މިއުނިކް (ޖުލައި 3) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުން ޖެހިޖެހިިގެން ދެ ފަހަރު ކެޓުމާ އެކު ބެލްޖިއަމްގެ ކޯޗު ކަމުން ރޮބާޓޯ މާޓީނޭޒް ވަކިވުމުގެ ފުރުސަތު ބޮޑު ކަމަށް އެ ގައުމުގެ ނޫސްތަކުން ރިޕޯޓްކޮށްފި އެވެ.
މާކް ވިލްމޮޓްސްގެ ކޯޗުކަމުގައި 2016 ވަނަ އަހަރުގެ ޔޫރޯ އިން ބެލްޖިއަމް ކެޓީ ކުއާޓާ ފައިނަލްގައި ވޭލްސް އަތުންނެވެ. ބެލްޖިއަމްގެ ކޯޗުކަމާ މާޓީނޭޒް ހަވާލުވީ 2016 ވަނަ އަހަރުގެ ޔޫރޯ އަށް ފަހު އެވެ. މާޓީނޭޒްގެ ކޯޗުކަމުގައި ބެލްޖިއަމުން ވަނީ 2018 ވަނަ އަހަރުގެ ވޯލްޑް ކަޕްގެ ތިން ވަނަ ހޯދައިފަ އެވެ. އެކަމަކު ރޭ އިޓަލީ އަތުން 2-1 އިން ބަލިވެ، މީގެ ފަސް އަހަރު ކުރިން ވިލްމޮޓްސްގެ ކޯޗުކަމުގައި ބެލްޖިއަމް ޔޫރޯ އިން ކެޓި ހިސާބުން މި ފަހަރުގެ މުބާރާތުން ވެސް އެ ޓީމު ވަކިވާން ޖެހުނީ އެވެ.
ރޭގެ މެޗަށް ފަހު އޮތް ނޫސްވެރިންގެ ބައްދަލުވުމުގައި މާޓީނޭޒާ ވަނީ އޭނާގެ މުސްތަގުބަލާ ގުޅޭގޮތުން ގިނަ ސުވާލުތަކެއް ކުރިމަތިވެފަ އެވެ. އޭނާ ބުނީ މިއީ އެ ވާހަކަތައް ދައްކަން އެންމެ ރަނގަޅު ވަގުތު ނޫން ކަމަށެވެ.
"މި ވަގުތު މި މެޗު (އިޓަލީ މެޗު) ނޫން ވާހަކައެއް ދައްކަން އަހަންނަށް ވަރަށް އުނދަގޫ. ޖަޒުބާތުގައި ޖެހިގެން މި ވަގުތު ދައްކަން ނުޖެހޭ ވާހަކައެއް ދައްކަން ނެތިން،" މާޓީނޭޒް ބުންޏެެވެ.
އޭނާ ބުނީ މި ވަގުތަށް އެންމެ މުހިއްމީ މި މުބާރާތުގައި ކަންތައްތައް ދިޔަ ގޮތާ ބެހޭގޮތުން ރަނގަޅު ދިރާސާއެއް ހެދުން ކަމަށެވެ. މާޓީނޭޒް ބުނީ އޭނާގެ ނަޒަރުގައި އިޓަލީ އަށް މި މެޗުން މޮޅުވެވުނީ އެ ޓީމުން ގިނަ އަދަދެއްގެ މެޗުތަކަކުން ބަލިނުވެ އޮތްއިރު، ފުރިހަމަ މޮޅުވުމުގެ ރެކޯޑެއް ވެސް ދަމަހައްޓަމުން އައިސް ފުރަތަމަ ހާފުގައި ދެއްކި ތަފާތު ބޮޑުވުމުން ކަމަށެވެ.
ބެލްޖިއަމްގެ މީޑިއާ ރިޕޯޓްތައް ބުނާގޮތުން މާޓީނޭޒްގެ މުސްތަގުބަލާ ބެހޭގޮތުން ކުރިއަށް އޮތް ދުވަސްތަކުގެ ތެރޭގައި އޭނާއާ ބެލްޖިއަމް ފުޓްބޯޅަ ފެޑެރޭޝަނުން ވާހަކަ ދައްކާނެ އެވެ. ބެލްޖިއަމާ އެކު މާޓީނޭޒް ހަދާފައިވާ އެއްބަސްވުން އަންނަ އަހަރުގެ ވޯލްޑް ކަޕްގެ ނިޔަލަށް ހަމަވާގޮތަށް އޮތްކަމުގައި ވިޔަސް އޭގެ ކުރިން ވެސް އޭނާ މަގާމުން ވަކިވުމުގެ ފުރުސަތު އެބައޮތެވެ.
އޭގެ އެއް ސަބަބަކީ ބެލްޖިއަމްގައި މިހާރު އޮތް އެ ގައުމުގެ ފުޓްބޯޅައިގެ ރަން ޖީލުގެ ކުޅުންތެރިންގެ ތެރެއިން ގިނަ ކުޅުންތެރިންތަކެއް އަންނަ އަހަރުގެ ވޯލްޑް ކަޕަށް ފަހު ގައުމީ ޓީމަށް ކުޅުން ހުއްޓާލާނެ ކަމަށް ބެލެވޭއިރު، އެއީ ބޮޑު މުބާރާތެއް ކާމިޔާބުުރަން ބެލްޖިއަމަށް ލިބޭ ފަހު ފުރުސަތު ކަމަށްވާތީ އެވެ. އަދި ބައިނަލްއަގުވާމީ ފުޓްބޯޅައިގެ ތަޖުރިބާކާރު ކޯޗަކާ ޓީމު ހަވާލުކުރުމުގެ ވިސްނުން ވެސް ބެލްޖިއަމް ފުޓްބޯޅަ ފެޑެރޭޝަނުން ގެންގުޅޭތީ އެވެ.
މީގެ ކުރިން މާޓީނޭޒް ވަނީ ބެލްޖިއަމް އިން ވަކިވުމަށް ފަހު ކައިރި މުސްތަގުބަލެއްގައި ކްލަބް ފުޓްބޯޅަ އަށް އެނބުރި ދާން ޝައުގުވެރިކަން ހުރި ކަމަށް ބުނެފަ އެވެ. މާޓީނޭޒް ވަނީ އިނގިރޭސި ޕްރިމިއާ ލީގުގެ ސްވަންސީ ސިޓީ އާއި ވިގަން އެތުލެޓިކް އަދި އެވަޓަން އަށް ކޯޗުކޮށްދީފަ އެވެ.
