ވާޖިން ގެލެކްޓިކްގެ ހާއްސަ އުޅަނދެއްގައި އިނގިރޭސި ބިލިއަނަރު ރިޗަޑް ބްރެންސަން ޖައްވަށް ހިނގައްޖެ އެވެ.
ބްރެންސަން އާއި ކްރޫ މެމްބަރުން ގޮވައިގެން ނިއު މެކްސިކޯގެ ސްޕޭސް ޕޯޓުން ދަތުރު ފެށީ އެ ތަނުގެ ގަޑިން އާދީއްތަ ދުވަހު ހެނދުނު 08:40 ގަ އެވެ.
އެ ދަތުރުގައި 50،000 ފޫޓު މައްޗަށް ވާޖިން ގެލެކްޓިކްގެ އުޅަނދު އެރި އެވެ. އެއަށްފަހު އެ "މަދާޝިޕުން" ވައްޓާލީ ރޮކެޓުން ބާރު ދީފައިވާ ޖައްވީ އުޅަނދެކެވެ.
އެ އުޅަނދަށް ދީފައިވާ ނަމަކީ "ވީއެސްއެސް ޔުނިޓީ" އެވެ. އެ ހިސާބުން ބްރެންސަން އާއި އިތުރު ތިން ޕަސެންޖަރުން އަދި ދެ ޕައިލެޓުން ދަތުރުގެ ބާކީ ބައި ފުރިހަމަ ކުރީ އެ އުޅަނދު ގަ އެވެ.
ދުނިޔެއަށް ދަމާ ގްރެވިޓީގެ ބާރު ކެނޑޭ ހިސާބަށް ދެވުމާއެކު ޕަސަންޖަރުން ސީޓު ބެލްޓު ނައްޓާލާއި، ކުޑައިރުކޮޅަކަށް އެކަން ތަޖުރިބާ ކުރަން ލިބުނެވެ.
އޭގެ އިތުރުން ޖައްވީ އުޅަނދުގައިވާ 17 ކުޑަ ދޮރުގެ އެހީގައި ދުނިޔެ ވަށްބުރެއް ހެން އޮންނަ މަންޒަރު ބަލާލުމުގެ ފުރުސަތު ވެސް އެ މީހުންނަށް ލިބުނެވެ.
ބްރެންސަން މަސައްކަތް ކުރީ ބިލިއަނަރުންގެ ޖައްވީ ރޭހުން އެއް ވަނަ ހޯދުމަށެވެ. އެގޮތުން އެމޭޒަންގެ ފައުންޑަރު ޖެފް ބެޒޯސް ވެސް މި މަހު ޖައްވަށް ދާނެ ކަމަށް ބުނެފައި ވެ އެވެ.
ނަމަވެސް އޭގެ ކުރިން ބްރެންސަން މިކަން ހާސިލް ކުރުމުން ރޭހުގެ ކުރި އޭނާއަށް ލިބުނީ އެވެ. ބްރެންސަން އާއި ބެޒޯސްގެ އިތުރުން ބިލިއަނަރު އިލޯން މަސްކް ވެސް އަންނަނީ ޖައްވަށް ދާން ތައްޔާރުވަމުންނެވެ.
އޭނާ އާއި ބްރެންސަން އެކުގައި ހުރި ފޮޓޯއެއް ބްރެންސަން ވަނީ އާއްމުކޮށްފަ އެވެ. މަސްކް ވަނީ ބްރެންސަންގެ ޖައްވީ މިޝަނަށް ތާއީދު ކުރާ ކަމަށް ބުނެފަ އެވެ.
މީގެ ކުރިން 2000 ގެ އަހަރުތަކުގައި ރަޝިއާގެ ރޮކެޓުތަކުގައި ބައެއް ފަތުރުވެރިން ޖައްވަށް ގޮސް، އިންޓަނޭޝަނަލް ސްޕޭސް ސްޓޭޝަން ބަލާލާފައި ވެ އެވެ.
ބްރެންސަން މަސައްކަތް ކުރަނީ މި ދަތުރުގައި އޭނާއަށް ކުރެވޭ ތަޖުރިބާގެ ބޭނުން ހިފައި، ފަތުރުވެރިން ޖައްވަށް ގެންދާނެ ގޮތުގެ ފުރިހަމަ ވިޔަފާރިއެއް ފެށުމަށެވެ.
