ލަންޑަން، އިނގިރޭސި ވިލާތް (ޖޫން 26) - އިނގިރޭސި ވިލާތުގެ ހެލްތު ސެކްރެޓަރީ މެޓް ހޭންކޮކް، މުވައްޒަފަކާ އެކު ސިއްރު ލޯބީގެ ގުޅުމެއް ހިންގުމުގެ ތެރޭގައި ކޮވިޑް ކޮންޓްރޯލް ކުރަން އަޅާފައި ހުރި ފިޔަވަޅުތަކާ ހިލާފުވިކަން ފަޅާއެރުމުން އިސްތިއުފާ ދެއްވައިފި އެވެ.
ކޮވިޑުގެ ބަލިމަޑުކަން ކޮންޓްރޯލް ކުރުމާއި ކޮވިޑާ ދެކޮޅަށް ވެކްސިން ދިނުމުގައި ޔޫކޭގައި އެންމެ އިސް ދައުރެއް އަދާ ކުރަމުން ދިޔަ ހޭންކޮކްގެ އިސްތިއުފާގެ ސިޓީ ވަނީ ބޮޑު ވަޒީރު ބޮރިސް ޖޯންސަންއަށް ފޮނުއްވާފަ އެވެ.
"މި ބަލިމަޑުކަމުގައި އެތައް ގޮތަކުން ގުރުބާނީތައް ވެފައިވާ މީހުންގެ ހައްގުގައި ތެދު ބުނުމަކީ އަޅުގަނޑުމެންގެ ބޮލުގައި އެޅިފައިވާ ޒިންމާއެއް،" ފިޔަވަޅުތަކާ ހިލާފުވި ކަމަށް ވިދާޅުވެ، ސިޓީގައި ލިޔުއްވާފައި ވެ އެވެ.
ބޮޑު ވަޒީރު ޖޯންސަން ވިދާޅުވީ ހޭންކޮކް އިސްތިއުފާ ދެއްވުމުން "ހިތާމަ ކުރައްވާ" ކަމަށާއި، އޭނާ ކޮށްދެއްވި ހިދުމަތްތަކާ މެދު "ފަހުރުވެރި ވާން ޖެހޭ" ކަމަށެވެ.
ހޭންކޮކް އިސްތިއުފާ ދެއްވާފައި ވަނީ އިދިކޮޅު ޕާޓީތަކުގެ ފިއްތުންތަކާ ގުޅިގެންނެވެ. އިދިކޮޅުން ބުނީ ސަރުކާރުގައި ތިބީ އަމިއްލަ ސިޔާސަތާ އެއް ގޮތަށް އަމަލު ނުކުރެވޭ ބަޔެއް ކަމަށެވެ.
