ދެކުނު އޭޝިއާއިން މި ހަފުތާގައި އަންނަ ވޯކް ޕާމިޓް ހޯލްޑަރުން ރާއްޖޭގައި ކަރަންޓީނު ވާން ކުރަންޖެހޭ ހަރަދުތައް ކުރަން ޖެހޭނީ އަމިއްލަ ޖީބުން ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން މިއަދު ބުނެފި އެވެ.
ދެކުނު އޭޝިއާގައި ނުރައްކާތެރި މިންވަރަކަށް ކޮވިޑް ފެތުރޭތީ ދެކުނު އޭޝިއާ ގައުމުތަކުން ވޯކް ޕާމިޓް ހޯލްޑަރުން ރާއްޖެ އައުން މަނާކުރީ މެއި މަހުގެ ތެރޭގަ އެވެ. މިހާރު މި ގައުމުތަކުގައި ކޮވިޑް ފެތުރޭ މިންވަރު ކޮންމެވެސް ވަރަކަށް ކޮންޓްރޯލް ވެފައިވާތީ ސަރުކާރުން ވަނީ ރާއްޖެ އައިސް ކަރަންޓީނު ވާގޮތަށް އަލުން ހުއްދަ ދޭން ނިންމައިފަ އެވެ.
ހެލްތް މިނިސްޓްރީން އިއްޔެ ކުރި އިއުލާނެއްގައި ވަނީ ބިދޭސީން ކަރަންޓީނު ވާން ހޮޓާ އަދި ގެސްޓްހައުސް ހަމަޖައްސަން ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފަ އެވެ.
އަންނަ ބުދަދުވަހު ވޯކް ޕާމިޓް ހޯލްޑަރުން އަންނަން ފަށާއިރު، ކަރަންޓީނު ވާން ކުރަން ޖެހޭ ހަރަދުތައް އިނގޭނީ މި މަސައްކަތް ނިމުމުންނެވެ.
މިހާތަނަށް ބޭރު ގައުމުތަކުން އަންނަ ބިދޭސީން ކަރަންޓީނު ވާން ޖެހެނީ އެ މީހަކު އައިސް ދިރިއުޅޭ ތަނެއްގަ އެވެ. އެކަމަކު ކުރިން ވެސް އޭގެ ތެރެއިން ގިނަ ބަޔަކު ކަރަންޓީން ނުވެ ބޭރު ތެރޭގައި އުޅޭ ކަމުގެ ޝަކުވާތައް ލިބުނެވެ.
މައުލޫމާތު ލިބިފައިވާ ގޮތުގައި މިފަހަރު އުސޫލަށް ގެނައި ބަދަލަކީ މިކަންކަމަށް ރިއާޔަތްކޮށް ގެނައި ބަދަލެކެވެ.
