ބުޑަޕެސްޓް (ޖޫން 24) - ޔޫރޯ ފުޓްބޯޅަ މުބާރާތުގައި މިރޭ 2-2 އިން ޕޯޗުގަލް އާއި ފްރާންސް ކުޅުނު މެޗު އެއްވަރުވިއިރު، ދެ ޓީމަށް ވެސް މުބާރާތުގެ އަނެއް ބުރުން ފުރުސަތު ލިބިއްޖެ އެވެ.
މިރޭގެ މެޗު ހާއްސަވާނެ ކުޅުންތެރިއަކީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށެވެ. އޭނާ މި މެޗުގައި ޖެހި ދެ ގޯލާ އެކު ވަނީ އީރާންގެ ކުރީގެ ފޯވާޑް އަލީ ދާއީ ގައުމީ ޓީމަށް އެންމެ ގިނަ ގޯލު ޖަހައިދީގެން ހަދާފައިވާ ރެކޯޑާ ހަމަކޮށްފަ އެވެ. ދެ ކުޅުންތެރިން ވެސް ވަނީ ގައުމީ ޓީމަށް 109 ގޯލު ޖަހައިފަ އެެވެ.
ގްރޫޕް އެފްގެ އެއް ވަނަ ޓީމުގެ ގޮތުގައި އަނެއް ބުރަށް ދިޔައީ ފްރާންސް އެވެ. އެއީ ތިން މެޗުން ފަސް ޕޮއިންޓާ އެކު އެވެ. ދެ ވަނަ އަށް ދިޔައީ މިރޭ ހަންގޭރީއާ 2-2 އިން އެއްވަރުވި ޖަރުމަނެވެ. އެ ޓީމާއި ތިން ވަނައިގައި ނިންމި ޕޯޗުގަލް އަށް ވެސް ވަނީ ތިން މެޗުން ހަތަރު ޕޮއިންޓް ލިބިފަ އެވެ. ޕޯޗުގަލް އަނެއް ބުރަށް ދިޔައީ އެންމެ ރަނގަޅު ނަތީޖާ ނެރޭ ތިން ވަަނަ ޓީމުތަކުގެ ތެރެއިންނެވެ. އެންމެ ފުލަށް ދިޔަ ހަންގޭރީ އަށް ތިން މެޗުން ދެ ޕޮއިންޓް ލިބުނުއިރު، އެ ޓީމު ވަނީ ކަޓައިފަ އެވެ.
ފްރާންސް އަނެއް ބުރުގައި ކުޅޭނީ ސްވިޒަލެންޑާ އެވެ. އަދި ޕޯޗުގަލް އަނެއް ބުރުގައި ބައްދަލުކުރަން ޖެހޭނީ ބެލްޖިއަމްއާ އެވެ.
ޕުސްކަސް އެރީނާގައި މިރޭ ކުޅުނު މެޗަށް ދެ ޓީމުން ވެސް ނުކުތީ ބަދަލުތަކެއް ގެނެސްގެންނެވެ. ފްރާންސް އިން ވަނީ ބެންޖަމިން ޕަވާޑާއި އޭޑްރިއަން ރަބިއޯ އަދި ލޫކަސް ޑީންގެ ބަދަލުގައި ކޮރެންޓިން ޓޮލީސޯ އާއި ލޫކަސް ހެނާންޑޭޒް އަދި ޖޫލްސް ކޫންޑޭ ފުރަތަމަ އެގާރައިގައި ހިމަނައިފަ އެެވެ. ޕޯޗުގަލް އިން ވަނީ ވިލިއަމް ކަވާލިއޯ އާއި ބްރޫނޯ ފެނާންޑޭސްގެ ބަދަލުގައި ރެނާޓޯ ސަންޗޭޒާއި ޔާއޯ މުޓީނިއޯ ފުރަތަމަ އެގާރައިގައި ހިމަަނައިގެންނެވެ.
ހަމަހަމަ ކުޅުމެއް ދެ ޓީމުގެ ފަރާތުން ފެނިގެންދިޔަ މި މެޗުގައި ދެ ޓީމުން ވެސް މަސައްކަތްކުރީ މެދުތެރެއިން ޑޮމިނޭޓްކޮށްގެން ލަނޑެެއް ޖެހޭތޯ އެވެ. ލީޑުނެގީ ޕޯޗުގަލް އިންނެވެ. އެ ޓީމުގެ ގޯލު ޖަަހައިިދިނީ މެޗުގެ 30 ވަނަ މިނިޓްގައި ކްރިސްޓިއާނޯ ރޮނާލްޑޯ އެވެ. މިއީ ޑަނީލޯ ޕެރޭރާ އަށް ފްރާންސްގެ ކީޕަރު ހޫގޯ ލޮރީސް ކުރި ފައުލަކަށް ރެފްރީ ދިން ޕެނަލްޓީ އަކުން ރޮނާލްޑޯ ޖެހި ގޯލެކެވެ. މި ގޯލާ އެކު ރޮނާލްޑޯ އަކީ ޔޫރޯ އާއި ވޯލްޑް ކަޕްގައި ޖުމްލަ އެއްކޮށް އެންމެ ގިނަ ގޯލު ޖެހި ކުޅުންތެރިޔާ އެވެ. އޭނާ ވަނީ ދެ މުބާރާތުގައި 20 ގޯލު ޖަހައިފަ އެވެ. މީގެ ކުރިން އެ ރެކޯޑް އޮތީ 19 ގޯލު ޖެހި ޖަރުމަނުގެ މިރޮސްލާވް ކްލޯސާ އަތުގަ އެވެ.
ލަނޑު ޖެހުމަށް ފަހު ބެންޒެމާ އުފާފާޅުކުރަނީ.
ފްރާންސް އިން ނަތީޖާ ހަަމަހަމަ ކުރީ ފުރަތަމަ ހާފުގެ އިތުރު ވަގުތުގައި ކަރިމް ބެންޒެމާ ޖެހި ޕެނަލްޓީންނެވެ. މިއީ ފްރާންސްގެ ކީލިއަން އެމްބާޕޭ އަށް ފުރަތަމަ ހާފުގެ އިތުރުުވަގުތު ޕޯޗުގަލް އޭރިއާތެރެއިން ނެލްސަން ސެމޭޑޯ ކުރި ފައުލަކަށް ރެފްރީ ދިން ޕެނަލްޓީ އެކެވެ. އެ ޕެނަލްޓީ ބެންޒެމާ ކާމިޔާބު ކުރިއިރު، މިއީ ފާއިތުވި ފަސް އަހަރު ތެރޭ ބެންޒެމާ ގައުމީ ޓީމަށް ޖަހައިދިން ފުރަތަމަ ގޯލެވެ. އޭނާ އެންމެ ފަހުން ފްރާންސަށް ގޯލެއް ޖަހައިދިނީ 8 އޮކްޓޫބަރު 2015 ގަ އެވެ.
ދެ ވަނަ ހާފު ފެށިގެން ދެ މިނިޓް ތެރޭ ފްރާންސް އިން ވަނީ ގޯލެއް ޖަހައި ނަތީޖާ އަނބުރާލައިފަ އެވެ. ޕައުލް ޕޮގްބާ ދިން ބޯޅައަކުން މި ގޯލު ވެސް ޖެހީ ބެންޒެމާ އެވެ. އޭނާ މި ގޯލު ޖެހުމުން ލައިންސްމަން ފުރަތަމަ ނިންމީ އޮފްސައިޑް ކަމަށެވެ. އެކަމަކު ވީއޭއާރް އިން ބެލުމަށް ފަހު ރެފްރީ ވަނީ ގޯލު ބަލައިގަންނަން ނިންމައިފަ އެވެ.
ދެ ވަނަ ހާފްގެ ކުޅުން ފެށިއިރު ފްރާންސް އިން ވަނީ ހެނާންޑޭޒްގެ ބަދަލުގައި ޑީން ކުޅެން އަރުވައިފަ އެެވެ. އެކަމަކު ހަ މިނިޓް ފަހުން ޑީން އަށް އަނިޔާވެ އޭނާގެ ބަދަލުގައި ރަބިއޯ ކުޅެން އެރުވި އެވެ.
ޕޯޗުގަލް އިން ވަނީ މެޗުގެ 59 ވަނަ މިނިޓްގައި ރޮނާލްޑޯ މި މެޗުގައި ކާމިޔާބުކުރި ދެ ވަނަ ޕެނަލްޓީއާ އެކު ނަތީޖާ ހަމަހަމަކޮށްފަ އެވެ. މި ޕެނަލްޓީ އަކީ ރޮނާލްޑޯ ނެގި ހުރަހެއް ފްރާންސްގެ ކޫންޑޭ އަތުގައި ޖެހުމުން ރެފްރީ ދިން ޕެނަލްޓީ އެކެވެ. މި ގޯލާ އެކު ރޮނާލްޑޯ ވަނީ އީރާނުގެ ކުރީގެ ފޯވާޑް އަލީ ދާއީ ގައުމީ ޓީމަށް 109 ގޯލު ޖަހައިދީގެން ހަދާފައިވާ ރެކޯޑާ ހަމަކޮށްފަ އެވެ.
ފްރާންސަށް އަލުން ލީޑުނަގައިދޭން މެޗުގެ 67 ވަނަ މިނިޓްގައި އޭރިއާބޭރުން ޕޮގްބާ ޖެހި ބޯޅަ ޕޯޗުގަލްގެ ކީޕަރު ރުއީ ޕެޓްރީޝިއޯ ވަނީ މަތަކޮށްފަ އެވެ. ފަހުން ފްރާންސްގެ އެންޓޮއިން ގްރީޒްމަން ޖެހި ބޯޅަ ދިޔައީ ހުރަސްދަނޑިމަތިންނެވެ.
