އިނގިރޭސިވިލާތުގެ މަޝްހޫރު ރޮކް ބޭންޑް "އޯއޭސިސް" އިން ކޯޓު އަމުރެއް ހޯދުމާ ގުޅިގެން، 1.2 މިލިއަން ޕައުންޑާއި 1.6 މިލިއަން ޕައުންޑާ ދެމެދުގެ އަގަކަށް ނީލަން ކިޔަން ހަމަޖެހިފައި އޮތް އެ ބޭންޑުގެ މީގެ ކުރިން އާންމުނުވާ ރެކޯޑިންތަކެއް ނީލަމުން ނަގައިފި އެވެ.
އިނގިރޭސިވިލާތުގެ އީވްޝަމްގައި ހުންނަ "ލިޓްލްޓަން އޮކްޝަންސް" އިން މި މަހުގެ ކުރީކޮޅު އިއުލާންކޮށްފައިވާ ގޮތުގައި، މި ނީލަމުގައި ވިއްކުމަށް ހަމަޖެހިފައިވަނީ 1990 ގެ އަހަރުތަކުގައި އެ ބޭންޑުން ހުށަހަޅައިދިން 63 ލައިވް ޝޯއަކާއި، ސައުންޑްޗެކްތަކުގެ އިތުރުން، ބޭންޑުގެ މައިގަނޑު ދެ މެންބަރުން ކަމަށްވާ ނޮއެލް އަދި ލިއަމް ގަލަގާގެ 100 އަށް ވުރެ ގިނަ ގަޑިއިރުގެ ރެކޯޑިންތަކެވެ.
މި ރެކޯޑިންތަކަކީ 1994 ވަނަ އަހަރު އޯއޭސިސްގެ ފުރަތަމަ އަލްބަމް "ޑެފިނިޓްލީ، މޭބީ" ނެރުނީއްސުރެ 2001 ވަނަ އަހަރާ ހަމައަށް އެ ބޭންޑާއެކު މަސައްކަތް ކުރި ސައުންޑް އިންޖިނިއަރު ހިއު ރިޗަޑްސް އެއްކޮށްފައިވާ ތަކެއްޗެވެ.
ނަމަވެސް، އެ ބޭންޑުން މި މައްސަލައިގެ ތެރެއަށް ވަދެ، ގާނޫނީ ފިޔަވަޅު އެޅުމާ ގުޅިގެން މި ރެކޯޑިންތައް ވިއްކުން މިހާރު މެދުކަނޑާލާފައިވާ ކަމަށް ނީލަން ކިޔާ ކުންފުނިން ވަނީ ބުނެފަ އެވެ.
ލިޓްލްޓަން އޮކްޝަންސްގެ މެނޭޖިން ޑައިރެކްޓަރު ބެން ހޯމާ ވިދާޅުވީ، "ދަ ޑެސްކް ޓޭޕްސް" ގެ ނަމުން މަޝްހޫރުވެފައިވާ އޯއޭސިސްގެ ރެކޯޑިންތައް، ކުރިމަތިވެފައިވާ ގާނޫނީ މައްސަލަތަކާ ގުޅިގެން އޮކްޓޯބަރު 3 ވަނަ ދުވަހު ބޭއްވުމަށް ހަމަޖެހިފައިވާ ނީލަމުން ނަގާފައިވާ ކަމަށެވެ.
ރެކޯޑިންތައް ނީލަމުން ނެގި ނަމަވެސް، ބޭންޑާ ގުޅުންހުރި އެހެނިހެން ހަނދާނީ ތަކެތި ވިއްކުމުގެ ނީލަން ކުރިއަށްދާނެ އެވެ. އޭގެ ތެރޭގައި ޓުއާގެ ތާވަލުތަކާއި، ޝޯތަކުގައި ކިޔާ ލަވަތަކުގެ އަސްލު ލިސްޓުތަކާއި، ބޭންޑުން ބޭނުންކޮށްފައިވާ "އެޕިފޯން" ބްރޭންޑުގެ ގިޓާގެ އިތުރުން، އޯއޭސިސް ޓުއާގައި ބޭނުންކުރި އަސްލު "ކެންގޯލް" ޕާކާ ޖެކެޓެއް ހިމެނެ އެވެ.
