މޮސްކޯ، ރަޝިއާ (ޖުލައި 6) - ރަޝިއާގެ އިރުމަތިން 28 މީހުންނާއެކު ދަތުރު ކުރަމުން ދިޔަ މަތިންދާބޯޓެއް ގެއްލިގެން ހޯދަން ފަށައިފި އެވެ.
އިންޓަފެކްސް، އާރްއައިއޭ ނޮވޮސްޓީ އަދި ޓަސް އެޖެންސީން އޮފިޝަލުންނާ ހަވާލަދީ ހަބަރު ފެތުރި ގޮތުގައި އޭއެން-26 ބޯޓު ދަތުރު ކުރަމުން ދިޔައީ ޕެޓްރޮޕަވްލޮސްކް-ކަމްޗަޓްސްކީން ޕަލާނާ އަށެވެ.
ޝެޑިއުލްކޮށްފައިވާ "ކޯލް އިން" އަކަށް ބޯޓުން ޖަވާބުދީފައި ނުވާއިރު، އޭގައި ދަތުރު ކުރަމުން ދިޔަ 28 މީހުންގެ ތެރޭގައި ހިމެނެނީ ހަ ކްރޫ މެމްބަރުންނެވެ. އޭގެ އިތުރުން ބައެއް ކުޑަކުދިން ތިބި ކަމަށް ވެސް ރިޕޯޓުތައް ބުނެ އެވެ.
ބޯޓަށް ވީ ގޮތަކާ މެދު އެކި ރިޕޯޓުތައް ނޫސްތަކުން ދަނީ ފަތުރަމުންނެވެ. އެގޮތުން ޓަސް ނިއުސް އެޖެންސީން ބުނީ ކަނޑަށް ވެއްޓިފައިވުމަކީ އެކަށީގެންވާ ކަމެއް ކަމަށެވެ.
ނަމަވެސް އިންޓަފެކްސް ނިއުސް އެޖެންސީން ބުނީ ޕަލާނާ އަވަށް ކައިރީގައިވާ ކޯލް މައިނަކާ ހިސާބުން ބޯޓު ވެއްޓިފައިވާ ކަމަށް ބެލެވޭ ކަމަށެވެ.
ބޯޓު ހޯދަން ރެސްކިއު އޮޕަރޭޝަން ފަށާފައި ވާއިރު އެ މަސައްކަތުގައި ދެ ހެލިކޮޕްޓަރު ދަނީ ބޭނުން ކުރަމުންނެވެ.
ރަޝިއާއަކީ މީގެ ކުރިން ވައިގެ ގިނަ ހާދިސާތަކެއް ހިނގާ ގައުމެއް ނަމަވެސް ފަހަކަށް އައިސް އެގައުމުގެ އެއާ ޓްރެފިކް ސޭފްޓީ ވަނީ ރަނގަޅުކޮށްފަ އެވެ.
ނަމަވެސް ވައިގެ އުޅަނދުތައް ރަނގަޅަށް މެއިންޓެއިން ނުކުރުމާއި ރައްކާތެރިކަމުގެ ގަވާއިދުތަކަށް ފުރިހަމައަށް އަމަލު ނުކުރާތީ އަދިވެސް ބައެއް ހާދިސާތައް ހިނގަ އެވެ.
އެގޮތުން މޭ 2019 ގައި އެއިރޮފްލޮޓްގެ ސުކޮއި ސުޕަޖެޓެއް މޮސްކޯ އެއާޕޯޓަށް ޖައްސަށް އުޅުމުގެ ތެރޭގައި ވެއްޓި، އަލިފާން ރޯވެ 41 މީހުން މަރުވި އެވެ.
