ޓޯކިޔޯ، ޖަޕާން (ޖުލައި 23) - އިއްޔެ ފެށި އޮލިމްޕިކްސްގެ ފިރިހެން ފުޓްބޯޅަ އިވެންޓުގައި ޖަރުމަނު އަތުން ބްރެޒިލް 4-2 އިން މޮޅުވި މެޗުގައި އެ ޓީމުގެ ފޯވާޑް ރިޗާލިސަން ހެޓްރިކެއް ހަދައި ރެކޯޑެއް ގާއިމްކޮށްފި އެވެ.
އިއްޔެ ޖަރުމަނު ކޮޅަށް 30 މިނިޓް ތެރޭ ހެޓްރިކެއް ހެދި ރިޗާލިސަން އަކީ އިނގިރޭސި ޕްރިމިއާ ލީގުގެ އެވަޓަން އަށް ކުޅޭ ކުޅުންތެރިއެކެވެ. އޭނާ އަކީ ޕްރިމިއާ ލީގުގެ ކްލަބެއްގައި ހުރެ، އޮލިމްޕިކްސްގައި ބައިވެރިވެގެން ހެޓްރިކެއް ހެދި ފުރަތަމަ ކުޅުންތެރިޔާ އެވެ. ރިޗާލިސަން ވަނީ ދާދި ފަހުން އެ ގައުމުގައި ނިމުނު ކޮޕަ އެމެރިކާ ފުޓްބޯޅަ މުބާރާތުގައި ބްރެޒިލްގެ ސީނިއާ ޓީމަށް ވެސް ކުޅެފަ އެވެ. ފައިނަލުގައި އާޖެންޓީނާ އަތުން ބްރެޒިލް ބަލިވި މެޗުގައި ވެސް ރިޗާލިސަން ކުޅުނެވެ.
އުމުރުން 24 އަހަރުގެ ރިޗާލިސަން އަށް ބްރެޒިލުން 2016 ވަނަ އަހަރުގެ އޮލިމްޕިކްސްގައި ރަން މެޑަލް ހާސިލްކުރި ޓީމުން ޖާގަ ކެޓީ ފަހު ވަގުތުގަ އެވެ. އެއީ ފިޓްނަސް މައްސަލަތަކެއްގެ ސަބަބުންނެވެ. އޮލިމްޕިކްސްގައި ކުޅެނީ 23 އަހަރުން ދަށުގެ ޓީމު ނަމަވެސް އުމުރުން ދޮށީ ތިން ކުޅުންތެރިއަކު ޓީމު ލިސްޓުގައި ޖެހޭ ގޮތަށް ގަވާއިދުގައި އޮވެ އެވެ. މި ފަހަރުގެ އޮލިމްޕިކްސްގައި ބްރެޒިލްގެ ކެޕްޓަންކަން ކުރަނީ އުމުރުން 38 އަހަރުގެ ޑެނީ އަލްވޭސް އެވެ.
ބްރެޒިލުން އަމިއްލަ ފަސްގަނޑުގައި ކުޅެ، 2016 ވަނަ އަހަރުގެ އޮލިމްޕިކްސްގެ ފުޓްބޯޅަ އިވެންޓުގެ ފައިނަލުން ޖަރުމަނު ބަލިކުރީ ޕެނަލްޓީ ޖަހައިގެންނެވެ. އެކަމަކު، އިއްޔެގެ މެޗުގައި ބްރެޒިލުން ވަނީ ޖަރުމަނަށް މާ ބޮޑު ފުރުސަތެއް ނުދީ މެޗުން މޮޅުވެފަ އެވެ.
ރިޗާލިސަންގެ އިތުރުން ދެން ބްރެޒިލްގެ ގޯލު ޖެހީ ބެޔާ ލެވަކޫސަންގެ ފޯވާޑް ޕައުލީނިއޯ އެވެ. ޖަރުމަނުގެ ދެ ގޯލު ޖެހީ ނަދިއެމް އަމީރީ އާއި ރަގްނާ އަކޭ އެވެ.
މި ފަހަރުގެ އޮލިމްޕިކްސް އަށް އެންމެ ވަރުގަދަ ސްކޮޑަކާ އެކު ނުކުތް ސްޕެއިން ވަނީ ކުޅުނު ފުރަތަމަ މެޗުން ލަނޑެއް ނުޖެހި 0-0 އިން މިސްރާ އެއްވަރުވެފަ އެވެ.
ސްޕެއިނަށް މި މެޗުގައި ލަނޑެއް ޖަހައިދޭން އެންމެ ރަނގަޅު ހަމަލާއެއް ފޮނުވާލީ ފުރަތަމަ ހާފުގައި ޑެނީ ސެބާޔޯސް އެވެ. އޭރިއާބޭރު ރޮނގުކައިރިން ސެބާޔޯސް ޖެހި ބޯޅަ އަމާޒުވީ ގޯލުގެ ދަނޑިއަށެވެ. ދެ ވަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅެން އަރައި ސްޕެއިނުގެ ފޯވާޑް ރަފާ މީރް ބޮލުން ޖެހި ބޯޅަ މިސްރުގެ ކީޕަރު މުހައްމަދު އަލް ޝެނާވީ ވަނީ މަތަކޮށްފަ އެވެ.
އޮލިމްޕިކްސް ފުޓްބޯޅަ އިވެންޓުގައި އިއްޔެ ފްރާންސް ވަނީ 4-1 އިން މެކްސިކޯ އަތުން ބަލިވެފަ އެވެ. އަދި އޮސްޓްރޭލިއާ އިން ވަނީ 2-0 އިން އާޖެންޓީނާ ބަލިކޮށްފަ އެވެ.
