ލަންޑަން، އިނގިރޭސި ވިލާތް (ޖުލައި 5) - ކޮވިޑް ކޮންޓްރޯލް ކުރަން އިނގިރޭސި ވިލާތުގައި އަޅާފައިވާ ފިޔަވަޅުތަކަށް ލުއި ދޭނެ ގޮތުގެ ތަފްސީލް މިއަދު އާއްމު ކުރަން ތައްޔާރުވެފައި ވާއިރު، ވައިރަހާއެކު "ދިރިއުޅެން ދަސްކުރަން" ބޮޑު ވަޒީރު ބޮރިސް ޖޯންސަން ރައްޔިތުންނަށް ގޮވާލައްވައިފި އެވެ.
އިނގިރޭސި ސަރުކާރުން އެންމެ ފުރަތަމަ މަސައްކަތް ކުރީ ޖޫން 21 ވަނަ ދުވަހު ހުރިހާ ފިޔަވަޅުތަކެއް އުވާލުމަށެވެ. ނަމަވެސް އިންޑިއާއިން ފެނި، ގިނަ ގައުމުތަކަކަށް މިހާރު ފެތުރިފައިވާ ޑެލްޓާ ވޭރިއެންޓާ ހެދި އެ ތާރީހު ފަސްކުރަން ޖެހުނީ ޖުލައި 19 އަށެވެ.
އިނގިރޭސި ވިލާތުން މިހާރު ފެންނަ ހުރިހާ ކޭސްއެއް ވެސް ގުޅިފައިވަނީ ޑެލްޓާ ވޭރިއެންޓާ އެވެ. ޖުލައި 19 ގައި ދޭން ހަމަޖެހިފައިވާ ލުއިތަކާ ގުޅޭ ގޮތުން ބޮރިސް މިއަދު ޕްރެސް ކޮންފެރެންސް ބާއްވަވާނެ އެވެ. އަދި ހެލްތު މިނިސްޓަރު ސާޖިދު ޖާވިދު ޕާލިމެންޓުގައި ތަފްސީލް ހިއްސާ ކުރައްވާނެ އެވެ.
ޔޫރަޕްގައި ރަޝިއާއަށް ފަހު ކޮވިޑު ޖެހިގެން އެންމެ ގިނަ މީހުން މަރުވެފައިވަނީ އިނގިރޭސި ވިލާތުންނެވެ. އެ ގައުމުން މަރުވި މީހުންގެ ޖުމްލަ އަދަދު 128،000 އަށް ވުރެ އިތުރެވެ. އިނގިރޭސި ވިލާތުން މިހާރު ލުއި ދޭން މަސައްކަތް ކުރަނީ ތިން ވަނަ ލޮކްޑައުނަށެވެ.
ބޮޑު ވަޒީރުގެ އޮފީހުން ބުނީ އެންމެ ފަހުގެ ތަފާސްހިސާބަށް ބަލާއިރު ލުއި ދިނުމާއެކު ވެސް ކޭސްތައް އިތުރުވާނެ ކަމަށެވެ. ނަމަވެސް ވެކްސިން ޕްރޮގްރާމްގެ ސަބަބުން "ހޮސްޕިޓަލުގައި އެޑްމިޓު ކުރަން ޖެހުމާއި މަރުވުން" މަދުވެފައިވާ ކަމަށް ވެސް ބުންޏެވެ.
އިނގިރޭސި ވިލާތުގެ ވެކްސިން ޕްރޮގްރާމް ފެށީ މިދިޔަ ޑިސެމްބަރު މަހު އެވެ. އެ ގައުމުގެ އުމުރުން 18 އަހަރުން މަތީގެ މީހުންގެ އާބާދީގެ ގާތްގަނޑަކަށް 64 ޕަސެންޓު މިހާރު ވަނީ ވެކްސިން ފުރިހަމަކޮށްފަ އެވެ.
