ނުވަ ސަތޭކައެއްހާ މީހުންގެ އާބާދީއެއް އޮންނަ އުތުރުގެ އެ ރަށުގެ ގިނަ މީހުން ދިރިއުޅެނީ މާލޭގަ އެވެ. ކޮންމެ އަހަރަކު ވެސް ސްކޫލް ބަންދާ ދިމާކޮށް މާލޭން އެރަށަށް ގިނަ އަދަދަކަށް މީހުން ދެ އެވެ. ކޮވިޑްގެ ސަބަބުން ޗުއްޓީއަށް ރަށަށް ދިއުން މަނާކޮށްފައި ވީނަމަވެސް ޒަރޫރީ ބޭނުމަކަށް ކަމަށް ބުނެ އެ ރަށަށް މިއަހަރު ވެސް މީހުން ދިއުން އާއްމެވެ.
"މިހާތަނަށް ވެސް އަޅުގަނޑު 50 އާއިލާއަށް ހުއްދަ ދީފިން. އެކި ޒަރޫރީ ކަންކަމުގައި ކަމަށް ބުނަނީ. ނުރަސްމީކޮށް މި އެނގެނީ ޗުއްޓީއަށްކަން ހަމަ އަންނަނީ،" އުތުރުގެ އެރަށުގެ ކައުންސިލް ރައީސް ނަން ހާމަ ނުކުރަން އެދި ވިދާޅުވި އެވެ.
ކޮވިޑުން ރައްކާތެރިވުމަށް އަޅާފައިވާ ފިޔަވަޅެއްގެ ގޮތުން މާލޭން ރަށްރަށަށް ދިއުމުގެ ހުއްދަ ދެނީ ހަމައެކަނި ޒަރޫރީ ބޭނުންތަކުގައި އެކަންޏެވެ.
އޭގެ ތެރޭގައި ހިމެނެނީ ބޭސް ފަރުވާއަށް އައިސް ދާން ޖެހޭ މީހުންނާއި އުޅުނު ވަޒީފާ ގެއްލިގެން ރަށަށް ދާން ޖެހޭ މީހުންނާއި މާލޭގައި ދިރިއުޅެވެން ނެތުމުން ރަށަށް ދާން ޖެހުމާއި ތައުލީމް ހާސިލުކޮށް ނިމިގެން ރަށަށް ދިއުމުގެ އިތުރުން މައިންބަފައިން ބަލިވުން ފަދަ އާއިލީ ކަމެއް ދިމާ ވެގެން ރަށަށް ދާން ޖެހުމެވެ.
ރަށަށް ދިއުމަށް ހުއްދަ ހޯދަން ޖެހެނީ އެ ދާ ރަށެއްގެ ކައުންސިލް މެދުވެރިކޮށް އެޗްޕީއޭއަށް ހުށަހަޅައިގެންނެވެ. މިއަދު ރަސްމީކޮށް ބޮޑު ޗުއްޓީއަށް ސްކޫލްތައް ބަންދުވާއިރު އަތޮޅުތެރެއަށް ޗުއްޓީއަށް ދާން އެދޭ މީހުން އިތުރު ކަމަށް ކައުންސިލްތަކުން ބުނެ އެވެ.
އެގޮތުން، އެންމެ ގިނަ މީހުން ޗުއްޓީއަށް ރަށަށް އަންނަނީ މާލޭގައި ދިރިއުޅޭގެ ދޫކޮށްލުމަށް ފަހު ރަށަށް ބަދަލުވީ ކަމަށް ބުނެ ލިޔުން ހުށަހަޅައިގެން ކަމަށް ކައުންސިލްތަކުން ބުނެ އެވެ.
"އަޅުގަނޑުމެންނަކަށް ނޯވޭ ގެ ދޫކުރި ކަމުގެ ތެދު ދޮގު ބެލޭކަށް. ދެން ހުރިހާ އެންމެން ހަދަނީ ތެދުތޯ ނުވެސް ބެލޭނެ ދެއްތޯ؟ ޗުއްޓީ ނިމުނީމައި އެ މީހުން ބުނާނެ އަނެއްކާ މާލެ ބަދަލުވާން މިދަނީއޭ. އެ ހިސާބުން މާލެ ދެވޭނެތާ،" ކަން ހިނގާގޮތް ކިޔައިދެމުން ކައުންސިލަރަކު ވިދާޅުވި އެވެ.
މާލެއާއި އަތޮޅުތެރެއާ ދެމެދު ދަތުރު ކުރާ ކަނޑު ބޯޓުތަކުން މާލޭން މީހުން ރަށްރަށަށް ނުގެންދެ އެވެ. އެއީ އެހެންދާ މީހަކު ޕޮޒިޓިވްވުމުން މުޅި ބޯޓް ކަރަންޓީން ކުރަން ޖެހޭތީ އެވެ. ނަމަވެސް ރަށުން މާލެއަށް ގެނެސް ދެ އެވެ. އެހެންކަމުން އެންމެން ކަހަލަ ގޮތަކަށް އަތޮޅުތެރެއަށް ދަނީ ފްލައިޓާއި ލޯންޗް ފަހަރުގަ އެވެ.
ރާއްޖޭގެ ހުރިހާ އެއާޕޯޓަކަށް ދަތުރު ކުރާ ގައުމީ އެއާލައިން، މޯލްޑިވިއަންގެ މީޑިއާ ޑިރެކްޓަރު މޫސާ ވަސީމް ވިދާޅުވީ، މިދިޔަ މަހުގެ ފަހުކޮޅުން ފެށިގެން އެ އެއާލައިންއިން ދަތުރު ކުރާ މީހުން ރާއްޖޭގެ ހުރިހާ ހިސާބަކަށް ވެސް އިތުރުވެފައިވާ ކަމަށެވެ. އޭގެ ތެރޭގައި މާލޭން އަތޮޅުތެރެއަށް ދާ މީހުން ވެސް ގިނަ ކަމަށް އޭނާ ވިދާޅުވި އެވެ.
މިހާރު ދާ ފްލައިޓްތައް ދަނީ ފުލްކޮށް. މުޅި ރާއްޖެއަށް ވެސް އިތުރު،-- މޫސަ
މާލޭން ރަށްރަށަށް ދާން އެންމެން ވެސް 14 ދުވަހު ކަރަންޓީން ވާން ޖެހެ އެވެ. ރަށު ތެރެއަށް ނުކުމެވެނީ 14 ދުވަސް ކޮށްފައި ހަދާ ޓެސްޓުން ނެގެޓިވްވުމުންނެވެ.
ހެލްތު މިނިސްޓްރީގެ ކޮމިޝަނާ އޮފް ކޮލިޓީ އެޝުއަރެންސް ތަސްލީމާ އުސްމާން ވިދާޅުވީ ގައިޑްލައިންގައި ބުނާ ހާލަތެއް ދިމާވެގެން ކަމަށް ބުނެ ލިޔުން ހުށަހެޅުމުން ހުއްދަ ދެމުން އަންނަ ކަމަށާއި އެ ހުށަހަޅަނީ ސައްހަ ލިޔުންތޯ ބެލޭނެ ގޮތްތަކެއް ނެތް ކަމަށެވެ.
މިފަދަ ކަންކަން ތަންފީޒު ކުރެވޭނީ އެންމެންވެސް ޒިންމާ ނަގައިގެން ކަމަށް ތަސްލީމާ ވިދާޅުވި އެވެ.
ޗުއްޓީއާ ދިމާކޮށް ގިނަ ބަޔަކު އަތޮޅުތެރެއަށް ދަތުރު ކުރަން ފަށާފައިވާއިރު މިހާރު ރާއްޖޭން ކޮވިޑު ޖެހޭ ގިނަ މީހުން ޕޮޒިޓިވް ވަނީ ވެސް އަތޮޅުތެރެއިންނެވެ.
