ޖެނީވާ، ސްވިޓްޒަލޭންޑް (ޖޫން 24) - ރަޝިއާގެ ސްޕަޓްނިކް ވީ ކޮވިޑް ވެކްސިން އުފައްދާ ޕްލާންޓެއްގައި ހުރި މައްސަލަތަކެއް ފާހަގަވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ނަމަވެސް ރަޝިއާ ސަރުކާރުން ބުނީ ޑަބްލިއުއެޗްއޯއިން ފާހަގަކުރި ކަންކަން ހައްލުކޮށްފައިވާ ކަމަށެވެ.
ދުނިޔޭގެ 40 ގައުމެއްގައި މިހާރު ވެސް ބޭނުން ކުރަމުންދާ ރަޝިއާގެ ގަމަލެޔާ ރިސާޗް އިންސްޓިޓިއުޓުން އުފެއްދި ސްޕަޓްނިކް ވީ ވެކްސިނަށް ޑަބްލިއުއެޗްއޯގެ ހުއްދަ ހޯދަން ދަނީ މަސައްކަތް ކުރަމުންނެވެ.
އެހެންވެ، ޑަބްލިއުއެޗްއޯއިން ވަނީ އެ ވެކްސިން އުފައްދާ ހަތަރު ޕްލާންޓެއް އިންސްޕެކްޓު ކޮށްފަ އެވެ.
ފާހަގަވި ކަންކަމުގެ ހުލާސާ ރިޕޯޓު އިއްޔެ ނެރިފައި ވާއިރު، މޭ 31 އިން ޖޫން 4 ގެ ނިޔަލަށް ދެކުނު ރަޝިއާގައި ހުންނަ ފާމްސްޓެންޑާޑް އުފާ ވިޓަމިން ޕްލާންޓަށް ކުރި ޒިޔާރަތުގައި ހަ ކަމެއް ފާހަގަވި ކަމަށް ބުނެފައި ވެ އެވެ.
އެގޮތުން ވެކްސިންގެ ތަފާތު ބެޗުތައް ދެނެގަންނާ ގޮތުގެ މައްސަލަތަކެއް އެބަ ހުރި ކަމަށާއި ބެޗުތައް ޓްރޭސް ކުރުމުގައި މައްސަލަ ހުރި ކަމަށް އިންސްޕެކްޝަނުން ފާހަގަކޮށްފައި ވެ އެވެ.
އޭގެ އިތުރުން ވެކްސިން ފުޅިތަކަށް އަޅާ ފިލިންގް ލައިންސްގެ މައްސަލައަކާއި ސްޓެރިލިޓީ އެޝުއެރަންސް، ސްޓެރައިލް ފިލްޓްރޭޝަން ވެލިޑޭޝަން އަދި ކްރިސް ކޮންޓެމިނޭޓުވުމުގެ ނުރައްކަލާ ގުޅޭ މައްސަލަތަކެއް ވެސް ފެނުނެވެ.
ޑަބްލިއުއެޗްއޯއިން އޭއެފްޕީއަށް ބުނީ ރިޕޯޓުގައި ފާހަގަކުރި ކަންކަން ވީ އެންމެ އަވަހަކަށް ހައްލު ކުރަން ކަމާ ގުޅޭ ފަރާތްތަކަށް އަންގާފައި ވާނެ ކަމަށެވެ.
ރަޝިއާގެ ތަރުޖަމާނު ޑިމިޓްރީ ޕެސްކޯވް ވިދާޅުވީ ބައެއް މައްސަލަތައް އިންސްޕެކްޝަނުން ފާހަގަވި ކަމަށާއި އެ ހުރިހާ ކަމެއް މިހާރު ރަނގަޅުކޮށްފައިވާ ކަމަށެވެ.
ޑަބްލިއުއެޗްއޯގެ އެމެޖެންސީ ޔޫސް ލިސްޓިންގެ ހުއްދަ ކޮވިޑް ވެކްސިނަކަށް ދެނީ ބައިނަލްއަގްވާމީ ސްޓޭންޑަޑަށް ފެތޭ ގޮތަށް ވެކްސިން އުފައްދާކަން ކަށަވަރު ކުރުމަށް ފަހު އެވެ.
ޑަބްލިއުއެޗްއޯއިން ބުނީ ސްޕަޓްނިކް ވީ އުފައްދާ ނުވަ ތަނެއް މިހާތަނަށް ބަލާފައިވާ ކަމަށެވެ. އެ ތަންތަނުގެ ތެރެއިން މައްސަލަ ފާހަގަވީ އެންމެ ތަނެއްގަ އެވެ.
