުހްޔިއްދީން ޔާސީންގެ ކޯލިޝަނާ ގުޅޭ ގޮތުން މީގެ ކުރިން ވެސް ތަފާތު އެކި އަޑުތައް އަރާފައި ވާއިރު، އެމަނިކުފާނު ވެރިކަމަށް ވަޑައިގެންނެވީ އިންތިހާބަކާ ނުލަ އެވެ. ބައެއް ޕާޓީތަކުން ސަރުކާރަށް ކުރި ތާއީދު އަނބުރާ ގެންދިޔުމުން ޔާސީނަށް މަގާމު ގެއްލުމާ ވަނީ ގާތްވެފަ އެވެ.
ކޮވިޑާ ދެކޮޅަށް ހަނގުރާމަ ކުރުމަށް ކަމަށް ބުނެ ކުއްލި ނުރައްކަލުގެ ހާލަތު އިއުލާނުކޮށް، މެލޭޝިއާގެ މަޖިލީހުގެ ޖަލްސާތައް އެތައް ދުވަހެއް ވަންދެން މެދުކަނޑާލާފައި އޮތުމަށް ފަހު މި ހަފުތާގައި ވަނީ އަލުން ފަށައިފަ އެވެ. ފާޑުކިޔާ ފަރާތްތަކުން ބުނާ ގޮތުގައި މަޖިލީހުގެ ޖަލްސާތައް މެދުކަނޑާލީ ޔާސީނަށް ވެރިކަމުގައި ހުރެވޭނެ ގޮތެއް ވޭތޯ ބެލުމަށެވެ.
މިދިޔަ ހޯމަ ދުވަހު، ގާނޫނާ ބެހޭ މިނިސްޓަރު މަޖިލީހުގައި ވިދާޅުވީ އޯގަސްޓް އެއް ވަނަ ދުވަހު ކުއްލި ނުރައްކަލުގެ ހާލަތު ނިމުމަކަށް އަންނާނެ ކަމަށާއި އޭގެ ދަށުން އެކުލަވާލި ގިނަ ގަވާއިދުތަކަކަށް އަމަލު ކުރުން ވެސް ހުއްޓޭނެ ކަމަށެވެ.
ނަމަވެސް އިދިކޮޅު މަޖިލިސް މެމްބަރުން ތުހުމަތުކުރާ ގޮތުގައި ކުއްލި ނުރައްކަލުގެ ހާލަތު އުވާނުލާ ދިގުދަންމަނީ ޔާސީންގެ އިތުބާރު ނެތްކަމުގެ ވޯޓު މަޖިލީހުގައި ނެގުމަށް ހުރަސް އެޅުމުގެ ގޮތުންނެވެ. އަދި ކޮވިޑާ ގުޅިގެން ހެދި ގަވާއިދުތައް އުވާލަން ރަސްގެފާނު ހުއްދަ ދެއްވިކަން ސާފު ނޫން ކަމަށް ވެސް މެމްބަރުން ބުންޏެވެ.
ރަސްގެފާނު ސުލްތާން އަބްދުﷲ ސުލްތާން އަހްމަދު ޝާހްގެ ގަނޑުވަރުން ބުރާސްފަތި ދުވަހު ބުނީ ގަވާއިދުތައް އުވާލުމުގެ ހުއްދަ ރަސްގެފާނު މިހާތަނަށް ދެއްވާފައި ނުވާ ކަމަށެވެ. މަޖިލީހަށް ދޮގު މައުލޫމާތު ފޯރުކޮށްދިނުމުން ރަސްގެފާނު ވަރަށް ބޮޑަށް ކޯފާވެވަޑައިގެންފައެވެ،
މެލޭޝިއާގެ ސަރުކާރަށް އަދި ބޮޑުވަޒީރަކާ ދެކޮޅަށް އެހާ ހާމަކަން ބޮޑު ގޮތެއްގައި މެލޭޝިއާގެ ރަސްގެފާނަކު ފާޑުވިދާޅުވުމަކީ ކުރިން ނާދިރު ކަމެކެވެ.
ރަސްގެފާނާ ގުޅޭ ގޮތުން ދޮގު ހައްދަވާ އެމަނިކުފާނުގެ ބާރުތައް ކެނޑޭ ފަދަ ގޮތަކަށް ސަރުކާރުން ވާހަކަ ދެއްކުމުން، އިދިކޮޅުން ތުހުމަތު ކުރީ ޔާސީނަކީ ހިޔާނާތްތެރިއެއްގެ ގޮތުގަ އެވެ. އަދި ވަގުތުން އިސްތިއުފާ ދެއްވުމަށް ދަނީ ބާރު އަޅަމުންނެވެ.
ނަމަވެސް ބޮޑު ވަޒީރުގެ އޮފީހުން ނެރުނު ބަޔާނެއްގައި ބުނީ ގަވާއިދުތައް އުވާލުމަށް ސަރުކާރާއި ރަސްގެފާނާ ދެމެދު މަޝްވަރާ ކުރެވެމުންދާ ކަމަށެވެ.
މެލޭޝިއާގެ ކުއްލި ނުރައްކަލުގެ ހާލަތާ ގުޅިގެން ހެދި ގަވާއިދުތަކަކީ ކޮވިޑުގެ ފިޔަވަޅުތަކާ ހިލާފުވާ މީހުންނަށް އަދަބު ދެވޭ ގޮތަށް ހެދި ގަވާއިދުތަކެކެވެ. ކުއްލި ނުރައްކާ އުވާލި ނަމަވެސް މެލޭޝިއާގެ ލޮކްޑައުން އުވައެއް ނުލާނެ އެވެ.
