ކުއަލަ ލަމްޕޫރު، މެލޭޝިއާ (ޖުލައި 28) - މެލޭޝިއާ މީހަކު ރެސްޓޯރެންޓަކުން އޯޑަރު ކުރި ކާތަކެތި ބަލައި ހެލިކޮޕްޓަރެއް ފޮނުވި މައްސަލަ ހޫނުވެއްޖެ އެވެ.
ކޮވިޑާ ގުޅިގެން ގިނަ ބަޔަކު ގޭގައި ތިބެން ޖެހޭތީ ކާތަކެތި ޑެލިވާ ކުރުމުގެ ހިދުމަތަށް އޮންނަ ޑިމާންޑް މެލޭޝިއާގައި ވަނީ އިތުރުވެފަ އެވެ.
އޭއެފްޕީން ރިޕޯޓު ކުރި ގޮތުގައި ކުއަލަ ލަމްޕޫރާ 180 ކިލޯމީޓަރު ދުރުގައިވާ އިޕޮހް ސިޓީއަށް ހެލިކޮޕްޓަރެއް ގޮސް، "ރައިސް ޑިޝްއެއްގެ" 36 ޕޯޝަން އަނބުރާ ކުއަލަ ލަމްޕޫރަށް ގެނެސްފައި ވެ އެވެ.
ފުލުހުން އެ މައްސަލަ ބަލަން ފެށީ ހެލިކޮޕްޓަރު ދަތުރު ކުރީ ކޮވިޑާ ގުޅިގެން އަޅާފައިވާ ފިޔަވަޅުތަކާ ހިލާފަށް ކަމަށް ވާތީ އެވެ.
ހަފްތާ ބަންދުގައި އިޕޮހް ސިޓީގެ މަގްބޫލު ރެސްޓޯރެންޓެއް ކައިރިއަށް ހެލިކޮޕްޓަރު ދިޔަ މަންޒަރު ފެންނަ ފޮޓޯތައް އާއްމުވުމުން ސޯޝަލް މީޑިއާގައި އާއްމުން ވެސް ނުރުހުން ފާޅުކުރި އެވެ.
ފުލުހުން ބުނީ ރަތް ކުލައިގެ ހެލިކޮޕްޓަރަށް ކުއަލަ ލަމްޕޫރުން ބޭރަށް ދަތުރު ކުރުމުގެ ހުއްދަ ދިނީ މެއިންޓެނަންސަށް ކަމަށެވެ. ނަމަވެސް އޯޑަރު ބަލައި ހެލިކޮޕްޓަރު ގޮސްފައި ވާތީ ފުލުހުން ވަނީ ތަހުގީގު ފަށައި ރެސްޓޯރެންޓު ވެރިޔާ އާއި ހެލިކޮޕްޓަރުގެ ވެރިޔާގެ ބަޔާން ނަގާފަ އެވެ.
ހެލިކޮޕްޓަރުގެ ވެރިޔާގެ އައިޑެންޓިޓީ ހާމަކޮށްފައި ނުވާއިރު، ރެސްޓޯރެންޓުގެ ވެރިޔާ ވާހަކަ ދެއްކީ އެކަން ދިފާއުކޮށްފަ އެވެ. އެގޮތުން އޯޑަރު ނަގަން އައީ ހުރިހާ ލިޔެކިޔުމެއް ހަމަކޮށްގެން ކަމަށް ބުނެފައި ވެ އެވެ.
