ލަންޑަން، ޔޫކޭ (ޖޫން 27) - އިނގިރޭސި ވިލާތުގެ އަސްކަރީ މަނަވަރެއް ދަތުރު ކުރަމުން ދިޔަ ގޮތުގެ ތަފްސީލް ހިމެނޭ ސިއްރު ދިފާއީ ލިޔުންތަކެއް ބަސް ސްޓޮޕަކުން ފެނުނު މައްސަލަ ތަހުގީގު ކުރަން ފަށައިފި އެވެ.
އެޗްއެމްއެސް ޑިފެންޑާ މަނަވަރު ކްރައިމިއާގެ އައްސޭރިފަށާ ކައިރިން ދަތުރު ކުރުމުން ރަޝިއާގެ އަސްކަރިއްޔާއިން ވަނީ އިންޒާރުގެ ބަޑި ޖަހާފަ އެވެ. ބަސް ސްޓޮޕުން ފެނުނު ލިޔުންތަކުގައި ހުރީ އެ މަނަވަރުގެ ތަފްސީލެވެ.
މިނިސްޓްރީ އޮފް ޑިފެންސުން ބުނީ ލިޔުންތައް ގެއްލިގެން މުވައްޒަފަކު ރިޕޯޓު ކުރީ މިދިޔަ ހަފްތާގައި ކަމަށާއި އެކަން ތަހުގީގު ކުރަން ފަށާފައިވާ ކަމަށެވެ.
ނަން ހާމަ ނުކުރާ އާއްމު މީހަކު ބީބީސީއަށް މައުލޫމާތު ދެމުން ބުނީ 50 ސަފްހާ ހިމެނޭ ސިއްރު ލިޔުންތަކެއް މިދިޔަ އަންގާރަ ދުވަހު ދެކުނު އިންގްލޭންޑުގެ ކެންޓުގައި ހުންނަ ބަސް ސްޓޮޕަކުން އޭނާއަށް ފެނިފައިވާ ކަމަށެވެ.
އެ ލިޔުންތަކުގައި ހުރީ ޔޫކްރެއިންގެ ކަނޑުގެ ސަރަހައްދުން މަނަވަރު ދަތުރުކޮށްފި ނަމަ ރަޝިއާއިން އަމަލު ކުރާނެ ކަމަށް ބެލެވޭ ގޮތްތަކުގެ ތަފްސީލް ހިމަނާފަ އެވެ.
ރަޝިއާއިން މިދިޔަ ބުދަ ދުވަހު ބުނީ ބްލެކް ސީގައި އެ ގައުމުގެ ސަރަހައްދުން މަނަވަރު ދަތުރު ކުރަމުން ދަނިކޮށް އިންޒާރުގެ ބަޑި ޖަހާފައިވާ ކަމަށެވެ.
ނަމަވެސް އިނގިރޭސި ވިލާތުން ބުނީ މަނަވަރު ދަތުރު ކުރަމުން ދިޔެއީ ޔޫކްރެއިންގެ ކަނޑުގެ ސަރަހައްދުން ބައިނަލްއަގްވާމީ ގާނޫނުތަކާ އެއް ގޮތްވާ ގޮތުގެ މަތިން ކަމަށެވެ.
އެ ހާދިސާ ހިނގީ ކްރައިމިއާގެ ކޭޕް ފިއޮލެންޓްގެ އައްސޭރިފަށާ ކައިރިންނެވެ. ރަޝިއާއިން 2014 ވަނަ އަހަރު ވަނީ ކުރިން ޔޫކްރެއިނުގެ ބަޔެއްގެ ގޮތުގައި އޮތް ކްރައިމިއާއަކީ ރަޝިއާގެ ބައެއް ކަމަށް ކަނޑައަޅާފަ އެވެ. ނަމަވެސް ބައިނަލްއަގްވާމީ މުޖުތަމައިން އެކަން ގަބޫލެއް ނުކުރެ އެވެ.
