ލަންޑަން، އިނގިރޭސި ވިލާތް (ޖުލައި 27) - ގައުމުތަކުގެ ތިމާވެށި މިނިސްޓަރުންގެ މެދުގައި 18 މަސް ތެރޭ ބޭއްވި ފުރަތަމަ ބައްދަލުވުމުން މާ ބޮޑު ނަތީޖާއެއް ނެރެވިފައި ނުވާ ކަމަށް ރިޕޯޓުތައް ބުނެފި އެވެ.
އިނގިރޭސި ވިލާތުގައި ބޭއްވި ބައްދަލުވުމުގެ ބޭނުމަކީ އަންނަ ނޮވެމްބަރު މަހު އޮންނަ ކޮޕް26 ސަމިޓަށް ދިޔުމުގެ ކުރިން މޫސުމީ ބަދަލާ ގުޅޭ މުހިއްމު ކަންކަމުގައި ގައުމުތަކުން އެއްބަސްވުމަކަށް އައުމެވެ.
ކޮޕް26 ގެ ރިޔާސަތު ބެލެހެއްޓުމަށް ހަމަޖެހިފައިވާ އިނގިރޭސި ތިމާވެށި މިނިސްޓަރު އަލޮކް ޝަރުމާ ވިދާޅުވީ އެ ބައްދަލުވުމުގައި ގައުމުތަކުން މުހިއްމު މަޝްވަރާތަކެއް ކުރި ނަމަވެސް އެއް ގަލަކަށް އެރިފައި ނުވާ ކަމަށެވެ.
އެގޮތުން އެއްބަސްނުވެވުނު އެންމެ މުހިއްމު ކަމަަކީ ހަކަތަ އުފެއްދުމަށް ކޯލް ބޭނުން ކުރުން ހުއްޓާލާނެ ގޮތަކާ މެދު އެވެ. ޝަރުމާ ވިދާޅުވީ ކޯލް އަންދަމުން ދިޔުމަކީ މޫސުމީ ބަދަލު ކުޑަކުރުމުގެ ޓާގެޓާ ހަމައަށް ދިޔުމަށް އޮތް ހުރަހެއް ކަމަށެވެ.
އިނގިރޭސި ވިލާތުގައި ބޭއްވި ބައްދަލުވުމުގައި ބައިވެރިވުމަށް 51 ގައުމެއްގެ މަންދޫބުން ވަނީ ފާއިތުވި ހަފްތާ ބަންދުގައި ލަންޑަނަށް ޖަމާވެފަ އެވެ.
ކޮޕް26 ސަމިޓު ފެށެން އެންމެ ތިން މަހަށް ވެފައި ވާއިރު، އެ ސަމިޓަށް ދިޔުމުގެ ކުރިން ގައުމުތަކުން ވަކި ގޮތްތަކަކަށް އެއްބަސްވެވޭތޯ ކުރާ މަސައްކަތް މިހާރު ވަނީ އިތުރުކޮށްފަ އެވެ.
ކޮޕް26 ގެ މައިގަނޑު އަމާޒަކީ ދުނިޔެ ހޫނުވުން 1.5 ޑިގްރީ ސެލްސިއަސްއަށް ވުރެ މަތިވިޔަ ނުދީ ހިފެހެއްޓުމަށް ހުރިހާ ގައުމުތައް އެއް ގަލަކަށް އެރުވުމެވެ.
