އައްޑޫ ސިޓީން އަލަށް ހިއްކާ 228 ހެކްޓަރުގެ ބިން ރަނގަޅަށް މެނޭޖު ކުރެވިއްޖެ ނަމަ ކުރިއަށް އޮތް 50 އަހަރު ތެރޭގައި ބިން ހިއްކަން ނުޖެހޭނެ ކަމަށް އައްޑޫގެ މޭޔަރު އަލީ ނިޒާރު ވިދާޅުވެއްޖެ އެވެ.
އައްޑޫން ބިން މިފަހަރު ހިއްކަނީ ދެ ރިސޯޓެއް ތަރައްގީ ކުރުމަށާއި ގެދޮރުގެ މަޝްރޫތައް ހިންގުމުގެ އިތުރުން ވިޔަފާރި ބޭނުންތަކަށް ހާއްސަކޮށްގެންނެވެ. ހިއްކަނީ ހިތަދޫ އާއި ހުޅުދޫ/މީދޫގެ އިތުރުން މަރަދޫ އާއި މަރަދޫފޭދޫންނެވެ.
އައްޑޫ އެތެރެވަރިން ވެލި ނަގައިގެން ބިން ހިއްކަން ނިންމާފައިވާއިރު އޭގެ ސަބަބުން އެ ސިޓީގެ ތިމާވެއްޓަށް އޭގެ ނޭދެވޭ އަސަރު ކުރާނެތީ ތިމާވެށި ހިމާޔަތް ކުރަން މަސައްކަތް ކުރާ މީހުން ދަނީ ކަންބޮޑުވުން ފާޅު ކުރަމުންނެވެ.
"އަދަދު" އަށް މިދިޔަ ހަފުތާގައި ދެއްވި އިންޓަވިއުއެއްގައި ނިޒާރު ވިދާޅުވީ ދޭތެރެދޭތެރެއިން އައްޑޫ ހިއްކުމަށް ބަދަލެއް ގެންނަން ޖެހޭ ކަމަށާއި ތިމާވެއްޓަށް ވެސް ރަނގަޅު ގޮތަކީ އެއީ ކަމަށެވެ.
"ފަންސާހަކަށް އަހަރު ދެން ހިއްކަން ނުޖެހޭނޭ އަޅުގަނޑު މިދަންނަވަނީ އޭގެ ރިކަވާވާން ހާއްސަކޮށް އެތެރެވަރީގެ މިހެން ހުންނަ ކަންކަން ރިކަވާ ވާން ވެސް ވަގުތު ދޭން ޖެހޭ. އެހެން ވިއްމާ އަޅުގަނޑު ގަބޫލު ކުރަނީ މިހާރު މިހިއްކާ ހިއްކުމަށް ފަހު 50 އަހަރަށް ވުރެން ދިގު މުއްދަދަތަކަށް ވެސް ނުހިއްކާ ތިބެވިދާނެ ކަމަށް،" ނިޒާރު ވިދާޅުވި އެވެ.
ނިޒާރު ވިދާޅުވީ އެ ސިޓީގެ އާބާދީ ބޮޑުވަމުން އަންނަ ގޮތަށް ބަލައި ބިން ދިނުން ޕްލޭން ކުރަން ޖެހޭ ކަމަށެވެ. އެގޮތުން ގޯތިދީ ބިން ހުސްކުރުމުގެ ބަދަލުގައި ޒަމާނީ ގޮތްތައް ބޭނުން ކުރަން ޖެހޭ ކަމަށް އޭނާ ވިދާޅުވި އެވެ.
"ފްލެޓް އެޅުމާއި ހައުސިން ޕްރޮޖެކްޓްތަކުގެ ތެރެއިން މީހުންނަށް ގެދޮރުވެރިކަން ދިނުމަށް މަސައްކަތް ކުރުމަކީ މާ މުހިންމުކަމެއް،" ނިޒާރު ވިދާޅުވި އެވެ.
މީގެ ކުރިން ތިން ފަހަރެއްގެ މަތިން އައްޑޫ ވަނީ ހިއްކައިފަ އެވެ. އެފަހަރުތަކުގައި ވެސް ވެލި ނެގީ އެތެރެވަރިންނެވެ.
ތިމާވެއްޓަށް ކުރާނެ ނޭދެވޭ އަސަރުތަކާ ގުޅޭގޮތުން ނިޒާރު ވިދާޅުވީ ގެއްލުން ކުޑަކޮށް ބިން ހިއްކޭނެ ގޮތްތަށް ހަމަޖެއްސުމަށް މަސައްކަތް ކުރާނެ ކަމަށެވެ. އީއައިއޭ ހަދާއިރު އެކަމަށް ބެލުމަށް ޕްލޭނިން މިނިސްޓްރީގައި އެދިފައިވާ ކަމަށް ވެސް ނިޒާރު ވިދާޅުވި އެވެ.
އައްޑޫ ބިން ހިއްކަން ނިންމާފައިވަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުންނެވެ. އެ މަޝްރޫއަށް 70-75 މިލިއަން ޑޮލަރު ހަރަދު ވާނެ ކަމަށް ލަފާކުރެ އެވެ. މި މަސައްކަތް 24 މަސް ދުވަހުގެ ތެރޭގައި ނިންމަން ޖެހޭއިރު އެކަން ކުރާނެ ބައެއް ހޯދަން މިހާރު ވަނީ އިއުލާން ކޮށްފަ އެވެ.
