ޓޯކިޔޯ (ޖުލައި 27) - އޮލިމްޕިކްސްގައި ވާދަކުރާތާ 97 އަހަރުވީ ފަހުން ފިލިޕީންސަށް މި ގޭމްސް އިން ފުރަތަމަ ފަހަރަށް ރަން މެޑަލް އެއް ލިބިއްޖެ އެވެ.
ފިލިޕީންސަށް މި ތާރީހީ ކާމިޔާބީ ހޯދައިދިނީ ވެއިޓްލިފްޓަރު ހިޑިލީން ޑިއާޒް އެވެ. އެންމެ ފަހުން 2016 ވަނަ އަހަރު ބްރެޒިލްގެ ރިއޯގައި ބޭއްވި އޮލިމްޕިކްސް އިން ރިހި މެޑަލް ހާސިލްކުރި ޑިއާޒް އިއްޔެ ރަން މެޑަލް ގެނައީ 55 ކިލޯގެ ކެޓަގަރީންނެވެ.
ފިލިޕީންސަކީ ކޮވިޑް-19ގެ ނުރައްކާ ވަރަށް ބޮޑުވި ގައުމެކެވެ. އެހެންވެ، ޑިއާޒް ޖެހުނީ އޮލިމްޕިކްސް އަށް ފަރިތަކުރަން އަމިއްލަ އާއިލާއާ ދުރުގައި ހުންނާށެވެ. ހަތް މަހެއްހާ ދުވަހު މެލޭޝިއާގައި ޓްރެއިނިން ފުރިހަމަކުރަން ހުންނަން ޖެހުނެވެ.
"މަންމަ އަތުން ކައިގެން ގޭގައި ހުރެ އަރާމް ކޮށްގެން ޓްރެއިނިން ކުރިއަށް ގެންދަން އެންމެ ބޭނުންވީ އެކަމަކު އެކަމެއް ނުވި. އަހަރެން އާއިލާއާ ދުރުގައި ހުރެ އުނދަގޫ ވަގުތެއްގައި ކުރި މަސައްކަތުގެ ނަތީޖާ މިއީ. ގައުމަށް ފުރަތަމަ ރަން މެޑަލް ހޯދައިދެވުމުން އާދަޔާހިލާފު އިހުސާސެއް ކުރެވެނީ،" ޑިއާޒް ބުންޏެވެ.
އިވެންޓް ނިމުމާ އެކު ޑިއާޒް އުފަލުން ރޮނީ.-- ފޮޓޯ: އޭއެފްޕީ
ޑިއާޒްގެ މި ކާމިޔާބީއާ އެކު ފިލިޕީންސް ސަރުކާރުން އޭނާ އަށް 660،000 ޑޮލަރުގެ ފައިސާގެ އިނާމެއް ދޭނެ އެވެ. މީގެ އިތުރުން ފިލިޕީންސްގެ ސްޕޯޓްސް ކޮމިޝަންގެ ފަރާތުން ޑިއާޒަށް ގާތްގަނޑަކަށް 500،000 ޑޮލަރު ލިބޭނެ އެވެ.
އަދި ފިލިޕީންސްގެ އެކި މަހުޖަނުން އަންނަނީ މި ތާރީހީ ކާމިޔާބާ ގުޅިގެން އެކި އަދަދުތަކުން ޑިއާޒަށް ފައިސާގެ އިނާމް ދެމުންނެވެ. ޑިއާޒަށް ލިބުނު ކާމިޔާބީތަކުގެ ތެރޭގައި ވަނީ ގެޔެއް ވެސް ލިބިފަ އެވެ.
ފިލިޕީންސްގެ ރައީސް ރޮޑްރިގޯ ޑުޓާޓޭގެ ތަރުޖަމާން އެ ގައުމުގެ މީޑިއާ އަށް ދިން އިންޓަވިއުއެއްގައި ވިދާޅުވީ މުޅި ފިލިޕީންސް ފަހުރުވެރިކޮށްދިން ޑިއާޒްގެ ޝަރަފްގައި ގިނަ ކަންތައްތަކެއް ސަރުކާރުން ކޮށްދޭނެ ކަމަށެވެ.
