އިންޑަސްޓްރިއަލް ވިލެޖް ހިމެނޭގޮތަށް މާލޭގެ އެކި ސަރަހައްދުތަކުން 450 އުޅަނދު ޕާކް ކުރާނެ ޖާގަ ކުއްޔަށް ދޫކުރަން މާލޭ ސިޓީ ކައުންސިލުން ނިންމައިފި އެވެ.
މާލޭގެ މޭޔަރު ޑރ. މުހައްމަދު މުއިއްޒު އިއްޔެ ބޭއްވި ނޫސްވެރިންގެ ބައްދަލުވުމުގައި ވިދާޅުވީ ޕާކިން ސްލޮޓްތަކެއް ކުއްޔަށް ދެނީ ދާއިމީ ޕާކިން އިމާރާތްތަކެއް ހެދެންދެން ވަގުތީ ގޮތުން ޕާކިންގެ މައްސަލައަށް ހައްލެއް ގެނައުމަށް ކަމަށެވެ. ކުއްޔަށް ދޭ ސްލޮޓްތަކަށް ކުރިމަތިލުމަށް އަންނަ ހަފުތާގައި ހުޅުވާލާނެ ކަމަށް އޭނާ ވިދާޅުވި އެވެ.
ކުއްޔަށް ދޫ ކުރަނީ 320 ކާރުގެ ޖާގަ އާއި 80 ވޭންގެ އިތުރުން 50 ޕިކަޕުގެ ޖާގަ އެވެ.
ނިމިދިޔަ ސިޓީ ކައުންސިލުން ވެސް ވަނީ މާލޭގައި ވަކި ޕާކިން ޒޯންތަކެއް ހަދައި އެތަންތަން ކުއްޔަށް ދޫކޮށްލަ އެވެ. އެއީ މުޅިން ވެސް ހަތަރު ފުރޮޅުލީ އުޅަނދުގެ ޒޯންތަކެވެ.
ޕާކިން ޒޯންތައް ހެދުމުގެ އިތުރުން މާލޭގެ އެކި ސަރަހައްދުތަކަށް ދޫކޮށްލާފައި ހުރި 177 ވެހިކަލް ނެގުމުގެ މަސައްކަތް ކުރަމުން އަންނަ ކަމަށް ވެސް މުއިއްޒު ވިދާޅުވި އެވެ.
ޕާކިން މައްސަލައިގެ އިތުރުން މާލެ ތެރޭގައި ގަރާޖުތަކާއި ވޯކްޝޮޕްތައް ހިންގާތީ އެކަމަށް ހައްލު ގެނައުމުގެ މަސައްކަތް ކުރަމުން އަންނަ ކަމަށް ވެސް މުއިއްޒު ވިދާޅުވި އެވެ.
މުއިއްޒު ވިދާޅުވީ މާލޭގައި މީހުން ދިރިއުޅޭ ސަރަހައްދުގައި ގަރާޖުތަކާއި ވޯކްޝޮޕްތައް ހުރުމުން މީހުންނަށް ދަތިތަކާ ކުރިމަތިވާ ކަމަށެވެ. ސިޓީ ކައުންސިލްގެ ވިސްނުމަކީ އެފަދަ މަސައްކަތްތަކަށް އިންޑަސްޓްރިއަލް ވިލެޖު ހަމަޖެއްސުން ކަމަށް މުއިއްޒު ވިދާޅުވި އެވެ.
"އެހެން ނަމަވެސް އަޅުގަނޑުމެން އެކަން ކުރާނީ މާލޭގެ ރައްޔިތުންގެ ހިޔާލު ހޯދުމަށް ފަހު ރައްޔިތުން އެގޮތަށް ބޭނުން ނަމަ،" މުއިއްޒު ވިދާޅުވި އެވެ.
އޭނާ ވިދާޅުވި ގޮތުގައި ގުދަނާއި ވޯކްޝޮޕާއި ގަރާޖުގެ ގޮތުގައި ހިންގާ 276 ތަނެއް ރަށުގެ ތެރޭގައި އެބަހުއްޓެވެ.
މާލޭގެ ތެރޭގައި ހިންގާ ގަރާޖުތައް މީހުން ދިރިއުޅޭ ސަރަހައްދުން ބޭރު ކުރުމަކީ މުނިސްޕަލްޓީގެ ޒަމާނުންސުރެން ދައްކަމުން އަންނަ ވާހަކަ އެކެވެ. މުއިއްޒުގެ ހައުސިން މިނިސްޓަރު ކަމުގައި ވެސް އެވާހަކަ ދެކެވުނެވެ.
