މި މަހު 25 އިން 29 އަށް އިންޑިއާގައި ކުރިއަށްދިޔަ އިންޓަ ސްޓޭޓްސް އެތުލެޓިކްސް ޗެމްޕިއަންޝިޕްގައި ރާއްޖޭގެ އަންހެން ރިލޭ ޓީމުގައި އިންޑިއާގެ އެތުލީޓަކު ހިމަނައިގެން ވާދަކޮށްފި އެވެ.
ސްޓޭޓް ޗެމްޕިއަންޝިޕްގައި ގިނަ ގައުމުތަކަކުން އެތުލީޓުން ވާދަކުރިއިރު، އަންހެނުންގެ ހަތަރެއް ގުނަ 100 ގެ ރިލޭގައި ރާއްޖޭގެ ޓީމުން ވާދަކުރީ އިންޑިއާ އެތުލީޓަކު ވެސް ޓީމުގައި ހިމަނައިގެންނެވެ.
އެތުލެޓިކްސް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ އަހްމަދު މުންތަގިމް، އިންޑިއާގައި ހުންނަވައި މިއަދު "އަދަދު" އަށް ވިދާޅުވީ އެ ގޮތަށް ކަންތައް ކުރަން ޖެހުނީ އެކި ސަބަބުތަކެއް ދިމާވެގެން ކަމަށެވެ. އެންމެ ފުރަތަމަ ކަމަކަށް ރާއްޖޭން މުބާރާތުގައި ވާދަކުރުމަށް ފުރަން ހަ ގަޑިއިރަށް ވެފައި ވަނިކޮށް ގައުމީ އެތުލެޓިކްސް ޓީމުގެ ޕީސީއާރް ޓެސްޓްތަކުގެ ނަތީޖާ ލިބުނުއިރު، އަންހެން ރިލޭ ޓީމުގެ އެއް އެތުލީޓަކު ކޮވިޑް-19 އަށް ޕޮޒިޓިވް ކަމަށެވެ. އަދި އަންހެން ރިލޭ ޓީމު ހަަމަވުމުގައި ވެސް ދަތިތަކެއް ކުރިމަތިވެ، ގޮތްތަކެއް ހޯދަން ޖެހުނީ ކަމަށް ވިދާޅުވި އެވެ.
"ދެން އަޅުގަނޑުމެން ކުޅުންތެރިންގެ ޕޭރެންޓުންނާ (ބެލެނިވެރިން) ވާހަކަ ދައްކައި އަދި ކުޅުންތެރިންނާ ވެސް ވާހަކަ ދައްކައި އެކި ގޮތްގޮތް ބެލިން. ދެން ވިސްނިން މުބާރާތުގައި ބައިވެރިނުކުރަން އެ އިވެންޓުގައި. އެކަމަކު ކުޅުންތެރިން ވެސް އިންޑިވިޖުއަލީ ވަރަށް މަސައްކަތްކޮށްގެން ޓާގެޓްތަކެއް ވެސް ހުރީމަ މި އިވެންޓްގައި ބައިވެރިވާން ބޭނުންވާތީ އާއި ޓެކްނިކަލީ މީގެ މިކްސް ޓީމެއް ގޮތަށް ބައިވެރިވެވޭނެ ގޮތެއް އޮތީމަ އެ ގޮތަށް (އިންޑިއާ އެތުލީޓަކު ލައިގެން) ވާދަކުރީ،" މުންތަގިމް ވިދާޅުވި އެވެ.
މި މުބާރާތުގައި ރާއްޖޭން ވާދަކުރި ރިލޭ ޓީމުގައި އިންޑިއާ އެތުލީޓަކު ހިމެނުމާ އެކު ދެން އެ ޓީމު ގުނާނީ ރާއްޖޭގެ ޓީމެއްގެ ގޮތުގެ ބަދަލުގައި މިކްސް ޓީމެއްގެ ގޮތުގައި ކަމަށް މުންތަގިމް ވިދާޅުވި އެވެ. އެހެންވުުމުން މީގެ ދުވާ ޓައިމިން އަށް ބަލައިގެން ރާއްޖޭގެ ގައުމީ ރެކޯޑަށް ބަދަލެއް ނާންނާނެ ކަމަށް އޭނާ ވިދާޅުވި އެވެ.
"މީގެ އިންޓަނޭޝަނަލް ފެޑެރޭޝަނުން ވެސް ބަލާ މިންގަނޑުތަކެއް ހުންނާނެ. އެހެންވެ، ޓެކްނިކަލީ ރާއްޖޭގެ ޓީމުގައި އިންޑިއާ އެތުލީޓަކު ހިމެނިގެން މި ދުވެގެން ހަގީގަތުގައި މި މުބާރާތުގައި ބައިވެރިވުމުގެ ފުރުސަތު ނުލިބުމަށް ވުރެ އެ ފުރުސަތު ބޭނުންކުރުން މި ވަގުތަށް ރަނގަޅު ކަމަށް ފެނިގެން އެގޮތަށް ކުރިއަށް ދިޔައީ،" މުންތަގިމް ވިދާޅުވި އެވެ.
"މި މުބާރާތުގައި އިންޑިއާގެ ގައުމީ ޓީމާއި އެހެން ގައުމުތަކުގެ ގައުމީ ޓީމުތަކުގެ އިތުރުން އިންޑިއާގެ ސްޓޭޓްތަކުގެ ޗެމްޕިއަން ޓީމުން ވެސް ބައިވެރިވި. އެ ފަދަ މުބާރާތެއްގައި ވާދަކުރަން ލިބުނު ފުރުސަތެއްގައި ފަހު ވަގުތު ދިމާވި ކަމެއްގެ ސަބަބުން (ރިލޭ) ޓީމަށް މުޅި އިވެންޓް ގެއްލެން ބޭނުންނުވީ،"
ރާއްޖޭގެ ނަން ޖަހާފައިވާ ޖޯޒީއެއްގައި އިންޑިއާ އެތުލީޓަކު ދުވުމުން ގިނަ ބަޔަކު އެކަމާ އަންނަނީ ހިތްހަމަނުޖެހުން ފާޅުކުރަމުންނެވެ. މުންތަގިމް ވިދާޅުވީ ރިލޭގެ އެ އިވެންޓްގައި ދުވި އަންހެން ޓީމުން ބޭނުންކޮށްފައިވަނީ ރާއްޖޭން އާންމުކޮށް ބައިނަލްއަގުވާމީ މުބާރާތްތަކުގައި ލާ ޖޯޒީގެ ބަދަލުގައި ޕްރެކްޓިސް ކުރާއިރު ބޭނުންކުރާ ކިޓްގައި ކަމަށެވެ.
މީގެ ކުރިން ރާއްޖޭން މި މުބާރާތުގައި ވާދަކޮށްފައިވަނީ 2014 އާއި 2019 ވަނަ އަހަރުގަ އެވެ. މި ފަހަރުގެ މުބާރާތުގައި ރާއްޖޭގެ ފިރިހެން ރިލޭ ޓީމު ވެސް ވަނީ ވާދަކޮށްފަ އެވެ.
ބައިނަލްއަގުވާމީ މުބާރާތްތަކުގައި ވާދަކުރަން ރާއްޖެ ޓީމުގެ އެތުލީޓުންނަށް ޓްރެއިނިން ކޭމްޕްތައް ފުރިހަމަކުރުމުގެ ފުރުސަތު ވެސް އިންޑިއާ އިން ދެ އެވެ.
