އެމެރިކަން އައިޑޮލްގެ ކުރީގެ ބައިވެރިއަކު އަންހެނުން މަރާލިކަން ސާބިތުވެއްޖެ

Sep 30, 2026, 5:51 PM
ފޮޓޯ: ފޭސްބުކް

ފޮޓޯ: ފޭސްބުކް

ޓީވީގެ މަޝްހޫރު ހުނަރު ދައްކާލާ މުބާރާތެއް ކަމަށްވާ "އެމެރިކަން އައިޑޮލް" އިން ފެނިގެންދިޔަ، އެމެރިކާގެ އޮހައިއޯގެ ކްރިސްޓިއަން ފައްޅިއެއްގެ ކުރީގެ މެމްބަރަކު އޭނާގެ އަންހެނުން މަރާލިކަން ސާބިތުވެއްޖެ އެވެ.

އުމުރުން 40 އަހަރުގެ ކޭލެބް ފްލިން، އޭނާގެ އަންހެނުން އޭޝްލީ ފްލިންގެ ބޮލަށް ފަހަތުން ދެ ފަހަރަށް ބަޑިޖަހައި މަރާލާފައިވަނީ މި އަހަރުގެ ފެބްރުއަރީ މަހުގެ 16 ވަނަ ދުވަހު، އޮހައިއޯގައި ހުންނަ އެމީހުންގެ ގޭގައި އޭޝްލީ ނިދާފައި އޮއްވަ އެވެ. އޭގެ ފަހުން ކޭލެބް ވަނީ އެއީ ބަޔަކު ގެއަށް ވަދެ ދިން ހަމަލާއެއް ކަމަށް ދައްކަން މަސައްކަތް ކޮށްފަ އެވެ.

މި މައްސަލައިގައި ޖޫރީން ތިން ގަޑިއިރު މަޝްވަރާ ކުރުމަށް ފަހު، ކޭލެބް ކުށްވެރިވާ ކަމަށް ނިންމި ވަގުތު އޭނާ ވަނީ ކޯޓުގައި ރޮއެފަ އެވެ.

އަންހެނުން މަރާލުމުގެ އިތުރުން، ކޭލެބްގެ މައްޗަށް އުފުލާފައިވާ އިތުރު އަށް ދައުވާއެއް ވެސް ވަނީ ސާބިތުވެފަ އެވެ. އޭގެ ތެރޭގައި ގަސްދުގައި މީހަކު މަރާލުމާއި ހެކި ނައްތާލަން މަސައްކަތް ކުރުން ހިމެނެ އެވެ. މި ކުށްތަކާ ގުޅިގެން އޭނާއަށް އުމުރު ދުވަހުގެ ޖަލު ހުކުމެއް އަންނާނެ ކަމަށް ބެލެވެ އެވެ.

އަށް ދުވަހުގެ ހެކިބަސް ނެގުމަށް ފަހު، މިދިޔަ އަންގާރަ ދުވަހު މި މައްސަލައިގެ ފަހު ބަސް އިއްވާފައިވާއިރު، ޕްރޮސެކިއުޓަރުން ވަނީ ކޭލެބް ލިޔެފައިވާ ލަވައެއް ކޯޓުގައި އިއްވާފަ އެވެ. ދައުލަތުން ބުނާ ގޮތުގައި އެއީ އޭނާ ސިއްރު ގުޅުމެއް ބޭއްވި އަންހެން މީހާއަށް ހާއްސަކޮށްގެން ލިޔެފައިވާ ލަވައެކެވެ.

ޑޭޓަންގެ ރަށެއް ކަމަށްވާ ޓިޕް ސިޓީގައި ހިނގި މި މަރުގެ ހާދިސާގެ ޝަރީއަތުގައި، ފުލުހުންގެ ބޮޑީ ކެމެރާ ފުޓޭޖާއި، މަރުގެ ހާދިސާ ހިނގި ވަގުތު ކޭލެބްގެ އައިފޯނާއި އެޕަލް ވޮޗުން ފެންނަން ހުރި މައުލޫމާތުތައް ހެކީގެ ގޮތުގައި ހުށަހަޅާފައިވެ އެވެ.

މީގެ އިތުރުން ދައުލަތުން ވަނީ ގިނަ އަދަދެއްގެ ހެކިން ހާޒިރުކޮށްފަ އެވެ. އޭގެ ތެރޭގައި ކޭލެބް މަސައްކަތްކުރި ފައްޅީގައި އިންޓާާންއެއްގެ ގޮތުގައި އުޅުނު އަދި އޭނާއާ ސިއްރު ގުޅުމެއް ބޭއްވި އެލީގާ ބޮޓްނާ ހިމެނެ އެވެ.

ޝަރީއަތުގެ ކުރީކޮޅު ބޮޓްނާ ވަނީ ދެ ދުވަސް މަތިން ހެކިބަސް ދީފަ އެވެ. އޭނާ ވަނީ ކޭލެބްއާ އެކު 18 މަސް ދުވަހު ބޭއްވި ގުޅުމުގެ ތަފްސީލު ކޯޓަށް ކިޔައިދީފަ އެވެ.

ކޭލެބް ފްލިން އަކީ 2013 ވަނަ އަހަރު "އެމެރިކަން އައިޑޮލް" ގެ 12 ވަނަ ސީޒަނުން ފެނިގެންދިޔަ މީހެކެވެ. އޭނާ ވަނީ އެ މުބާރާތުގެ ފަނޑިޔާރުން ކަމަށްވާ މަރާޔާ ކެރީ، ނިކީ މިނާޖް އަދި ރޭންޑީ ޖެކްސަންގެ ކުރިމަތީގައި ލަވަ ކިޔާފަ އެވެ.

ޓީވީން ދެއްކި އޮޑިޝަންތަކުގައި އޭނާ ފެނިގެންދިޔައިރު، ހޮލީވުޑަށް ދިއުމަށް "ގޯލްޑަން ޓިކެޓް" ވެސް ލިބުނެވެ. ނަމަވެސް އޭނާއަށް މުބާރާތުގެ މައިގަނޑު ބަޔާ ހަމައަށް ދެވޭ ގޮތެއް ނުވި އެވެ.

މި މައްސަލައިގައި ކޭލެބްގެ މައްޗަށް ހުކުމް ކުރުން އޮންނާނީ އަންނަ އޮކްޓޫބަރު މަހުގެ ފަސްވަނަ ދުވަހު އެވެ.

ފަހުގެ ޚަބަރު

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

ގްލެޑިއޭޓާ 2" ގެ ސެޓުގައި ހިނގި ހާދިސާއަކާ ގުޅިގެން ކޯޓަށް

"ގްލެޑިއޭޓާ 2" ގެ މަންޒަރެއް ކުޅެމުން ދަނިކޮށް ހިނގި އަލިފާނުގެ ހާދިސާއެއްގައި ހަށިގަނޑުގެ 15 އިންސައްތަ ފިހުނު އެކްޓަރަކު، ފިލްމު އުފެއްދި ކުންފުންޏާ ދެކޮޅަށް ކޯޓުގައި ދައުވާކޮށްފިއެވެ. މި ހާދިސާގެ ޒިންމާ ފިލްމީ ކުންފުނިން އުފުލި ނަމަވެސް، ލިބުނު އަނިޔާތަކަށް ބަދަލުގެ ގޮތުގައި އެދިފައިވާ 200،000 ޕައުންޑް ދިނުމަށް އެ ކުންފުނިން ވަނީ އިންކާރުކޮށްފައެވެ.

ދިގުވާހަކަ: ބުނާށޭ ލޯބި ނުވަނީހޭ

މި ވާހަކައިގައި ކިޔައިދެނީ އިވާން އާއި މައިރާގެ މެދުގައި ހިނގި ލޯބިވެތި ވަގުތުކޮޅެއްގެ ވާހަކައެވެ. ނަމަވެސް، ކޮޓަރީގެ ބޭރުން ނަދާލް ގޮވައިލި އަޑަށް އެ ދެމީހުންގެ ހަރަކާތްތަކަށް ހުއްޓުމެއް އައިސް، މައިރާ ނަދާލަށް ޖަވާބުދީ އެތަނުން ދާން މަސައްކަތް ކުރެއެވެ.

Newsletter

Get the latest news delivered straight to your inbox