އދ.ގެ އާއްމު މަޖިލީހުގެ ރައީސްކަމަށް ފޮރިން މިނިސްޓަރު އަބްދުﷲ ޝާހިދު ހޮވިވަޑައިގަތުމަކީ ވަރަށް ބޮޑު ޝަރަފަކާއި ފަހުރެއް ކަމަށާއި އޭގެއިން ދައްކުވައިދެނީ ހާރިޖީ ދާއިރާގެ މަސައްކަތް ބޭރު ދުނިޔެ ބަލައިގެންފައިވުން ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ޝާހިދަށް ހޯއްދެވި ކާމިޔާބީއަށް މަރުހަބާ ދަންނަވަން ރައީސް މިއަދު ވަނީ ބައްދަލުކުރަައްވައިފަ އެވެ.
ރައީސް ވިދާޅުވި ގޮތުގައި ފޮރިން މިނިސްޓަރަކަށް ހުންނަވައި ޝާހިދު ގެންދަވަނީ ރާއްޖޭގެ ހާރިޖީ ސިޔާސަތު ވަރަށް ފުރިހަމައަށް ތަންފީޒު ކުރައްވަމުންނެވެ. އޭނާ މިހާރު ހުންނެވި މަގާމާ އެކު ކުރައްވާ މަސައްކަތުން ރާއްޖެއަށް ބައިނަލްގުވާމީ މައިދާނުގައި އިތުރު ކުރިއެރުންތަކެއް ލިބިވަޑައިގަންނަވާނެ ކަމަށް ވެސް ވިދާޅުވި އެވެ.
ޝާހިދުގެ ވާހަކައިގައި، އދ.ގެ އާއްމު މަޖިލީހަށް ވާދަކުރެއްވުމުގެ ފުރުސަތު ދެއްވީތީ ޝުކުރުއަދާކުރެއްވި އެވެ. އަދި އިންތިހާބު ކާމިޔާބުކޮށްދެއްވަން އިސްނަންގަވައި ރައީސްކޮށްދެއްވި މަސައްކަތްތައް ވެސް ފާހަގަކުރެއްވި އެވެ.
އޭނާ ވިދާޅުވި ގޮތުގައި މި ވެރިކަން ފެށުމުގެ ކުރިން ބައިނަލްއަގުވާމީ މައިދާނުގައި ރާއްޖެ އޮތީ ވަރަށް ނިކަމެތި ހާލަތުގަ އެވެ. ރާއްޖެއަށް މިފަހަރު ކާމިޔާބީ ލިބުނީ ރައީސް ސޯލިހް ވެރިކަމަށް ވަޑައިގެން ބައިނަލްއަގުވާމީ މުޖުތަމައާއި އަލުން ގުޅުން ބަދަހި ކުރައްވައި ބައިނަލްއަގުވާމީ ދުނިޔޭގެ އިތުބާރު ހޯއްދަވައި ކުރެއްވި މަސައްކަތުން ކަަމަށް ވިދާޅުވި އެވެ.
ޝާހިދު ވިދާޅުވި ގޮތުގައި މި ކާމިޔާބީއަކީ 1965 ގައި ރާއްޖެ މިނިވަން ދައުލަތެއްގެ ގޮތުގައި ގާއިމްވުމަށް ފަހު ހާރިޖީ ދާއިރާއިން ލިބުނު އެންމެ ބޮޑު އެއް ކާމިޔާބީ އެވެ. އާއްމު މަޖިލީހުގެ ރައީސްގެ ހައިސިއްޔަތުންނާއި ފޮރިން މިނިސްޓަރުގެ ހައިސިއްޔަތުން ރާއްޖެ އަށް އިތުރު ފުރުސަތުތަކެއް ފަހިކޮށްދެއްވައި ކުރިއެރުން ގެނެސްދެއްވަން އެމަނިކުފާނު މަސައްކަތްކޮށްދެއްވާނެ ކަަމަށް ވިދާޅުވި އެވެ.
