މިއުނިކް (ޖޫން 19) - ޔޫރޯ ފުޓްބޯޅަ މުބާރާތުގައި މިރޭ ޕޯޗުގަލްއާ ދެކޮޅަށް ކުޅޭއިރު އެ ޓީމަކީ ކްރިސްޓިއާނޯ ރޮނާލްޑޯ އަށް ހުރިހާ ކަމެއް ބިނާވެފައި އޮތް ޓީމެއް ނޫން ކަމަށާއި މިހާރު ވަރުގަދަ އެތައް ކުޅުންތެރިންތަކެއް އެ ޓީމުގައި އެބަހުރި ކަމަށް ޖަރުމަނުގެ ކޯޗު ޔަކީމް ލޯ ބުނެފި އެވެ.
މި ފަހަރުގެ ޔޫރޯގައި ޕޯޗުގަލް ކުޅުނު ފުރަތަމަ މެޗުން އެ ޓީމު ހަންގޭރީ އަތުން 3-0 އިން މޮޅުވިއިރު، ރޮނާލްޑޯ ވަނީ ހަތަރު ރެކޯޑެއް ގާއިމްކޮށްފަ އެވެ. އެއީ ޔޫރޯގެ ތާރީހުގައި އެންމެ ގިނަ މުބާރާތުގައި ކުޅުމާއި ޔޫރޯގައި އެންމެ ގިނަ މެޗު ކުޅުމާއި ޔޫރޯގައި އެންމެ ގިނަ ގޯލު ޖެހުމުގެ އިތުރުން ޔޫރޯގެ އެއް މެޗެއްގައި ގޯލު ޖެހި އެންމެ ދުވަސްވީ ކުޅުންތެރިޔާގެ ރެކޯޑެވެ.
މި ފަހަރުގެ ޔޫރޯގެ ތެރެއިން ރޮނާލްޑޯ ވަނީ ދަނޑުބޭރުން ހިނގި ކަމެއްގެ ސަބަބުން ވެސް ނޫސްތަކުގެ ފަލަސުރުހީ އަށް އަރައިފަ އެވެ. އެއީ ހަންގޭރީ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ހުރި ކޯކްފުޅި ތަކެއް ދުރަށް ޖައްސައިގެންނެވެ. ލޯ ބުނީ ރޮނާލްޑޯ އަކީ ހަމައެކަނި ކޯކްފުޅި ދުރަށް ޖައްސައިގެން ތަފާތު ދެއްކުމުގައި އެކަނި މަގުބޫލުވި މީހެއް ނޫން ކަމަށާއި ފުޓްބޯޅައިގައި ވެސް އާދަޔާހިލާފު ކުޅުންތެރިއެއް ކަމަށެވެ.
"ރޮނާލްޑޯ ހަމަ ވަރަށް މޮޅު. އެކަމަކު އެ ޓީމަކީ ވަން މޭން ޝޯ އެއް ނޫން. އެއީ ސާފުކޮށް ފެންނަން އޮތް ކަމެއް. މިދިޔަ ހަތަރެއް ނޫނީ ފަސް ވަރަކަށް އަހަރަށް ބަލާއިރު ޕޯޗުގަލް އަކީ އެންމެ ކުރީގައި އުޅޭ އެއް ޓީމު. ޔޫރޯ 2016 ހޯދުމަށްފަހު ޓީމެއްގެ ގޮތުގައި ތަރައްގީ ވެއްޖެ،" މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ލޯ ބުންޏެވެ.
ޕޯޗުގަލްގެ މެޗެއްގެ ތެރެއިން ރޮނާލްޑޯ.
"އެއީ ވަން މޭން ޝޯ އެއްތަ؟ ކުރިން ވެއްޖިއްޔާ ރޮނާލްޑޯ އަކީ ޕޯޗުގަލްގެ މެއިން މޭން. ރޮނާލްޑޯ އަކީ ޕޯޗުގަލްގެ ސުޕަސްޓާރު. އެކަމަކު މިހާރު އެކަން ބަދަލުވެއްޖެ. މިހާރު އިތުރު ޓޮޕް ކޮލިޓީ ކުޅުންތެރިން އެބަތިބި. ބްރޫނޯ ފެނާންޑޭސް، ބެނާޑޯ ސިލްވާ އަދި ޑިއޯގޯ ޖޮޓާގެ އިތުރުން އެހެން މޮޅެތި ކުޅުންތެރިން ވެސް އެބަތިބި،"
މި ފަހަރުގެ ޔޫރޯ އަށް ފަހު ޖަރުމަނުގެ ކޯޗުކަން ދޫކޮށްލަން ނިންމާފައިވާ ލޯ އެންމެ ފަހުން އެ ޓީމު ގޮވައިގެން 2018 ވަނަ އަަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖުން ކެޓީ އެވެ. މި ފަހަރުގެ ޔޫރޯ ފުރަތަމަ މެޗުގައި 1-0 އިން ފްރާންސް އަތުން ބަލިވިއިރު، މިރޭ ޕޯޗުގަލް އަތުން ބަލިވެއްޖެނަމަ ޖަރުމަނަށް މި ފަހަރުގެ މުބާރާތުން ވެސް ކުރިއަށް ދިއުމުގެ ފުރުސަތު ހަނިވާނެ އެވެ.
"ތި ޕްރެޝަރުތަކާ ކުރިމަތިލެވޭނެ. ޓީމެއްގެ ގޮތުގައި އަހަރެމެން ތިކަމާ ކުރިމަތިލާނެ. އަަހަރެމެން ބޭނުމީ މޮޅަށް ކުޅެގެން ނަތީޖާ ނެރޭން،" ލޯ ބުންޏެެވެ.
އެންމެ ފަހުން ބޮޑު މުބާރާތެއްގައި ޖަރުމަނުން ޕޯޗުގަލްއާ ދެކޮޅަށް ކުޅުނު ހަތަރު މެޗުން ވެސް ވަނީ މޮޅުވެފަ އެވެ. އެއީ 2006 ގެ ވޯލްޑް ކަޕާއި 2008 އާއި 2012 ގެ ޔޫރޯ އަދި 2014 ވަނަ އަހަރުގެ ވޯލްޑް ކަޕްގަ އެވެ. މީގެ ތެރެއިން ފަހު ތިން މެޗުން މޮޅުވިއިރު ކޯޗަކީ ލޯ އެވެ.
ޕޯޗުގަލް އަކީ ހަމައެކަނި ރޮނާލްޑޯ އެއް ނޫން: ސަންޓޯސް
ރޮނާލްޑޯއާ ބެހޭގޮތުން ލޯ ދެއްކި ބައެއް ވާހަކަތަކަށް ޕޯޗުގަލްގެ ކޯޗު ފެނާންޑޯ ސަންޓޯސް ވަނީ އެއްބަސްވެފަ އެވެ. އޭނާ ބުނީ ޕޯޗުގަލް އަކީ ހަމައެކަނި ރޮނާލްޑޯ ކަމަށް ދެކުމަކީ ގޯހެއް ކަމަށެވެ.
"ޕޯޗުގަލް އަކީ ޓީމެއް. ހަމައެކަނި ރޮނާލްޑޯ އެއް ނޫން. ޕޯޗުގަލް ފަހުރުވެރިވަނީ ރޮނާލްޑޯ އަށް އެކަންޏެއް ނޫން މުޅި ޓީމަށް. ދެން ރޮނާލްޑޯ އަކީ މި ޓީމުގެ ތަރި ދެން ކެޕްޓަން. އެކަމަކު ވަކި އެކަކު މުޅި ޓީމަކަށް ނުވާނެ،" ޕޯޗުގަލް އަށް 2016 ވަނަ އަހަރުގެ ޔޫރޯ އާއި 2019 ވަނަ އަހަރުގެ ޔުއެފާ ނޭޝަންސް ލީގު ކާމިޔާބުކޮށްދިން ސަންޓޯސް ބުންޏެވެ.
ފުރަތަމަ މެޗުން ފްރާންސް އަތުން ޖަރުމަނު ބަލިވެފައި އޮތުމަކީ މި މެޗަށް މާ ބޮޑު އަސަރެއް ކުރާނެ ކަމެއް ކަމަށް ސަންޓޯސް ނުދެކެ އެވެ. އޭނާ ބުނީ ޖަރުމަނަކީ އަބަދުވެސް ވަރުގަދަ ޓީމެއް ކަމަށާއި މުބާރާތްތަކުގައި އެ ޓީމުގެ ރެކޯޑް ގޯސް ފަހަރެއް ވަރަށް މަދުވާނެ ކަމަށެވެ.
"ޖަރުމަނު ކުޅޭ ސްޓައިލުގެ ސަބަބުން އަބަދުވެސް އިިދިކޮޅު ޓީމަށް އުނދަގޫވާނެ. ފުރަތަމަ މެޗުން ފްރާންސް މޮޅުވިޔަސް ދެ ވަނަ ހާފް ފެނުނީ ވަރަށް އުނދަގޫކޮށް. ފްރާންސުން ދިގު ބޯޅަތައް ކުޅެން ޖެހުނު. ފަހަރެއްގައި އަހަރެމެންނަށް ވެސް މެޗުދާ ގޮތުން އެކަން ކުރަން ޖެހިދާނެ،" ސަންޓޯސް ބުންޏެވެ.
އެންމެ ފަހުން މުބާރާތްތަކުގައި ޕޯޗުގަލް ކުޅުނު 30 މެޗުގެ ތެރެއިން ބަލިވެފައިވަނީ ދެ މެޗުންނެވެ. އެކަމަކު މުބާރާތެއްގައި ޕޯޗުގަލް އަށް އެންމެ ފަހުން ޖަރުމަނު އަތުން މޮޅުވެވުނީ 2000 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގަ އެވެ.
ޖަރުމަނުގެ އަލިއާންޒް އެރީނާގައި ޕޯޗުގަލްއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 21:00 ގަ އެވެ.
