ލަންޑަން، އިނގިރޭސި ވިލާތް (ޖުލައި 26) - ޔޫރަޕަށް ކުރަމުންދާ ވިއްސާރަ އިނގިރޭސި ވިލާތާ ހަމައަށް ފޯރާ އާދީއްތަ ދުވަހު ބޯކޮށް ވާރޭވެހުމާ ގުޅިގެން ވެރިރަށް ލަންޑަންގެ މަގުތަކުގައި ފެންބޮޑުވެއްޖެ އެވެ.
މޭޔަރު ސާދިގް ހާން ކުރެއްވި ޓްވީޓެއްގައި ވިދާޅުވީ އެމެޖެންސީ ހިދުމަތްތަކުން ދަނީ "މުޅި ލަންޑަންގައި ފެންބޮޑުވެގެން" ހަރަކާތްތެރިވަމުން ކަމަށެވެ. އާއްމު ދަތުރުފަތުރުގެ ހިދުމަތަށް ބުރޫ އަރާފައިވާ ކަމަށާއި ފެންބޮޑުވެފައިވާ ހިސާބުތަކުގައި ނުހިނގުމަށާއި ނުދުއްވުމަށް އާއްމުންގެ ކިބައިން އެދޭ ކަމަށް ވެސް ވިދާޅުވި އެވެ.
ސޯޝަލް މީޑިއާ ބޭނުން ކުރާ ފަރާތްތަކުން ވަނީ ހުޅަނގު ދެކުނު ލަންޑަންގައި އެއްގަމު އުޅަނދުތައް ފެނު އަޑީގައިވާ ފޮޓޯތައް ހިއްސާކޮށްފަ އެވެ.
އިނގިރޭސި ވިލާތުގެ ދެކުނަށް އަދިވެސް މޫސުން ގޯސްއިރު، އިތުރަށް ވާރޭ ވެހޭނެ ކަމަށް ބެލެވެ އެވެ. މެޓް އޮފީހުން ވަނީ ލަންޑަނާއި ވަށައިގެންވާ ކައުންޓީތަކަށް އެމްބާ އެލާޓް ނެރެފަ އެވެ.
އެލާޓުގައި ބުނެފައި ވަނީ ވިދާ ގުގުރުމާއެކު ހޮނު އެޅުމުގެ ފުރުސަތު އެބަ އޮތް ކަމަށާއި ބޯކޮށް ވާރޭ ވެހި ފެންބޮޑުވެދާނެ ކަމަށެވެ. އެގޮތުން ބައެއް ހިސާބުތަކަށް ވާރޭ ވެހޭނެ ކަމަށް ބެލެވެނީ އެހެން އަހަރުތަކުގެ ޖުލައި މަހާ އަޅާ ބަލާއިރު ދެ ގުނަ އިތުރު މިންވަރަކަށެވެ.
