ސޭން ފްރެންސިސްކޯ، އެމެރިކާ (ޖުލައި 28) - އެންމެ ފަހުން ނިމުނު ކުއާޓާގައި އެޕަލް ކުންފުނީގެ ފައިދާ ގާތްގަނޑަށް ދެ ގުނަ އިތުރުވެ 21.7 ބިލިއަން ޑޮލަރަށް އަރައިފި އެވެ.
ޓެކް ކުންފުނީގެ މާލީ ތިން ވަނަ ކުއާޓަރުގައި މިދިޔަ އަހަރުގެ އެ މުއްދަތާ އަޅާ ބަލާއިރު އާމްދަނީ ވަނީ 36 ޕަސެންޓު އިތުރުވެ، 81.4 ބިލިއަން ޑޮލަރަށް އަރާފަ އެވެ.
ކުންފުނީގެ ޗީފް އެގްޒެކްޓިވް ޓިމް ކުކް ވިދާޅުވީ ކޮވިޑާ ގުޅިގެން އަޅާފައިވާ ބައެއް ފިޔަވަޅުތަކަށް ލުއި ދިނުމުން މީހުން ހޭދަކުރާ ވަރު އިތުރުވެ، ވިޔަފާރި ރަނގަޅުވި ކަމަށެވެ.
އެ ކުންފުނިން ބުނީ އައިފޯނު ވިއްކައިގެން ލިބުނު އާމްދަނީ 50 ޕަސެންޓު އިތުރުވި ކަމަށާއި ޑިޖިޓަލް ޕޭމެންޓު، މިއުޒިކް، ސްޓްރީމިން ޓެލެވިޝަން އަދި ގޭމިން ފަދަ ހިދުމަތްތަކުން ލިބުނު އާމްދަނީ ވެސް އިތުރުވި ކަމަށެވެ.
އެޕަލް އަށް ބޮޑު ފައިދާއެއް ލިބިފައިވާ މި ދަނޑިވަޅަކީ ދުނިޔޭގެ ބައެއް ބޮޑެތި ގައުމުތަކުން ބޮޑެތި ޓެކް ކުންފުނިތަކާ ދެކޮޅަށް މަސައްކަތް ކުރަމުންދާ ވަގުތެކެވެ.
އެގޮތުން ބޮޑެތި ކުންފުނިތަކުން މުހިއްމު އިގްތިސާދީ ދާއިރާތަކުގައި ވަކި ހިއްޕާލުމަށް ފަހު، އެހެން ކުންފުނިތަކަށް ވާދަނުކުރެވޭނެހެން އަމަލު ކުރާ ކަމަށް ތުހުމަތު ކުރެ އެވެ.
