ރިޔާދް، ސައުދީ އަރަބިއްޔާ (ޖޫން 27) - ރަތް ކަނޑުގެ ޖިއްދާ ބަނދަރުން ސައުދީ އަރަބިއްޔާއަށް އެތެރެ ކުރަން އުޅުނު މަސްތުވާ ބޭހެއް ކަމަށްވާ އެމްފެޓަމައިންގެ 14.4 މިލިއަން ގުޅަ ހިފަހައްޓައިފި އެވެ.
އެކަން ކާމިޔާބު ކުރީ ސައުދީގެ ކަސްޓަމްސް އޮފިޝަލުންނާއި ލުބްނާންއާ ގުޅިގެންނެވެ. އެ ތަކެތި ފޮރުވާފައި ހުރީ ލުބްނާނުން ސައުދީއަށް އިމްޕޯޓު ކުރި ދަގަނޑު ޝީޓުތަކެއްގަ އެވެ.
ލުބްނާންގެ އިންޓީރިއާ މިނިސްޓަރު މުހައްމަދު ފަހްމީ ވިދާޅުވީ އެހާ ގިނަ އަދަދެއްގެ މަސްތިވާތަކެތި ހިފެހެއްޓުނީ ސައުދީ އަރަބިއްޔާ އާއި ލުބްނާން ގުޅިގެން ކުރި މަސައްކަތުން ކަމަށެވެ.
އޭނާ ވިދާޅުވީ ދަގަނޑު ޝީޓުގެ ޝިޕްމަންޓް ލުބްނާނާ ހަމައަށް އައީ ސީރިއާގެ ލަތާކިއާ ބަނދަރުން ކަމަށާއި ބެއިރޫތުގެ ބަނދަރުން ނުކުތް އިރު ޝިޕްމަންޓަށް ބޭނުން ކުރަމުން ދިޔެއީ ފޭކު ލިޔުން ކަމަށެވެ.
މިދިޔަ އޭޕްރިލް މަހު ވެސް ލުބްނާނުން ޖިއްދާ ބަނދަރަށް ގެންދިޔަ އަންނާރު ޝިޕްމަންޓެއްގައި ފޮރުވާފައި ހުރި 5.3 މިލިއަން އެމްފެޓަމައިން ގުޅަ ހިފަހައްޓާފައި ވެ އެވެ.
އެއާއެކު ލުބްނާނުން އަންނަ މޭވާ އާއި ތަރުކާރީގެ ޝިޕްމަންޓުތަކުން ޑްރަގް ސްމަގްލް ކުރާ ކަމަށް ތުހުމަތުކޮށް، އެ ޝިޕްމަންޓްތައް ސައުދީއަށް ގެންދިޔުން މަނާ ކުރި އެވެ.
އެ ނިންމުމުގެ ސަބަބުން މިހާރު ވެސް އިގްތިސާދީ ބޮޑު ކާރިސާއެއް ދިމާވެފައިވާ ލުބްނާނަށް އިތުރު ގޮންޖެހުންތަކާ ކުރިމަތިވި އެވެ. ލުބްނާނުން ވަނީ އަލުން މޭވާ އާރި ތަރުކާރީގެ ޝިޕްމަންޓުތަކަށް ހުއްދަ ދޭން ސައުދީ ސަރުކާރުގައި އެދިފަ އެވެ.
އެމްފެޓަމައިންގެ ބާވަތެއް ކަމަށްވާ ކެޕްޓެގަން ބޭހަކީ ލުބްނާނާއި، ސީރިއާ އަދި އިރާގުގައި އުފައްދާ އެއްޗެކެވެ. ފްރެންޗް އޮބްޒަވޭޓަރީ ފޯ ޑްރަގްސް އެންޑް ޑްރަގް އެޑިކްޝަނުން ބުނެފައިވާ ގޮތުގައި އެ ބޭސް އުފައްދަނީ ސީދާ ސައުދީގެ މާކެޓަށް އަމާޒުކޮށްގެންނެވެ.
