ނިއު ދިއްލީ، އިންޑިއާ (ޖުލައި 9) - އިންޑިއާގެ ދެކުނު ކެރަލާ ސްޓޭޓުން ޒިކާ ވައިރަހުގެ ކޭސްއެއް ފެނުނުކަން ޔަގީންވުމާއެކު އެ ސްޓޭޓް އެލާޓަށް ގެނެސްފި އެވެ.
ސްޓޭޓް ހެލްތު މިނިސްޓަރު ވީނާ ޖޯޖް އޭއެފްޕީއަށް ވިދާޅުވީ އެއް ކޭސް ޔަގީންވެފައި ވާއިރު، ޝައްކު ކުރެވޭ އިތުރު 13 ކޭސްގެ ތަހުލީލުތައް ކުރަމުންދާ ކަމަށެވެ.
ޔަގީންވެފައިވާ ކޭސްގައި ހިމެނެނީ އުމުރުން 24 އަހަރުގެ މާބަނޑު އަންހެނެކެވެ. މަދިރީގެ ޒަރިއްޔާއިން ފެތުރޭ މި ބަލީގެ ސަބަބުން އޭނާއަށް ދަނީ ޓްރިވެންޑްރަމް ސިޓީ ހޮސްޕިޓަލެއްގައި ފަރުވާ ދެމުންނެވެ.
މި ބަލި އެންމެ ނުރައްކާ ވަނީ މާބަނޑު އަންހެނުންނަށެވެ. އެއީ ބަނޑުގައި އޮންނަ ދަރިފުޅަށް ވައިރަސް ވާސިލްވެ، ތުއްތު ދަރިފުޅަށް އެކި ކަހަލަ ބޮޑެތި މައްސަލަތަކާ ދިމާވާތީ އެވެ.
ޒިކާ ވައިރަސް އާއްމު ގޮތެއްގައި ފެތުރެނީ އީޑީޒް މަދިރި ހެފުމުންނެވެ. ނަމަވެސް މި ވައިރަހަކީ ޖިންސީ ގުޅުމުން ވެސް ގައިން ގަޔަށް އަރާ ބައްޔެއް ކަމަށް އެމެރިކާގެ ސެންޓާޒް ފޯ ޑިޒީޒް ކޮންޓްރޯލް އެންޑް ޕްރިވެންޝަނުން ބުނެ އެވެ.
މި ވައިރަސް އެންމެ ފުރަތަމަ ފެނިފައި ވަނީ 1947 ގައި ޔުގެންޑާގެ ޒިކާ ޖަންގަލީގައި އުޅޭ ރާމާމަކުނުތަކެއްގެ ގައިންނެވެ. މި ވައިރަހާ ދެކޮޅަށް އެއްވެސް ވެކްސިނެއް އަދި ބޭހެއް ވެސް ހޯދިފައެއް ނުވެ އެވެ.
ބަލީގެ އަލާމާތްތަކުގެ ތެރޭގައި ހުން އައުމާއި، ހަމުގައި ލައްތަކެއް ނެގުމާއި، ލޮލު ރޯގާ ޖެހުމާއި، މަސްތަކާއި ހުޅުތަކުގައި ރިއްސުން ހިމެނެ އެވެ. ނަމަވެސް މި ބަލީގައި މަރުވަނީ މަދު ފަހަރަކު އެވެ.
މީގެ ކުރިން 2017 އަދި 2018 ގައި އިންޑިއާގެ ގުޖަރާތު އަދި ރާޖަސްތާން އަދި މަދްޔަ ޕްރަދޭޝްގައި ވެސް މި ބަލި ފެތުރިފައި ވެ އެވެ.
