ބާލިން، ޖަރުމަނު (ޖޫން 21) - ޖަރުމަނުގެ ޔުނިވާސިޓީއަކުން މުހިއްމު މައުލޫމާތުތަކެއް ރަޝިއާއަށް ވިއްކި ކަމުގެ ތުހުމަތުގައި ރަޝިއާގެ ސައިންޓިސްޓަކު ހައްޔަރުކޮށްފި އެވެ.
ޖަރުމަނުގެ ޕްރޮސެކިއުޓަރުން ނެރުނު ބަޔާނެއްގައި ބުނީ އިލްނޫރް އެން. ނަމަކަށް ކިޔާ ސައިންޓިސްޓަކު މިދިޔަ ހުކުރު ދުވަހު ހައްޔަރު ކުރީ އޮކްޓޯބަރު 2020 އިން ފެށިގެން ރަޝިއާގެ ޖާސޫސީ އިދާރާއަށް މަސައްކަތްކޮށްދޭ ކަމުގެ ތުހުމަތުގައި ކަމަށެވެ.
ހައްޔަރު ކުރުމާ ހަމައަށް އިލްނޫރް އެން. މަސައްކަތް ކުރަމުން ދިޔެއީ ނަން ހާމަކޮށްފައިވާ ނުވާ ޖަރުމަނުގެ ޔުނިވާސިޓީއެއްގެ ނެޗުރަލް ސައިންސަސް އެންޑް ޓެކްނޮލޮޖީ ޑިޕާޓްމަންޓުގެ ރިސާޗް އެސިސްޓެންޓެއްގެ ގޮތުގަ އެވެ.
ފެޑެރަލް ޕްރޮސެކިއުޓަރުން ގަބޫލު ކުރާ ގޮތުގައި އޮކްޓޯބަރު 2020 އިން ޖޫން 2021 އަށް އޭނާ ވަނީ މަދުވެގެން ތިން ފަހަރެއްގެ މަތިން ރަޝިއާގެ އިންޓެލިޖެންސްގެ މެމްބަރަކާ ބައްދަލުކޮށްފަ އެވެ. އޭގެ ތެރެއިން ދެ ފަހަރެއްގެ މަތިން ޔުނިވާސިޓީން ހޯދާފައިވާ ސިއްރު މައުލޫމާތުތައް ހިއްސާކުރި ކަމަށް ތުމަހުތު ކުރެވެ އެވެ.
މައުލޫމާތު ދިނުމުން ބަދަލުގައި އޭނާއަށް ފައިސާދެމުން ދިޔަ ކަމަށް ތުހުމަތުކޮށްފައި ވެ އެވެ. އޭނާ ހައްޔަރު ކުރުމަށް ފަހު ފުލުހުންނާއި ޕްރޮސެކިއުޓަރުން ވަނީ އޭނާ ދިރިއުޅޭ ގެޔާއި މަސައްކަތް ކުރި ތަން ބަލައި ފާސްކޮށްފަ އެވެ.
މި މައްސަލަ ފެންމަތިވެފައި މި ވަނީ ރަޝިއާ އާއި ޖަރުމަނުގެ ގުޅުން ގޯސްވެފައިވާ ދަނޑިވަޅެއްގަ އެވެ. އެގޮތުން ރަޝިއާގެ އިދިކޮޅު ލީޑަރު އެލެކްސީ ނަވަލްނީއަށް ޒަހަރު ދިނުމުން ބާލިންގައި ފަރުވާ ކުރި މައްސަލާގައި ރަޝިއާއިން ހިތްހަމަނުޖެހެ އެވެ.
