މޮސްކޯ، ރަޝިއާ (ޖޫން 20) - ރަޝިއާގައި ކޮވިޑް ވެކްސިން ޖަހަން މަޖުބޫރު ކަމަށް ކަނޑައަޅާފައިވާ ދާއިރާތަކުގެ މުވައްޒަފުން އެކަމަށް ދެކޮޅު ހަދާ ނަމަ ނޯ ޕޭ ލީވަށް ދާން ޖެހޭނެ ކަމުގެ އިންޒާރު ލޭބާ މިނިސްޓަރު ދެއްވައިފި އެވެ.
އެންޓަން ކޮޓްޔަކޯވް އެގޮތަށް ވިދާޅުވިއިރު، ކޭސްތައް އިތުރުވަމުން ދާތީ މޮސްކޯ އާއި ބައެއް އެހެން ސިޓީތަކުގައި ފިޔަވަޅުތައް ވަނީ ވަރުގަދަކޮށްފަ އެވެ.
"އެ ސަރަހައްދެއްގެ ސިއްހީ އިދާރާއިން ވަކި ދާއިރާއެއްގެ މަސައްކަތްތެރިން ވެކްސިން ޖެހުން މަޖުބޫރު ކަމަށް ކަނޑައަޅާފައި ވަނިކޮށް ވެކްސިން ޖަހަން ދެކޮޅު ހަދާ ނަމަ، އެ މުވައްޒަފަކު ސަސްޕެންޑު ކުރެވިދާނެ،" ކޮޓްޔަކޯވް ވިދާޅުވި އެވެ.
އޭނާ ވިދާޅުވީ ވެކްސިން ޖެހުން މަޖުބޫރު ކަމަށް ކަނޑައަޅާފައިވާ ގަރާރު ދެމިއޮތްހާ ހިނދަކު މުވައްޒަފު ވެސް ހުންނަން ޖެހޭނީ ސަސްޕެންޝަނުގައި ކަމަށެވެ.
ވެރިރަށް މޮސްކޯގެ ސާވިސް އިންޑަސްޓްރީ ނުވަތަ ހިދުމަތް ދިނުމުގެ ދާއިރާގައި އުޅޭ މުވައްޒަފުން ވެކްސިން ޖެހުން މަޖުބޫރު ކަމަށް މިހާރު ވެސް ވަނީ ކަނޑައަޅާފަ އެވެ. އެގޮތުން އޯގަސްޓް 15 ގެ ކުރިން އެ ދާއިރާގެ 60 ޕަސެންޓު މީހުންގެ ވެކްސިން ފުރިހަމަ ކުރަން ދަނީ މަސައްކަތް ކުރަމުންނެވެ.
ދެ ވަނައަށް އެންމެ ބޮޑު ސިޓީ ކަމަށްވާ ސެއިންޓް ޕީޓާޒްބާގް ހިމެނޭ ގޮތަށް އިތުރު ހަތް ސިޓީއެއްގައި ވެސް ވަނީ އެފަދަ ގަވާއިދުތައް ހަދާފަ އެވެ.
މޮސްކޯއަށް ފަހު ކޮވިޑުގެ ހާލަތު އެންމެ ގޯސްކޮށް އޮތް ސިޓީއަކީ ސެއިންޓް ޕީޓާޒްބާގް އެވެ. އަދި މިހާރު ކުރިއަށްދާ ޔޫރޯ 2020 ފުޓްބޯޅަ މުބާރަތުގެ ހަތް މެޗެއް އެ ސިޓީގައި ކުޅެން އޮތީ ހަމަޖެހިފަ އެވެ. އޭގެ ތެރޭގައި ޖުލައި ދެ ވަނަ ދުވަހު އޮންނަ ކުއާޓާ ފައިނަލު މެޗެއް ހިމެނޭއިރު، ގިނަ އަދަދެއްގެ ސަޕޯޓަރުން އެ ސިޓީއަށް ޖަމާވާނެ ކަމަށް ބެލެވެ އެވެ.
މިދިޔަ ޑިސެމްބަރު މަހުން ފެށިގެން ރަޝިއާގެ އެންމެންނަށް ހިލޭ ވެކްސިން ލިބޭ ގޮތަށް އޮތް ނަމަވެސް މިހާތަނަށް އެއް ޑޯޒް ޖަހާފައި ވަނީ އާބާދީގެ 146 މިލިއަން މީހުންގެ ތެރެއިން އެންމެ 19.5 މިލިއަން މީހުންނެވެ.
މޮސްކޯގެ 12 މިލިއަން މީހުންގެ ތެރެއިން 1.5 މިލިއަން މީހުން ވަނީ ދެ ޑޯޒް ފުރިހަމަކޮށްފަ އެވެ. ދާދި ފަހުން ހެދި ދިރާސާއަކުން ދެއްކި ގޮތުގައި ރަޝިއާގެ 60 ޕަސެންޓު މީހުން ވެކްސިން ޖަހަން ބޭނުމެއް ނުވެ އެވެ.
