ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ގޭ ބަންދުގައި ހުންނަވަނީ އެމަނިކުފާނަކީ ކޮވިޑް-19 ޖެހިގެން ބޮޑަށް ބަލިވެދާނެ ކަމުގެ ބިރު އޮތް ކެޓަގަރީގެ ބޭފުޅަކަށް ވާތީ ކަމަށް މޯލްޑިވްސް ކަރެކްޝަނަލް ސާވިސް އިން ބުނެފި އެވެ.
އެމްއެމްޕީއާރްސީ މައްސަލައިގައި ރައީސް ޔާމީން ޖަލަށްލުމަށް ނޮވެމްބަރު 8، 2019، ގައި ހުކުމް ކުރި ފަހުން މިދިޔަ އޭޕްރީލް މަހާ ހަމައަށް އެ ހުކުމް ތަންފީޒު ކުރައްވަމުން ގެންދެވީ މާފުށީ ޖަލުގަ އެވެ.
މިދިޔަ އޭޕްރީލް 29، ގައި ރައީސް ޔާމީން ގެކޮޅަށް ބަދަލުކޮށްފައި ވަނީ ބަލިހާލަތު ހުންނެވި ގޮތުން ގެކޮޅަށް ބަދަލު ކުރުމަށް ރައީސް އިބްރާހިމް މުހައްމަދު ސޯލިހުގެ އަރިހުގައި ރައީސް ޔާމީންގެ އަނބިކަނބަލުން ފާތިމަތު އަހުމަދު އެދިވަޑައިގެންފައި އޮއްވަ އެވެ. އަދި އިދިކޮޅު ޕީޕީއެމް/ޕީއެންސީ ކޯލިޝަނުން ދިޔައީ ޔާމީން ދޫކޮށްލުމަށް ގޮވާލައި މާލޭގައި މުޒާހަރާ ކުރަމުންނެވެ.
ރައީސް ޔާމީން ގެކޮޅަށް ބަދަލު ކުރިއިރު ކ. މާފުށީގައި ކޮވިޑް-19 ފެތުރޭތީ އެ ރަށް އޮތީ ހެލްތު ޕްރޮޓެކްޝަން އެޖެންސީގެ މޮނިޓަރިން ލިސްޓަށް އަރުވައިފަ އެވެ. ނަމަވެސް އެ ރަށުގައި މިހާރު އެ ހާލަތެއް ނެތެވެ.
ރައީސް ޔާމީން ހުކުމް ތަންފީޒު ކުރައްވަމުން ގެންދަވާ ތަނާ ގުޅޭ ގޮތުން މި ނޫހާ ވާހަކަ ދައްކަވަމުން ކަރެކްޝަންގެ މީޑިއާ އޮފިޝަލު ޔުސްރީން އަހްމަދު ވިދާޅުވީ ރައީސް ޔާމީން ގޭގައި ހުންނަވަނީ މަދުން ނަމަވެސް ޖަލުގައި ކޮވިޑް އުޅެފައި އެމަނިކުފާނަކީ ހައި-ރިސްކް ކެޓަގަރީގެ ބޭފުޅަކަށް ވާތީ ކަމަށެވެ.
މާފުށީގައި ކޮވިޑް-19 ފެތުރި ޖަލުގައި ވެސް ކޮވިޑް ފެތުރެމުންދިއުމާ ގުޅިގެން އޭރު ގައިދީންގެ ތެރޭގައި ތިބި ހައި-ރިސްކް މީހުން ދެނެގަތުމަށް ރިސްކް އެސެސްމަންޓެއް ހަދައި ހައިރިސްކް ގައިދީންގެ އާއިލާއާ ހަވާލުކޮށް ގެއަށް ބަދަލު ކުރި އެވެ.
މާފުށިން ކޮވިޑަށް ޕޮޒިޓިވްވި ކޭސްތައް ރަނގަޅުވެ، ދެ މަސް ދުވަހަށްފަހު މާފުށި މޮނިޓަރިން އިން ނަގާފައި ވަނީ މި މަހުގެ 15 ވަނަ ދުވަހެވެ.
ރިޝްވަތު ނެންގެވުމާއި ކަޅު ފައިސާ ދޮވުމުގެ އެހެން މައްސަލައެއްގެ ޝަރީއަތް ރައީސް ޔާމީންގެ މައްޗަށް ކްރިމިނަލް ކޯޓުގައި މިހާރު ވެސް ދަނީ ހިންގަމުންނެވެ. އެއީ މަގާމުގެ ނުފޫޒު ބޭނުން ކުރައްވައިގެން އެމްއެމްޕީއާރްސީ މެދުވެރިކޮށް ރ. ފުއްގިރި ވިއްކައިގެން ލިބުނު 1.1 މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާކުރައްވާފައިވާ މައްސަލައެއްގަ އެވެ.
އޭގެ އިތުރުން ރިސޯޓެއް ގޮތަށް ތަރައްގީ ކުރުމަށްޓަކައި ވ. އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ބުނާ މައްސަލައެއްގައި އެމަނިކުފާނުގެ މައްޗަށް ޖިނާއީ ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް އެންޓި ކޮރަޕްޝަން ކޮމިޝަނުން އޮތީ ފޮނުވައިފަ އެވެ.
