ކޮވިޑާ ގުޅިގެން އަވަށްޓެރި ސްރީލަންކާގައި އަޅާފައިވާ ފިޔަވަޅުތަކަށް ގިނަ ދުވަސްތަކަކަށްފަހު ލުއިތައް ދީފައިވީ ނަމަވެސް، ދިވެހިންގެ މެދުގައި އެންމެ މަގުބޫލު މަންޒިލަށް ކުރިއަށް މިއޮތް އީދު ބަންދަށް މާބޮޑު ޑިމާންޑެއް ނެތެވެ.
ލަންކާ އިން ދިން ލުއިތަކުގެ ތެރޭގައި ވެކްސިން ފުރިހަަމަކޮށް 14 ދުވަސް ވެފައިވާ މީހުން ކަރަންޓީނުވާންޖެހޭ މުއްދަތު ވަނީ އެންމެ ދުވަހަކަށް މަދުކޮށްފަ އެވެ.
ނަމަވެސް، ލަންކާގެ ގައުމީ އެއާލައިންގެ ރާއްޖޭގެ އޭޖެންޓު އިނާ މޯލްޑިވްސްގެ މެނޭޖިން ޑިރެކްޓަރު މުހައްމަދު ފިރާގު ވިދާޅުވީ ކުރިއަށް އޮތް އީދު ބަންދުގައި ލަންކާއަށް ދާން ދިވެހިންގެ ޑިމާންޑު ވަރަށް ކުޑަ ކަމަށެވެ.
އެގޮތުން، ކޮންމެ ދުވަހަކު ސްރީލަންކަންގެ ފްލައިޓެއް އޮޕަރޭޓް ކުރަމުންދިޔަ ނަމަވެސް، ދަތުރުކުރާ މީހުންގެ އަދަދު މަދު ކަމުން ކުރިން ގާތްގަނޑަކަށް 200 ޑޮލަރަށް ހުރި ލަންކާއަށް ދެކޮޅު ޓިކެޓެއްގެ އަގު މިހާރު 650 އެމެރިކާ ޑޮލަރަށް އަރާފައިވާ ކަމަށެވެ.
"ފްލައިޓެއް އޮޕަރޭޓުކުރަން ބޮޑެތި ހަރަދުތައް ހިނގާއިރު، މިކޮޅުން އެބަދޭ އެންމެ ނުވަ މީހުން. ގިނަވެގެން ވެސް މިއުޅެނީ 20-25 ވަރަކަށް މީހުން،" ފިރާގު ވިދާޅުވި އެވެ.
އޭނާ ވިދާޅުވި ގޮތުގައި މި ވަގުތު ލަންކާއަށް ދަނީ، ގިނަ ދުވަހު އާއިލާ ކައިރިއަށް ނުދެވި ތިބި މީހުންނާއި، ވިސާ ޖެއްސުން ފަދަ ކަންކަމުގައި ދާ މީހުން ކަމަށެވެ.
"ލަންކާއަށް އިމްޕޯޓުގެ ތާއްޓެއްވެސް އުޅޭތީ ޝޮޕިން ކަހަލަ ކަމެއް ވެސް ނެތް އެކޮޅުގަ މާބޮޑަކަށް. ދެން [ޑިމާންޑް] ރަނގަޅުވާން ދުވަސްކޮޅެއް ނަގާނެ ކަމަށް އަޅުގަނޑުމެން މި ބަލަނީ،" އިތުރަށް ވިދާޅުވި އެވެ.
ކޮވިޑުގެ ހަތަރު ރާޅުން އަރައިގަނެ، ރާއްޖޭގައި ވެސް ކޭސްތަކުގެ އަދަދު ދަށްވާން ފެށުމާއެކު ގިނަ ލުއިތަކެއް ދީފައިވަނީ ސްކޫލުގެ ރަސްމީ ބަންދާއި އީދު ބަންދާ ވެސް ދިމާކޮށެވެ.
އީދު ބަންދާއި މިނިވަން ދުވަހާ ދިމާކޮށް އަންނަ ހުކުރުން ދުވަހުން ފެށިގެން 12 ދުވަސް ސަރުކާރު ބަންދު ކުރަން ވަނީ ނިންމައިފަ އެވެ.
ލަންކާއަށް ޑިމާންޑެއް ނެތަސް، މިފަހަރުގެ އީދު ބަންދަށް ރާއްޖޭން ބޭރަށްދާ ދިވެހިންގެ އަމާޒު ބޮޑަށް ހުރީ ތުރުކީގެ އިތުރުން ދުބާއީ އަށް ކަމަށް ފިރާގު ވިދާޅުވި އެވެ.
"މިފަހަރު އެންމެ ބާރު ބޮޑުކޮށް އުޅެނީ ތުރުކީ އާއި ދުބާއީ. ދުބާއީ މަގުން ވެސް ތުރުކީއަށް އެބަދޭ ވަރަށް ގިނަ މީހުން. މިހާރު ވެސް މިކޮޅުން ގާތްގަނޑަކަށް 90 ޕަސަންޓް ފުލްކޮށް އެބަދޭ އެތަންތަނަށް،" އޭނާ ވިދާޅުވި އެވެ.
ރާއްޖޭން ބޭރަށް ދާ ދިވެހިންގެ އިތުރުން، ކުރިއަށް އޮތް ބޮޑު ޗުއްޓީއާ ދިމާކޮށް ރާއްޖޭގެ ހުރިހާ ސަރަހައްދަކަށް ވެސް ދަތުރު ކުރާ މީހުންގެ އަދަދު ބޮޑުތަން އިތުރުވެ ޓިކެޓްތަކުގެ ބާރު ވަނީ ބޮޑުވެފަ އެވެ.
އެއާއެކު މާލޭން އަތޮޅު ތެރެއަށް ދަތުރު ކުރާ މީހުންގެ އަދަދު ވަރަށް ބޮޑަށް އިތުރުވެފައިވާއިރު، ޗުއްޓީ އަށް ތަންތަނަށް ދަތުރުކުރާއިރު އަދި އީދުގެ ހަރަކާތްތައް ކުރިއަށް ގެންދިއުމުގައި ހާއްސަ ސަމާލުކަމެއް ދިނުމަށް އެޗްޕީއޭ އިން ވަނީ އެދިފަ އެވެ.
އެގޮތުން، ވައިގެ މަގުންނާއި ކަނޑު މަގުން ދަތުރުކުރާއިރު، ރަނގަޅަށް މާސްކް އަޅާ، ތިމާއާއި އެއްކޮށް ދިރިއުޅޭ މީހުން ފިޔަވައި އެހެންމީހުންނާ މަދުވެގެން ތިން ފޫޓުގެ ގައިދުރުމިން ބެހެއްޓުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
އަދި މީހުން ދިރިއުޅޭ ހުރިހާ ރަށެއްގައިވެސް އާއްމު ތަންތަނުގައި އުޅޭއިރު އަދި އެކި ހިދުމަތްތައް ހޯދަން ދިއުމުގައި ނޭފަތާއި އަނގަ ރަނގަޅަށް ފޮރުވޭގޮތަށް މާސްކު އެޅުމަށް ވެސް ހަނދާކޮށްދީފައި ވެ އެވެ.
އޭގެ އިތުރުން، އެޗްޕީއޭއިން ބުނީ އީދު ފާހަގަކުރުމަށްވެސް ގިނަ މީހުން އެއްވެ ނޫޅެވޭ ފަދަ ހަރަކާތްތައް އިހުތިޔާރުކުރުމާއެކު، އެއް ރަށުން އަނެއް ރަށަށް މީހުން އައިސްގެން ބާއްވާ ހަރަކާތްތަކާއި ކުޅިވަރު މުބާރާތްތައް ނުބޭއްވުމަށް އިލްތިމާސްކުރާ ކަމަށެވެ.
އަދި ކަރަންޓީނުގައި ތިބެންޖެހޭ ފަރާތްތަކުން ކަރަންޓީނު އުސޫލުތަކަށް ފުރިހަމައަށް އަމަލުކުރުމުގެ އިތުރުން، ބަލީގެ އެއްވެސް އަލާމާތެއް ފެނިއްޖެނަމަ ލަސްނުކޮށް ފްލޫ ކްލިނިކަށް ދައްކާ ޓެސްޓުކުރަން ވެސް އެޗްޕީއޭއިން ވަނީ އިލްތިމާސްކޮށްފަ އެވެ.
