ޔޫރޯ ފުޓްބޯޅަ މުބާރާތުގެ ފައިނަލުގައި މިރޭ އިޓަލީން ނޫ ޖާޒީގައި ކުޅޭއިރު އިންގްލެންޑް ކުޅޭނީ ހުދު ޖާޒީގައި ކަމަށް ޔުއެފާއާ ހަވާލާދީ މީޑިއާ ރިޕޯޓްތައް ބުނެފި އެވެ.
މިރޭގެ މެޗު އިންގްލެންޑުގެ ވެރިރަށް ލަންޑަނުގައި ކުޅުނު ނަމަވެސް ހޯމް ޓީމަކީ އިޓަލީ އެވެ. އެއީ ގުރުނެގިއިރު، ފައިނަލުގެ ހޯމް ޓީމަކަށް ވާ ގޮތަށް އޮތީ ފުރަތަމަ ސެމީން މޮޅުވި ޓީމަށް ވާތީ އެވެ.
އެހެންވެ ބޭނުން ކުލައެއް އިހުތިޔާރުކުރުމުގެ ފުރުސަތު ލިބުނީ އިޓަލީ އަށެވެ. އެ ޓީމު ކުޅޭނީ ޖޫ ޖާޒީ މަތިން ލައި ހުދު ސޯޓު އަދި ނޫ އިސްޓާކީނުގަ އެވެ. މިއީ އެ ޓީމުގެ ރަސްމީ ކުލަތަކެވެ. އިޓަލީގެ ގޯލްކީޕަރުން ލާނީ ރީނދޫ ޖާޒީ އެވެ. އެ ކިޓުގައި މި ފަހަރު އިޓަލީ ކުޅުނު ހަމައެކަނި މެޗުން ގްރޫޕް ސްޓޭޖުގައި ވޭލްސް އަތުން 1-0 އިން މޮޅުވީ އެވެ.
އިޓަލީން ގްރޫޕް ސްޓޭޖުގައި ތުރުކީ އަތުން 3-0 އިން އަދި ކުއާޓާ ފައިނަލުން ބެލްޖިއަމް އަތުން 2-1 އިން މޮޅުވިއިރު ލީ ފުލް ހުދު ކިޓެވެ. އަދި ގްރޫޕް ސްޓޭޖުގައި ސްވިޒަލެންޑް އަތުން 3-0 އިން، ދެ ވަނަ ބުރުގައި އޮސްޓްރިއާ އަތުން 2-1 އިން އަދި ސެމީ ފައިނަލުން ސްޕެއިން އަތުން ޕެނަލްޓީ ޖަހައިގެން 4-2 އިން މޮޅުވިއިރު ލީ ފުލް ނޫ ޖާޒީ އެވެ.
އަވޭ ޓީމަށް އިންގްލެންޑްވީ ނަމަވެސް، އިޓަލީގެ ކުލަތަކަކާ އެ ޓީމުގެ ހޯމް ޖާޒީ ކުލައިގެ ގޮތުން ތަފާތުވުމުން އެ ޓީމަށް ވެސް ހޯމް ޖާޒީ ލުބުމުގެ ފުރުސަތު ލިބުނީ އެވެ. އިންގްލެންޑް ލާނީ ހުދު ޖާޒީ އާއި ގަދަ ނޫކުލައިގެ ސޯޓު އަދި ހުދު އިސްޓާކީނެވެ. ގޯލްކީޕަރުން ލާނީ ފެހި ކުލަ އެވެ. އިންގްލެންޑުން ކުއާޓާ ފައިނަލުން ޔޫކްރޭން އަތުން 4-0 އިން އަދި ސެމީ ފައިނަލުން ޑެންމާކް އަތުން 2-1 އިން މޮޅުވީ އެ ކިޓުގަ އެވެ. ކުރީ ހަތަރު މެޗުގައި އިންގްލެންޑް ލީ މުޅިން ހުދެވެ.
ރިޕޯޓްތައް ބުނާ ގޮތުގައި އިންގްލެންޑް ބައެއް ސަޕޯޓަރުން ވަނީ އެ ޓީމަށް މިހާތަނަށް ލިބުނު ހަމައެކަނި ތަށި ކަމަށްވާ 1966 ގެ ވޯލްޑް ކަޕް ކާމިޔާބުކުރިއިރު ފައިނަލުގައި ބޭނުންކުރި ރަތްޖާޒީ ބޭނުން ކުރަން ގޮވާލައިފަ އެވެ. އެކަމަކު އިންގްލެންޑުގެ މި އަހަރުގެ ކިޓްބައިގައި ރަތް ނުހިމެނެ އެވެ.
ޒަމާނީ ކިޓްތައް ބޭނުން ކުރި ފަހުން އިޓަލީ ހޯދި ތަށިތަކުގެ ތެރެއިން 1968 ގެ ޔޫރޯ އަދި 1982 ގެ ވޯލްޑް ކަޕް ކާމިޔާބުކުރިއިރު ލީ ނޫ ޖާޒީ، ހުދު ސޯޓް އަދި ނޫ އިސްޓާކީނެވެ. އެ ޓީމު 1970 އާއި 1994 ގެ ވޯލްޑް ކަޕް އަދި 2012 ގެ ޔޫރޯ ފައިނަލުން ބަލިވިއިރު ބޭނުންކުރީ ވެސް އެ ކިޓެވެ. އެކަމަކު 2000 ގެ ޔޫރޯ ފައިނަލުން ބަލިވިއިރު ބޭނުންކުރީ ފުލް ހުދު ކިޓެވެ.
