ކޮޓަބާޓޯ، ފިލިޕީންސް (ޖުލައި 5) - އާދީއްތަ ދުވަހުގެ މެންދުރު ފަހު ފިލިޕީންސްގައި އަސްކަރީ މަތިންދާބޯޓެއް ވެއްޓި 45 މީހުން މަރުވެއްޖެ އެވެ.
އޭގެ ތެރެއިން 42 މީހުންނަކީ ސިފައިންނެވެ. ބާކީ ތިން މީހުންނަކީ ބޯޓު ވެއްޓުނު ސަރަހައްދުގައި ތިބި އާއްމު ތިން މީހުންނެވެ.
ބޯޓު ވެއްޓިފައިވަނީ ދެކުނު ސޫލޫ ޕްރޮވިންސްގެ ޖޯލޯ އެއާޕޯޓުގެ ބޭރަށެވެ. ބޯޓު ވެއްޓެން ދިމާވި ސަބަބު އަދި ސާފެއް ނުވެ އެވެ.
ނަމަވެސް މަންޒަރު ދުށް މީހުން ބުނީ 96 މީހުންނާއެކު ދަތުރު ކުރި ބޯޓު ވެއްޓުނީ ރަންވޭގައި ޖައްސަން އުޅެ، އެކަން ކާމިޔާބު ނުވުމަށް ފަހު ކަމަށެވެ.
ޖޯލޯ އެއާޕޯޓުގެ ރަންވޭއަކީ ފިލިޕީންސްގެ އެހެން ރަންވޭތަކާ އަޅާ ބަލާއިރު ކުރު ރަންވޭއެކެވެ. އެހެންވެ، ރަންވޭގައި ނުޖެއްސި ހިނގައްޖެ ނަމަ ބޯޓު އެޖަސްޓު ކުރަން ޕައިލެޓުންނަށް އުނދަގޫ ވެ އެވެ.
ބޯޓު ވެއްޓުނު ސަރަހައްދުން ސިފައިން 49 މީހަކު ސަލާމަތްކޮށްފައި ވެ އެވެ. އޭގެ ތެރެއިން ގިނަ މީހުންނަކީ ވެއްޓުނު ބޯޓު ގޮވުމުގެ ކުރިން އޭގެން ފުއްމާލާ، ދުރަށް ދިޔަ މީހުންނެވެ.
ލޮކްހީޑް ސީ-130 ބޯޓަކީ މި އަހަރުގެ ކުރީކޮޅު ފިލިޕީންސްއަށް ހަދިޔާ ކުރި އެމެރިކާ އެއާފޯސް ވައިގެ ދެ އުޅަނދުގެ ތެރެއިން އެއް އުޅަނދެވެ.
ވެއްޓުނު އިރު އޭގައި ތިބި މީހުންނަކީ ދާދި ފަހުން ޓްރެއިނިން ފުރިހަމަ ކުރި 88 ސިފައިންނާއި، ތިން ޕައިލެޓުންނާއި ފަސް ކްރޫ މެމްބަރުންނެވެ.
ބޯޓު ދަތުރު ކުރަމުން ދިޔެއީ ދެކުނު ކަގާޔަން ޑެ އޯރޯ ސިޓީން ސޫލޫއަށް، އެ ތަނުގައި އުޅޭ އަބޫ ސައްޔާފް ޓެރަރިސްޓުންނާ ދެކޮޅަށް ހަނގުރާމަ ކުރުމަށެވެ.
