ތިބާއަށް އޭނާ ދައްކަނީ އެހެން މޫނެކެވެ. ބާއްވާ ރަހުމަތްތެރިކަމުގެ ފަހަތުގައި އޮތީ ނުލަފާ ބޭނުމެކެވެ. ދޭ ނަސޭހަތްތަކަށް އޭނާ އަމިއްލައަށް ވެސް ތަބައެއް ނުވެ އެވެ. ބަލަނީ އެންމެ ހަޑިމުޑުދާރު ވީޑިއޯތަކެވެ. ރައްކާވެ ތިބޭށެވެ. ދީނީ ގޮތުން ހައްދު ފަހަނައަޅާފައި ތިބޭ މީހުންގެ ފަތިފުށް އަޑުއިވުމުން ތިބާ ސިހޭނެ އެވެ.
"މީގެ ތެރެއިން ބައެއް މީހުންގެ ފޯނުން ފެންނަން ހުރި ބައެއް [ބަރަހަނާ] މަންޒަރުތައް ފަދަ ކަންކަމަށް ބަލާއިރު ވެސް ދީނީ ގޮތުން ބުނާ މިންވަރުގެ އަގީދާއެއް ހުރެގެން ކަންކަން ކުރާ ބައެއްގެ ގޮތުގައި ނުބެލެވޭނެ ވަރަށް ގިނަ ސަބަބުތައް އަޅުގަނޑުމެންނަށް ފެންނަން އެބަހުރި،" ޓެރަރިސްޓު ޖަމާއަތް އައިސިސްގެ ބަޔަކަށް ހެދިގެން ރައީސް މުހައްމަދު ނަޝީދު އަވަހާރަކޮށްލަން އުޅުނު މީހުންގެ ހާލަތު އެސިސްޓަންޓް ކޮމިޝަނާ އޮފް ޕޮލިސް މުހައްމަދު ރިޔާޒު ކިޔައިދެއްވި އެވެ.
އިސްކަންދަރު ކޮށީގައި ރޭ ބޭއްވި ނޫސްވެރިންގެ ބައްދަލުވުމެއްގައި، މެއި 6، ގެ ބޮމުގެ ހަަމަލާދިން 10 މީހުންގެ ފަތިފުށް ބޮޑު ތަހުގީގަކަށްފަހު ފުލުހުން ހާމަކުރިއިރު އެނގިގެންދިޔައީ ހަރުކަށި ފިކުރާ އިސްލާމް ދީނާ އެއްވެސް ގުޅުމެއް ނެތް ކަމެވެ. ތަހުގީގުން ހާމަވެގެންދިޔައީ ހަރުކަށި ފިކުރުގެ މީހުންގެ ދެފުށްކެހެރިކަމާއި ޖާހިލު ކަމެވެ.
"ހާއްސަކޮށް މި ފިކުރަށް ތަބާވެ މި ފިކުރުތަކަށް ހަމްދަރުދީވާ މަދު ބަޔަކު ނަމަވެސް އަޅުގަނޑުމެންގެ ތެރޭގައި އުޅޭތީވެ އަޅުގަނޑުމެން މިކަންކަން ހާމަ ކުރަން ބޭނުންވަނީ،" ހަރުކަށި މީހުންގެ ފަތިފުށް ހާމަކުރުމުގެ ބޭނުން ރިޔާޒް ވިދާޅުވި އެވެ. "މި މީހުންގެ ވިސްނުންގެ ތެރޭގައި މީހުން ދެމެހެއްޓުމަށް ތަފާތު އުކުޅުތައް ބޭނުން ކުރަމުންދޭ."
ގުރްއާނާއި ސުންނަތް މާނަ ކުރަނީ ހިތަށްއަރާ ގޮތަކަށް
އިސްލާމް ދީނަށް ލޯބި ކުރާ މީހަކު އެންމެ ބޮޑަށް ލޯބިވާނެ ދެ އެއްޗަކީ ﷲ ގެ ވަހީގެ ބަސްފުޅާއި އެކަލާންގެ ރަސޫލާ މުހައްމަދުގެފާނުގެ ސުންނަތަށެވެ. ނަމަވެސް ހަރުކަށި ފިކުރުގެ މީހުން ގުރްއާނާއި ސުންނަތުގެ ހުރުމަތް ކަނޑާލައިފި އެވެ. އާންމުންގެ މެދުގައި އެމީހުން ފަތުރަނީ ގުރްއާނާއި ސުންނަތުގެ ދޮގު މާނައެކެވެ.
"އެމީހުންނަށް ފެންނަ ގޮތަށް ގުރްއާނާއި ސުންނަތް މާނަކޮށް އިސްލާމީ ގާއިދާތައް މުޅިން އެހެން މާނައެއްގައި އާންމުކޮށް ރަސްމީ ތައުލީމީ ނިޒާމުގެ ތެރެއިން ތައުލީމު ހާސިލްކޮށްގެން ތިއްބަވާ އިލްމުވެރިންނާއި ޝެއިހުން ކަންކަން ބަޔާންކޮށްދެއްވާފައިވާ ގޮތާ މުޅިން ހިލާފަށް މީހުންނަށް ވިސްނައިދެނީ،" ރިޔާޒް ވިދާޅުވި އެވެ.
ބޮން ގޮއްވުމުގައި ބައިވެރިވި ބައެއް މީހުން: ފޯނު ހުރީ ބަރަހަނާ ވީޑިއޯ -- ފޮޓޯ: އަދަދު ފައިލް
ގުރްއާނާއި ސުންނަތް އެ އޮންނަ ގޮތަށް ބަޔާން ކުރާ ޝެއިހުންނަކީ ކާފަރުން ކަމަށް ޓެރަރިސްޓު ފިކުރުގެ މީހުން ދެކެ އެވެ. އަދި އެމީހުން ބޭނުންވާ ޒާތުގެ އަނިޔާވެރިކަމާއި ނުލަފާ ވިސްނުން ފަތުރާ މީހުންނަކީ އަސްލު ޝެއިހުންގެ ގޮތުގައި އާންމުންނަށް ވިސްނައިދޭން ހަރުކަށި ފިކުރުގެ މީހުން މަސައްކަތް ކުރެ އެވެ.
"ރަސްމީ ތައުލީމީ ނިޒާމުގެ ތެރެއިން އިލްމުވެރިންގެ ގޮތުގައި ކަނޑައެޅިފައިވާ މީހުންގެ ބަސް ނޭހުމަށާއި އެފަރާތްތަކާ މުއާމަލާތް ނުކުރުމަށް މީހުންނަށް ވަރަށް ބޮޑަށް އެމީހުން ބާރު އަޅަމުންދާ ކަމަށް އަޅުގަނޑުމެންނަށް މި ތަހުގީގަށް ލިބުނު މައުލޫމާތުތަކުން ފާހަގަ ކުރެވޭ،" ހަގީގަތް އޮޅުވާލުމަށް ހަރުކަށި ފިކުރުގެ މީހުން ކުރާ މަސައްކަތް ރިޔާޒު ހާމަ ކުރި އެވެ.
މި މީހުން ފިޔަވައި ރާއްޖޭގެ ވަރަށް ގިނަ ބަޔަކު ކާފަރު ކުރޭ
އަހަރުމެންގެ ރަސޫލާ ކޮންމެ ދުވަހަކު 100 ފަހަރު ތައުބާވެވަޑައިގަންނަވަ އެވެ. ސުވަރުގެ ލިޔުއްވާފައި އޮތް ނަމަވެސް އެކަލޭގެފާނު ދުވަހުގެ ގިނަ ވަގުތު ހޭދަ ކުރައްވަނީ އަޅުކަމާއި ތައުބާވެވަޑައިގަތުމުގަ އެވެ. އެކަމަކު ޓެރަރިސްޓު އައިސިސް ޖަމާއަތަށް ނިސްބަތްވާ މީހުންގެ ފަރާތުން ފެންނަނީ ދުވަހުގެ ގިނަ ވަގުތު އެހެން މީހުން ކާފަރު ކުރުމާއި އެހެން މީހުންގެ ފަހަތުން ދުވާ މަންޒަރެވެ.
"މި ހަމަލާ ދިން މީހުންނަކީ ދިވެހި ބިމަކީ ކުފުރުގެ ބިމެއް ކަމަށް ދެކިގެން، ދިވެހި ދައުލަތް ގަބޫލުނުކޮށް ރައީސުންނާއި މަޖިލިސް މެމްބަރުންނާއި ފުލުހުންނާއި ސިފައިންނާއި ދައުލަތުގެ މުސާރަދޭ މަގާމުތަކުގައި ތިބޭ މީހުންނަކީ ތޯގޫތުންގެ [ﷲ ނޫން ފަރާތްތަކަށް އަޅުކަންކުރާ ނުވަތަ އަޅުކަންވެވޭ ތަކެތި ނުވަތަ މީހުން] ގޮތުގައި ބަލައި ކަނޑައަޅައިގެން އެ ފަރާތްތަކުގެ ލެޔާއި މުދާ ހުއްދަ ކޮށްގެން އެ ފަރާތްތަކުގެ ވިޔަފާރިތަކުން ނުވަތަ އާންމުކޮށް ވިޔަފާރިތަކުގައި އުޅުއްވާ ފަރާތްތަކުގެ ފަރާތުން ވިޔަފާރި ކުރުމަކީ ވެސް ހަރާމް ކަމެއްގެ ގޮތުގައި ދެކިގެން މަސައްކަތް ކުރަމުން އަންނަ ބައެއް،" ހަރުކަށި ފިކުރުގެ މީހުންގެ ނަޒަރުގައި ކާފަރުންގެ ލިސްޓު ރިޔާޒް ކިޔައިދެއްވި އެވެ.
ހަރުކަށި ފިކުރުގެ މީހުންގެ ނަޒަރުގައި ދިވެހިރާއްޖޭގެ ގިނަ ވަޒީފާތައް ހަރާމެވެ. އައިޖީއެމްއެޗުގެ ޑޮކްޓަރު އެ ނަންގަވަނީ ހަރާމް ފައިސާ އެވެ. އިސްލާމީ މަރުކަޒުގެ އިމާމު ގެއަށް ވައްދަނީ އަނގުރު އަލިފާނެވެ. ދަންވަރު މަގުމަތި ކުނިކަހަން ނިކުމެ އުޅޭ މުސްކުޅި ދައިތަ އެ ކުރަނީ ހަރާމް މަސައްކަތެކެވެ.
"ދައުލަތުން ދޭ މުސާރަ އާއި އާމްދަނީއަކީ ހަލާލު ނުވާނެ އެއްޗެއް ކަމަށް ބުނެ އެކަމަށް އެ ފަރާތްތަކުން ވަކާލާތުކޮށް އެ ފަރާތްތަކާ ގުޅުން އޮންނަ މީހުންގެ ތެރެެއިން ދައުލަތުގެ މަގާމްތަކުގައި ތިބޭ މީހުން އެ ވަޒީފާތަކުން ދުރުވާން ބާރުއަޅާ އެކަންކަމަށް އެމީހުންގެ މަސައްކަތް ވަރަށް ބޮޑަށް ބައްޓަންކޮށްފަ އޮތްކަން އަޅުގަނޑުމެންނަށް ފާހަގަ ކުރެވޭ،" ހަރުކަށި ފިކުރުގެ މީހުންގެ ވިސްނާގޮތް ރިޔާޒް ހާމަ ކުރި އެވެ.
ހަރާމް ކަންކަން ކުރަނީ ވަރަށް ސިއްރުން
ފުލުހުން ރޭ ހާމަކުރި މައުލޫމާތުން ބައިވަރު ކަންކަން އެނގިގެންދިޔަ އެވެ. އެންމެ ބޮޑަށް އެނގިގެންދިޔައީ އައިސިސް ޖަމާއަތްތަށް ފަދަ ގުރޫޕުތަކަށް ނިސްބަތްވާ މީހުންގެ ދެފުށްކެހެރި ކަމެވެ. އާންމުންނަށް ދައްކާ ސިފަ އާއި މީހުންނަށް ނުފެންނަ ތަނުގައި އުޅޭ ގޮތުގެ ތަފާތު ބޮޑުކަމެވެ.
"މި ދެންނެވި ވިސްނުން މި މީހުން މި ގޮތަށް ޕޯޓްރޭކޮށްފަ މީހުންނަށް ދައްކާ ހެދިކަމުގައި ވިޔަސް ވެސް މީގެ ތެރެއިން ބައެއް މީހުންނަކީ ދިވެހިރާއްޖޭގެ ދައުލަތުން ހަރަދު ކުރާ ފައިސާ އެމީހުންގެ އަމިއްލަ ބޭނުންތަކަށް ބޭނުން ކުރާ ބައެއް،" އޭނާ ވިދާޅުވި އެވެ.
ދައުލަތުގެ ފައިސާ ހަރާމް ކުރާ މީހުން ވަގު ޑޮކިއުމަންޓު ހޯދައިގެން ނަމަވެސް "ހަރާމް ފައިސާ" އެމީހުންގެ އަމިއްލަ ބޭނުންތަކަށް ބޭނުން ކުރެވެ. އަދި އާއިލާއަށް ވެސް ދެނީ ހަމަ ދައުލަތުން ހޯދާ ފައިސާ އެވެ.
"މިގޮތުން ދައުލަތުގެ އިންކަމް ސަޕޯޓް އެލަވަންސް ހޯދުމާއި އެންސްޕާ ފަދަ އިދާރާތަކަށް ހުށަހަޅައިގެން މާލީ އެހީތެރިކަން ހޯދުމާއި މިކަހަލަ ބައެއް ކަންކަން ވެސް މީގެ ތެރެއިން ބައެއް މީހުން ކުރާކަން ފާހަގަ ކުރެވޭ. އަދި މިފަދަ ކަންކަން ކުރުމުގައި މި މީހުން ސައްހަ ނޫން ޑޮކިއުމަންޓް ފަދަ ގާނޫނާ ހިލާފް އަމަލުތައް ކޮށްގެން ފައިސާ ހޯދައިގެން މި ފައިސާ ބޭނުން ކުރަމުންދާކަން ވެސް އަޅުގަނޑުމެން ފާހަގަ ކުރަން،" ރިޔާޒު ވިދާޅުވި އެވެ.
އަމިއްލައަށް ދޭ ނަސޭހަތާ ހިލާފުވަނީ، އެމީހުންގެ މޫނުމަތި ރީތިކުރުމަށް، ވަރަށް ބޮޑަށް އެކަން ސިއްރުކޮށްގެނެވެ.
"މިކަން ހަގީގަތުގައި ފާހަގަ ކުރަން ބޭނުންވަނީ އެހެން މީހުންނަށް މުޖްތަމައު ތެރޭގައި ދައުލަތުގެ ބިމަކީ ކުފުރުގެ ބިމެއްގެ ގޮތުގައި، ދައުލަތުގެ އާމްދަނީއަކީ ހަލާލު ނޫން އެއްޗެއްގެ ގޮތުގައި ދެއްކި ކަމުގައި ވިޔަސް އެމީހުންގެ އަމިއްލަ ހާޖާތްތައް ފުއްދުމަށްޓަކައި އެ ފައިސާ ބޭނުން ކުރަމުންދާކަން އެއީ އެމީހުން ސިއްރުކޮށްފަ އޮންނަ ކަމެއް،" ޓެރަރިސްޓުންގެ ދެފުށްކެހެރިކަން ރިޔާޒް ހާމަކުރެއްވި އެވެ.
މިސްކިތްތަކުގަ އާއި އެހެނިހެން މައިދާންތަކުގައި "ދީނަށް ގޮވާލާ" ހަރުކަށި މީހުންގެ އީމާންތެރިކަން ހުރި މިންވަރު ފުލުހުންނަށް ހާމަވީ ތަހުގީގަށް އެމީހުންގެ ފޯނު ހުޅުވައިލުމުންނެވެ. ރައީސް ނަޝީދަކީ ލާދީނީ ބޭފުޅެއް ކަމަށް ބުނާ މީހުންގެ ފޯނުން ފެނުނު ވީޑިއޯތައް ބަލާ މީހެއްގެ ލޮލުން ތަރަތަރަ ޖަހައިގެންދާނެހާ ވެސް އެ ވީޑިއޯތަކުގެ ހުތުރުކަން ބޮޑެވެ.
"މިބާވަތުގެ ނަފްރަތުގެ އަނިޔާވެރި އަމަލުތައް ކުރުމަށްޓަކައި އެހެން މީހުންނަށް މި ވިސްނުންތައް ލައިދޭ މީހުން ހަގީގަތުގައި އެމީހުން އެ ބުނާ މިންވަރަށް އެކަންކަމަށް އަމަލު ނުކުރާކަން. އަދި މީގެ ތެރެއިން ބައެއް މީހުންގެ ފޯނުން ފެންނަން ހުރި ބައެއް [ބަރަހަނާ] މަންޒަރުތައް ފަދަ ކަންކަމަށް ބަލާއިރު ވެސް ދީނީ ގޮތުން ބުނާ މިންވަރުގެ އަގީދާއެއް ހުރެގެން ކަންކަން ކުރާ ބައެއްގެ ގޮތުގައި ނުބެލެވޭނެ ވަރަށް ގިނަ ސަބަބުތައް އަޅުގަނޑުމެންނަށް ފެންނަން އެބަހުރި،" ރިޔާޒް ވިދާޅުވި އެވެ.
ނަޝީދަށް ދިން ހަމަލާއާ ގުޅިގެން ޖުމްލަ 10 މީހަކު ފުލުހުންގެ ބެލުމުގެ ދަށުގައި ތިބިއިރު އޭގެ ތެރެއިން ހަތަރު މީހެއްގެ މައްޗަށް ދައުވާކުރުމަށް މިހާރު ވަނީ ފޮނުވައިފަ އެވެ. އެއީ، ހަމަލާއާ ގުޅިގެން އެންމެ ފުރަތަމަ ހައްޔަރުކުރި އަހުމަދު އަދުހަމް އާއި މުޖާޒް އަހްމަދުގެ އިތުރުން ތަހުމީން އަހްމަދު، 32، އާއި އަހުމަދު ފާތިހު، 23، އެވެ.
ދެން ބަންދުގައި ތިބީ މ. ކުދެހިގޭ، އިސްހާގާއި ގއ. ވިލިނގިލީ، ހުދުރުމާގޭ، ފަހުމީ އަލީ އާއި ނ. މަނަދޫ ނޫރީގޭ، އަލީ ހައިޝަން އެވެ. އޭގެ އިތުރުން އއ. މާޅޮސް، އަސަރީގޭ މުހައްމަދު ނާޒިމާއި ހއ. ހޯރަފުށީ އަލަނާސިގޭ މުހައްމަދު ތަސްލީމާއި ހއ. މޮޅަދޫ، ބަހާރުގޭ އަބްދުﷲ އަލިމަނިކު ވެސް ހުރީ އެ މައްސަލަގައި ހައްޔަރުކޮށްފަ އެވެ.
ނަޝީދު އަވަހާރަކޮށްލަން މިދިޔަ ރޯދަ މަހު ދިން ހަމަލާއަށްފަހު އެމަނިކުފާނުގެ ފުރާނަފުޅު ސަލާމަތް ކުރުމަށް އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި އޮތް 10 ރޭޒާ ފުއް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
