ސިޔާސީ ގޮތުން ހިޔާލުތަފާތުވެ، ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދު އެކުގައި މަސައްކަތް ނުކުރެވޭ ހިސާބަށް ގުޅުން ގޯސްވެފައިވީ ނަމަވެސް، އެމްޑީޕީއަށް ގެއްލުމެއް ލިބޭ ކަމެއް ދެ ރައީސުން ވެސް ނުކުރައްވާނެކަމުގެ ޔަގީންކަން އެބަ އޮތް ކަމަށް އެ ޕާޓީގެ ޗެއާޕާސަން ހަސަން ލަތީފް ވިދާޅުވެއްޖެ އެވެ.
ނަޝީދާއި ރައީސް ސޯލިހާ ދެމެދު ސިޔާސީ ހިޔާލުތަފާތުވުން ބޮޑުވެފައިވާ ތަން ފެންނަން ފެށީ، ބަރުލަމާނީ ނިޒާމުގެ ވާހަކަތަކުންނެވެ. ނަޝީދު ވަނީ އެމަނިކުފާނު ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ރައީސް ސޯލިހްގެ އަރިހުން އެދިވަޑައިގެންފަ އެވެ. އެކަމަކު ނިޒާމް ބަދަލުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށް ތަކުރާރުކޮށް ރައީސް ސޯލިހް ވަނީ ވިދާޅުވެފަ އެވެ.
އަދި އޭގެ ފަހުން، ރައީސް ސޯލިހްއާ ދެމެދު އެއްވެސް މައްސަލައެއް ނެތް ނަމަވެސް، އެމަނިކުފާނާ އެކު ސިޔާސީ ގޮތުން ދެން ހުންނެވެން ނެތް ކަމަށް ނަޝީދު ވަނީ ފާޅުގައި ވިދާޅުވެފަ އެވެ.
އަދި ނަޝީދު އަވަހާރަކޮށްލަން ދިން ޓެރަރިސްޓު ހަމަލާއަށްފަހު، އިސްލާމް ދީނާ ގުޅުވައިގެން ނަފްރަތު އުފައްދަން ހުއްޓުވަން ސަރުކާރުން ހުށަހެޅި ބިލާމެދު ފާޑުކިޔުންތައް ބޮޑުވުމުން އެ ބިލު ފާސްކުރަން ސަރުކާރުން ފަހަތު ފަޔަށް ބުރަވި މައްސަލައިގައި ވެސް އެމަނިކުފާނު ވަނީ ވަރަށް ބޮޑަށް ނުރުހުންފާޅު ކުރައްވައިފަ އެވެ.
އޭގެ އިތުރުން، ވެރިކަމުގެ ނިޒާމު، ބަދަލުކުރަން އިދިކޮޅު ލީޑަރު އަބްދުﷲ ޔާމީންއާ އެކުގައި މަސައްކަތް ކުރައްވަން ތައްޔާރަށް ހުންނެވިކަމަށް ވެސް ނަޝީދު ވަނީ މި ފަހުން އިއުލާނު ކުރައްވައިފަ އެވެ.
ދެ ރައީސުންގެ ކޯޅުމުގެ އަސަރު އެމްޑީޕީގެ ތެރެއިން ވެސް މިހާރު ފެންނަމުންދާއިރު، އެކަމުގައި ޕާޓީގެ ކަމާބެހޭ ގުނަންތަކުން ވަކި ގޮތެއް ނިންމަން ނުޖެހޭތޯ "އަދަދު"އިން ކުރި ސުވާލަކަށް ޖަވާބު ދެއްވަމުން ހަސަން ލަތީފް ތަކުރާރުކޮށް ވިދާޅުވީ އެމްޑީޕީގެ ތެރޭގައި ދެ ފެކްޝަނެއް ނޫޅޭ ކަމަށެވެ.
ނަމަވެސް، ބައެއް ކަންކަމުގައި ހިޔާލުތަފާތުވުންތަކެއް އުޅޭކަމަށް ގަބޫލުކުރައްވާ ކަމަށާއި، އެކަން ޕާޓީގެ އިސް ބޭފުޅުންގެ މެދުގައި މަޝްވަރާކުރެވި ހައްލު ހޯދަންޖެހޭ ކަމަށް ހަސަން ވިދާޅުވި އެވެ.
"އަޅުގަނޑުމެންނަށް އެބަ އެނގޭ ހިޔާލުތަފާތުވުންތައް އުޅޭ ކަންކަން. އެކަންކަން ޕާޓީގެ އިސް ސަފުގައި ތިއްބެވި ބޭފުޅުންގެ މެދުގައި މަޝްވަރާ ކުރެވި ހައްލުތަކެއް ހޯދަންޖެހޭ. އަދި އެކަން އެމްޑީޕީގެ އާންމު މެމްބަރުންނާ ހިއްސާ ކުރަންޖެހޭ،" އޭނާ ވިދާޅުވި އެވެ.
ބަރުލަމާނީ ނިޒާމަކަށް ބަދަލުކުރުމާއި އެކަމަށް އިދިކޮޅާ އެކު މަސައްކަތް ކުރުން ފަދަ ވާހަކަތަކެއް އެމްޑީޕީގެ ރައީސްގެ މަގާމުގައި ހުންނެވި ނަޝީދު ފާޅުގައި ދައްކަވާއިރު، އެކަމުގައި ޕާޓީން ވަކި ގޮތްތަކެއް ނިންމުމާމެދު ކުރި ސުވާލަށް ހަސަން ސީދާ ޖަވާބެއް ނުދެއްވަ އެވެ.
އޭނާ ވިދާޅުވި ގޮތުގައި، ސިޔާސީ ގޮތުން ޕާޓީގެ ކުރި މަގު ކަނޑައަޅާނީ ޕާޓީގެ ރައީސެވެ. އަދި އެކަމުގައި ޕާޓީގެ ގުނަންތަކުން ކަމެއް ނިންމަންޖެހޭނަމަ އެކަން ހުށަހަޅައިގެން ކުރިއަށް ގެންދެވޭނެ ކަމަށެވެ.
ނަމަވެސް، އެމްޑީޕީގެ ރައީސް އާއި ޕާޓީގެ އެންމެ އިސް މަގާމުގައި މިވަގުތު ހުންނެވި ރައީސް ސޯލިހާ ދެމެދު ހިޔާލުތަފާތުވިޔަސް، ދެ ބޭފުޅުން ވެސް ޕާޓީއަށް ގެއްލުމެއް ލިބޭ ފަދަ ކަމެއް ނުކުރައްވާނެކަމުގެ ޔަގީންކަން އެބަ އޮތް ކަމަށް ހަސަން ލަތީފް ވިދާޅުވި އެވެ.
