ތެހެރާން (ޖޫން 28) - ގައުމީ ޓީމަށް އެންމެ ގިނަ ގޯލު ޖަހައިދީގެން ދުނިޔޭގެ ފުޓްބޯޅައިގައި އީރާންގެ ކުރީގެ ފޯވާޑް އަލީ ދާއީ ހަދާފައިވާ ރެކޯޑާ ޕޯޗުގީސް ތަރި ކްރިސްޓިއާނޯ ރޮނާލްޑޯ ހަމަކުރި ފަހުން އަލީ ދާއީގެ ދެ ގޯލު މަދު ކަމަށް އޭނާ ބުނެފި އެވެ.
ރަސްމީ ރެކޯޑްތަކުން ފެންނަ ގޮތުގައި ރޮނާލްޑޯ އާއި އަލީ ދާއީ ކޮންމެ ކުޅުންތެރިއަކު މިހާރު ވަނީ ގައުމީ ޓީމަށް 109 ގޯލު ޖަހައިފަ އެވެ. މިހާރު އުމުރުން 52 އަހަރުގެ އަލީ ދާއީ ރެކޯޑް ހެދީ އީރާނަށް ކުޅެދިން 149 މެޗުން 109 ގޯލު ޖަހައިގެންނެެވެ. އުމުރުން 35 އަހަރުގެ ރޮނާލްޑޯ ރެކޯޑް ހެދީ 178 މެޗުން 109 ގޯލު ޖަހައިގެންނެވެ.
އަލީ ދާއީ ވަނީ އެންމެ ފުރަތަމަ ރޮނާލްޑޯ ރެކޯޑް ހެދުމާ އެކު އިންސްޓަގްރާމް އާއި ޓްވިޓާ މެދުވެރިކޮށް ރޮނާލްޑޯ އަށް މަރުހަބާ ކިޔައިފަ އެވެ. އެކަމަކު އީރާން ޓީމަށް 1998 އާއި 2006 ވަނަ އަހަރުގެ ވޯލްޑް ކަޕް ކުޅެދިން އަލީ ދާއީ ވަނީ ޖުމްލަ އަަދަދަށް ބަލާއިރު، އޭނާ އީރާން ޓީމަށް ޖެހި ދެ ގޯލު މަދު ކަމަށް ބުނެފަ އެވެ.
"ހަގީގަތުގައި އަހަރެން 111 ގޯލު ޖެހިން. އެކަމަކު އެއީ މިހާރު ދެއްކުން އެހާ މުހިއްމު ވާހަކައެއް ނޫން. މިހާރު ރޮނާލްޑޯ އެ ކުޅޭ ފެންވަރުގައި އޭނާ (އަހަންނަށް ވުރެ) އަދި ގިނަ ގޯލުތަކެއް ޖަހާނެ،" އަލީ ދާއީ އޭނާގެ ކޮލަމެއްގައި ލިޔެފައިވެ އެވެ.
އަލީ ދާއީގެ ޖުމްލަ އަދަދުގައި ހިމަނާފައިނުވާ އެ ދެ ގޯލަކީ އޭނާ 2002 ވަނަ އަހަރުގެ އޭޝިއަން ގޭމްސްގައި އަފްގާނިސްތާން ކޮޅަށް ޖެހި ދެ ގޯލެވެ. އޭޝިއަން ގޭމްސް އަކީ އޮލިމްޕިކްސްގެ ތެރެއިން ކުރިއަށްދާ މުބާރާތަކަށްވާތީ އެ މުބާރާތުގައި ޖަހާ ގޯލުތައް ފީފާ މެޗުތަކުގައި ޖަހާ ގޯލުތަކުގެ ތެރޭގައި ނުހިމެނޭނެ އެވެ.
ޔޫރޯ ފުޓްބޯޅަ މުބާރާތުގައި ރޭ ޕޯޗުގަލް އިން ބެލްޖިއަމާ ދެކޮޅަށް ކުޅުނު މެޗުގެ ކުރިން އަލީ ދާއީ ވަނީ ރޮނާލްޑޯ ރޭގެ މެޗުގައި ލަނޑު ޖެހުމުގެ ރެކޯޑް މުގުރާލުމުގެ ފުރުސަތު ބޮޑު ކަމަށް ބުނެފަ އެވެ. އެކަމަކު، ރޭގެ މެޗުން 1-0 އިން ބެލްޖިއަމް އަތުން ބަލިވެ ޕޯޗުގަލް ވަނީ މުބާރާތުން ކަޓައިފަ އެވެ. އަލީ ދާއީގެ ރެކޯޑް މުގުރާލަން ރޮނާލްޑޯ އަށް ދެން އޮތީ ކުރިއަށް އޮތް ވޯލްޑް ކަޕް ކޮލިފައިންގެ މެޗުތަކެވެ.
އަލީ ދާއީ ގައުމީ ޓީމަށް ޖެހި ގޯލުތަކުގެ ތެރޭގައި ރާއްޖެ އާއި ނޭޕާލް އަދި ސްރީ ލަންކާ ކޮޅަށް ޖެހި 17 ގޯލު ހިމެނެ އެވެ. އެންމެ ގިނައިން ޖެހީ ރާއްޖެ ކޮޅަށެވެ. އޭނާ ވަނީ ރާއްޖެ ކޮޅަށް ހަތަރު މެޗުން އަށް ގޯލު ޖަހައިފަ އެވެ. ނޭޕާލް ކޮޅަށް ހަތަރު ގޯލު ޖެހިއިރު، ލަންކާ ކޮޅަށް ވަނީ ފަސް ގޯލު ޖަހައިފަ އެވެ.
