ޖަޕާނު ސަރުކާރުން ވެކްސިން ހަދިޔާކުރާ ގައުމުތަކުގެ ތެރޭގައި ރާއްޖެ ހިމެނިއްޖެ އެވެ.
ރާއްޖޭގެ ވެކްސިން ޕްރޮގްރާމް ފެށީ އިންޑިއާ އިން ހަދިޔާކުރީ 200،000 ޑޯޒުންނެވެ. ގިނަ ބަޔަކު ކޮވީޝީލްޑްގެ ފުރަތަމަ ޑޯޒު ޖަހައި، ދެވަނަ ޑޯޒުގެ އިންތިޒާރުގައި ތިއްބައި ވެކްސިން ނެތިގެން ދެވަނަ ޑޯޒު ޖެހުން މެދުކަނޑާލި އެވެ. އޭރު ގިނަ ބަޔަކު ފުރަތަމަ ޑޯޒު ޖެހިތާ އަށް ހަފުތާ އޮތީ ވެފަ އެވެ.
ނަމަވެސް އަމިއްލަ ފަރާތަކުން ދިން ކޮވިޝީލްޑްގެ އާ ޝިޕްމެންޓަކާއެކު އަނެއްކާވެސް ވަނީ ވެކްސިން ޕްރޮގްރާމް ފަށައިފަ އެވެ.
ފޮރިން މިނިސްޓަރު އަބްދުﷲ ޝާހިދު ވިދާޅުވީ، ޖަޕާނުން ކޮވެކްސް ފެސިލިޓީއަށް ހަދިޔާކުރާ 11 މިލިއަން ވެކްސިން ޑޯޒް ދޭން ހަމަޖެހިފައިވާ 10 ގައުމުގެ ތެރޭގައި ރާއްޖެ ހިމެނޭ ކަމަށެވެ.
ނަމަވެސް ޖަޕާނުން ރާއްޖެއަށް ހަދިޔާކުރަނީ ކިހާ އަދަދެއްގެ ވެކްސިނެއްކަމެއް އަދި އެއީ ކޮން ބާވަތެއްގެ ވެކްސިނެއްކަމެއް ހާމަކޮށްފައެއް ނުވެ އެވެ. ޖަޕާނުގައި އާންމުކޮށް ބޭނުންކުރަނީ ފައިޒާ، މޮޑާނާ އަދި އެސްޓްރާޒެނެކާ ވެކްސިނެވެ.
ރާއްޖޭގައި ވެސް އެ ތިން ވެކްސިން ބޭނުންކުރުމުގެ ހުއްދަ ވަނީ ދީފަ އެވެ.
އަދި މިކަމަކީ ރާއްޖެއާއި ޖަޕާނާއި ދެމެދު އޮންނަ ވަރުގަދަ ގުޅުމުގެ ހެއްކެއްކަމަށް ޝާހިދު ވިދާޅުވި އެވެ.
ޖަޕާނުން ވެކްސިން ލިބޭނެ ކަމަށް ބުނެފައިވާއިރު، މިދިޔަ އާދިއްތަ ދުވަހުގެ ނިޔަލަށް ފުރަތަމަ ޑޯޒް ފުރިހަމަ ކޮށްފައި ވަނީ 318،756 މީހުންނެވެ. އޭގެތެރެއިން 235،615 މީހުން ވަނީ ދެ ޑޯޒް ފުރިހަމަ ކޮށްފަ އެވެ.
އާދިއްތަ ދުވަހުގެ ނިޔަލަށް ޖުމްލަ 7513 މީހަކަށް ވަނީ ކޮވިޑް ވެކްސިން ޖަހާފަ އެވެ. އޭގެ ތެރެއިން 306 މީހަކަށް ވަނީ ކޮވިޑް ވެކްސިންގެ އެއްވަނަ ޑޯޒް ޖަހާފަ އެވެ. އެއީ މާލެ ސަަހައްދުން 240 މިހަކާއި އަތޮޅުތެރެއިން 66 މީހެކެވެ.
