މި އަހަރު ބާއްވަން މަސައްކަތް ކުރަމުން އަންނަ ސާފް ޗެމްޕިއަންޝިޕް ހޯސްޓް ކުރުމުގެ ޝައުގުވެރިކަން ރާއްޖެ އާއި ސްރީ ލަންކާ އިން ގެންގުޅޭ ކަމަށް އެފްއޭއެމުން ބުނެފި އެވެ.
ރާއްޖެ އާއި ލަންކާ ގުޅިގެން ވަނީ 2008 ވަނަ އަހަރުގެ ސާފް ޗެމްޕިއަންޝިޕް ވެސް ހޯސްޓްކޮށްފަ އެވެ. އެއީ ރާއްޖޭން ފުރަތަމަ ފަހަރަށް މި މުބާރާތުގެ ޗެމްޕިއަންކަން ހޯދި ފަހަރެވެ.
މި ފަހަރުގެ ސާފް ޗެމްޕިއަންޝިޕަކީ އެންމެ ފުރަތަަމަ މިދިޔަ އަހަރު ބާއްވަން ނިންމި މުބާރާތެކެވެ. އެކަމަކު، ކޮވިޑް-19ގެ ނުރައްކާ އިންތިހާ އަށް ބޮޑުވެފައިވާތީ އެ މުބާރާތް މި އަހަރަށް ފަސްކުރަން ނިންމީ އެވެ. މި އަހަރުގެ ސެޕްޓެމްބަރު މަހުގެ ތެރޭގައި އެ މުބާރާތް ބަންގްލަދޭޝްގައި ބާއްވަން ކުރާ މަސައްކަތުގައި އަދި އަލިމަގެއް ނުފެނެ އެވެ.
ސްޕޮންސަރެއް ހަމަނުޖެހުމާއި ބަންގްލަދޭޝްގައި މިހާރު އަނެއްކާ ވެސް ކޮވިޑްގެ ހާލަތު ގޯސްވަމުން އަންނާތީ އެ ގައުމުގައި ސާފް ބޭއްވުމުގެ ފުރުސަތު ކުޑަވެފައިވާއިރު، ސެޕްޓެމްބަރު މަހު ސާފް ނުބޭއްވިއްޖެނަމަ މި އަހަރު އެ މުބާރާތް އެ ގައުމުގައި ހޯސްޓްނުކުރެވޭނެ ކަމަށް ބަންގްލަދޭޝް ފުޓްބޯޅަ ފެޑެރޭޝަނުގެ ރައީސް ކާޒީ ސަލާހުއްދީން ވަނީ ވިދާޅުވެފަ އެވެ.
ނޭޕާލުން ވެސް ސެޕްޓެމްބަރު މަހު ސާފް ބޭއްވުމަށް ބޭނުންވާކަން އިއުލާނު ކޮށްފައިވާއިރު، ރާއްޖެ އާއި ލަންކާ އިން ވެސް މުބާރާތް ހޯސްޓްކުރަން ޝައުގުވެރިވެ އެވެ.
އެފްއޭއެމްގެ ޖެނެރަަލް ސެކްރެޓަރީ ހުސެއިން ޖަވާޒް (ޖަވާ)، "އަދަދު" އަށް ވިދާޅުވީ ލަންކާއާ އެކު ސާފް ބޭއްވޭތޯ އެ ގައުމާ އެކު ކޮންމެ ވެސް ވަރަކަށް މަޝްވަރާތަކެއް ކުރެވިފައިވާ ކަމަށާއި އެ ފަދަ ޕްރޮޕޯސަލަކާ މެދު އެ ގައުމުގެ ވެސް އޮތީ ޕޮޒިޓިވް ވިސްނުމެއް ކަމަށެވެ.
ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ވާހަކަ ދައްކަވަމުން އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ސާފް ބޭއްވުމުގެ ވިސްނުމައިގެން ކުރިއަށްދިއުމުގައި ސަރުކާރާ މަޝްވަރާ ކުރަން ޖެހޭ ކަންތައްތަކެއް އެބަހުރި ކަމަށެވެ.
"އަޅުގަނޑުގެ ވިސްނުމަކަށް އެބަ އާދޭ ރާއްޖެ އާއި ލަންކާއާ ގުޅިގެން ކީއްވެގެންބާއޭ ނުކުރެވެން ވީ. އެހެންވީމަ އަޅުގަނޑަށް ސީދާ އަޅުގަނޑުމެން ބިޑް ކުރާނެއޭ ނުވަތަ ރާއްޖޭގައި ބާއްވަން މަސައްކަތް ފަށާނެއޭ ދެންނެވޭނީ އަޅުގަނޑު ސަރުކާރާ އެކު މަޝްވަރާ ކުރުމަށްފަހު،" ބައްސާމް ވިދާޅުވި އެވެ.
މިދިޔަ ދެ އަހަރު ތެރޭ ރާއްޖޭން ވަނީ އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ހޯސްޓްކުރަން ބިޑް ކުރަން ހުޅުވާލި ފުރުސަތުގައި ތިން ފަހަރު ބިޑް ކާމިޔާބުކޮށްފަ އެވެ.
އެންމެ ފުރަތަމަ މިިދިޔަ އަހަރު ރާއްޖޭން އެކަނި ބިޑްކުރިއިރު، މި އަހަރު ފުރަތަމަ ބިޑް ކާމިޔާބުކުރީ އިންޑިއާއާ ވާދަކޮށެވެ. އަދި އަންނަ މަހު މެޗުތައް ހޯސްޓްކުރަން ހުޅުވާލި ފުރުސަތުގައި ރާއްޖޭން ބިޑް ކާމިޔާބުކުރީ ބަންގްލަދޭޝްގެ މައްޗަށް ކުރިހޯދުމަށް ފަހު އެވެ. ކޮންމެ ފަހަރަކު ބިޑް ކާމިޔާބު ކުރުމަށް ވެސް އެފްއޭއެމަށް ސަރުކާރުގެ އެހީ ލިބެ އެވެ.
