އިންސާނެއްގެ ހަޔާތުގައި ސިކުނޑި ތަރައްގީ ކުރުމަށް އެންމެ މުހިއްމީ އުމުރުގެ އެންމެ ފުރަތަމަ ތިން އަހަރުކަން އެނގޭ ހެއްޔެވެ؟ ތުއްތު ދަރިފުޅު އުފަންވުމުން ފެށިގެން ތިން އަހަރު ފުރުމާ ހަމައަށް ދަސްވަނީ ވަޒަންކޮށްލަން ވެސް ނޭނގޭހާ ބައިވަރު ކަންކަމެވެ. ދަރިފުޅުގެ ހަޔާތުގެ އެންމެ ފުރަތަމަ އަދި އެންމެ މުހިއްމު ތިން އަހަރުގެ ތެރޭގައި ހެދި ބޮޑުވުމަށް އެހީވުމަށް ކުރެވޭނެ އެންމެ ރަނގަޅު ކަމަކީ އެހާމެ ފަސޭހަ ވެސް ކަމެކެވެ.
ކުޅުމަކީ ހަމައެކަނި މަޖާ ކުރުން ކަމަށް ހީވެދާނެ އެވެ. ނަމަވެސް ދަރިފުޅުގެ އުމުރުން ތިން އަހަރު ވަންދެން ކުޅުމަކީ ހަމައެކަނި މަޖާ ކުރުމެއް ނޫނެވެ. ކުޅުމަކީ ދަސް ކުރުމާއި ދިރިއުޅުމަށް މުހިއްމު ލައިސް ސްކިލްތައް ދަނެގަނެ، ބިނާ ކުރުމެވެ. ކަންކަން ހައްލު ކުރާނެ ގޮތްތައް ހޯދައި، އަމިއްލަ ހިޔާލު ފާޅުކުރަން ދަސްވަނީ ކުޅުމުގެ ތެރެއިންނެވެ. އަދި ދަރިފުޅާއި ބެލެނިވެރިންނާ ދެމެދު އޮންނަ ގުޅުން ބަދަހިވަނީ ކުޅުމުގެ ތެރެއިންނެވެ.
ޓަވަރެއް ހަދާއިރު، ފިޒިކަލް ސްކިލްސް ދަސްވުން
ބްލޮކްސް ނުވަތަ އެ ނޫން ވެސް ކުޅޭ އެއްޗެއް، އެކަތި މައްޗަށް އަނެކަތި ލައި، ޓަވަރެއް ހަދަމުން ދާއިރު ދަރިފުޅަށް ދަސްވަނީ ސެންސަރީ މޮޓޯ ސްކިލްތައް ބޭނުންކޮށްގެން ހަރަކާތް ކުރާނެ ގޮތެވެ. މިއީ ސިއްހަތު ރަނގަޅު، ހެލިފެލިވެ އުޅޭ ހަށިގަނޑެއް ތަރައްގީ ކުރުން މުހިއްމު ސްކިލްތަކެކެވެ. ދަރިފުޅު ޓަވަރެއް ހަދާއިރު، ކައިރީގައި އިނދެ ވާހަކަ ދައްކާށެވެ. އަދި ޓަވަރު ހެދުމުގައި ބައިވެރިވި އެންމެ އުސް ޓަވަރު ހެދެނީ ކާކަށްތޯ ބަލާށެވެ.
މަޖާ އަޑުތައް ލައްވާއިރު، ސޯޝަލް ސްކިލްސް ބިނާވުން
ތުއްތު ކުދިން ވާހަކަ ދައްކަން ފަށަނީ ނުވަތަ ކޮމިއުނިކޭޓް ކުރަނީ އެކި އަޑުތަކާއި، މޫނަށް ޖައްސާ ވައްތަރުތަކާއި އަތާއި ފައިގެ ހަރަކާތްތަކުންނެވެ. ދަރިފުޅަށް ފުރިހަމައަށް ސަމާލުކަން ދީ، ކުރާ ކަންކަމަށް ރަނގަޅަށް ރެސްޕޯންޑް ކުރާށެވެ. ދަރިފުޅު ކުރާ ކަމަކާ ގުޅުވައިގެން ބެލެނިވެރިޔާގެ އަޑުގެ ޓޯނަށް ބަދަލު ގެނެސް، މޫނު މަތިން ޝުއޫރު ދައްކައި ދޭށެވެ. މިއީ ސިކުނޑީގައި ހުންނަ ނިޔުރަލް ކަނެކްޝަންތައް ވަރުގަދަކުރަން އެހީވާ ކަމެކެވެ. އަދި މުއާސަލާތު ކުރުމާއި ސޯޝަލް ސްކިލްސް ތަރައްގީ ވާނެ އެވެ. އަދި މިއީ ދަރިފުޅާއި ބެލެނިވެރިޔާއާ ދެމެދު އޮންނަ ގުޅުން ރަނގަޅުވާ ކަމެކެވެ.
އެއްޗެއް ފޮރުވާފައި ހޯދަން މަސައްކަތް ކުރާއިރު، ކޮގްނިޓިވް ސްކިލްސް ބިނާވުން
ތަންކޮޅެއް އުނދަގޫ އެކަމަކު މަޖާ ކުޅިވަރެއް، މިސާލަކަށް އެއްޗެހި ފޮރުވާފައި ހޯދުން، ކުޅޭއިރު ދަރިފުޅަށް ދަސްވަނީ ކަންކަމަށް ދޭ ސަމާލުކަން އިތުރުކޮށް، މައްސަލަ ހައްލުކޮށް، ވިސްނުމުގެ އުކުޅުތައް ބިނާ ކުރުމަށެވެ. ކުޅެމުން ދާއިރު، ދަރިފުޅަށް މާ އުނދަގޫހެން ހީވާނަމަ ހިންޓެއް ދޭށެވެ. އެހީވަމުން ގޮސް، އަމިއްލައަށް ފޮރުވާފައިވާ އޮތް އެތި ފެންނާނެ ގޮތް ހަދައިދޭށެވެ. އޭރުން އަމިއްލައަށް މައްސަލަ ހައްލު ކުރަން ކުދިންނަށް ދަސްވާނެ އެވެ.
ލަވާ ކިޔާ ނަށާ އިރު، އިމޯޝަނަލް ސްކިލްސް ތަރައްގީވުން
ދަރިފުޅުގެ ނަފްސާނީ ދުޅަހެޔޮކަމާއި މުޅި ހަޔާތުގައި ވެސް އުފާވެރިކަމާއެކު އުޅެވޭނެ ގޮތް މަގުފަހި ކުރުމަށް އިމޯޝަންތައް ދަނެގަނެ، މެނޭޖުކޮށް، ފާޅުކުރަން ދަސްކުރަން ޖެހެ އެވެ. ލަވަ ކިޔުމާއި ނެށުމަކީ އަމިއްލަ ޝުއޫރުތައް ހާމަކޮށް ހެދުމަށް ވަރަށް ފަސޭހަ ގޮތެކެވެ. ދަރިފުޅާއެކު ލަވަ ކިޔައި ނެށުމުގައި ބައިވެރިވާ ނަމަ މިއީ ގުޅުން ވަރުގަދަކޮށްދޭނެ ކުޅިވަރަކަށް ވާނެ އެވެ.
ހިޔާލަށް ގެންނަ އެއްޗެއް ކުރަހާއިރު، ކްރިއޭޓިވް ސްކިލްސް ބިނާވުން
ދަރިފުޅު މަޑުމަޑުން އިނދެގެން އެއްޗެއް ކުރަހަމުން ދާއިރު، ކަރުދާހުން ފާޅުވަމުން ދާނީ ދަރިފުޅުގެ ހިޔާލީ ދުނިޔޭގައި ހިނގާ ކަންކަމެވެ. މިއީ ދަރިފުޅުގެ އަމިއްލަ ހިޔާލުތައް ފާޅުކޮށް ހަގީގަތަކަށް ހަދަން ދަސް ކުރުމެވެ. ކުރަހައި ނިމުމުން، އެއާ ބެހޭ ގޮތުން ވާހަކަ ދައްކާ ސުވާލުކޮށް ހަދާށެވެ.
titledesc
