ލަންޑަން (ޖޫން 15) - ޔޫރޯ ފުޓްބޯޅަ މުބާރާތުގައި އާދިއްތަ ދުވަހު ކްރޮއޭޝިއާ އާއި އިންގްލެންޑް ކުޅުނު މެޗުގެ ތެރެއިން ވެމްބްލީ ސްޓޭޑިއަމް ސަޕޯޓަރުންގެ ތެރެއަށް ވެއްޓުނު އިނގިރޭސި ސަޕޯޓަރަކަށް ހޮސްޕިޓަލްގައި ފަރުވާދެމުން އަންނައިރު، އެ މައްސަލަ ޔުއެފާ އިން ވެސް ބަލަން ފަށައިފި އެވެ.
އާދިއްތަ ދުވަހު ލަންޑަނު ގަޑިން ދޭއް ޖެހިއިރު ފެށި ކްރޮއޭޝިއާ އާއި އިންގްލެންޑް މެޗު ފެށިތާ ކުޑައިރުކޮޅެއްގެ ތެރޭގައި ސަޕޯޓަރު ވެއްޓުނީ ސީޓުތައް ކައިރިއަށެވެ.
އިނގިރޭސި ރަސްމީ ސްޓޭޑިއަމް ވެމްބްލީގެ ސްޕޯކްސްޕާސަން ބުނީ ސަޕޯޓަރު ވެއްޓުނީ ކިހިނެއްކަމެއް އަދި ސީދާ ބުނަން ނޭނގޭނެ ކަމަށާއި ޔުއެފާ އިން އެ މައްސަލަ ތަހުގީގު ކުރަމުންދާތީ މި ވަގުތު މާ ތަފްސީލް ވާހަކަތަކެއް އެ ހާދިސާއާ ބެހޭގޮތުން ނުދެއްކޭނެ ކަމަށެވެ.
"ސަޕޯޓަރަށް ފުރަތަމަ ދަނޑުގައި ވެސް ފަރުވާާދިނިން. އެ އަށް ފަހު ސީރިއަސްކަަން އެނގުމުން ވަރަށް އަވަހަށް ހޮސްޕިޓަލަށް ގެންގޮސްފިން،" ސްޕޯކްސްޕާސަން ބުންޏެވެ.
އެ ސަޕޯޓަރު ވެއްޓުނީ ދަނޑުގެ މަތީ ބައިގައި އިން ސީޓެއް މަތިން ކަމަށް މަންޒަރު ދުން ބައެއް ސަޕޯޓަރުންނާ ހަވާލާދީ ބައެއް މީޑިއާތަކުން ރިޕޯޓް ކޮށްފައިވެ އެވެ.
"ފުރަތަމަ ހާފު ނިމުނު ވަގުތުގައި އަހަރެމެން ކައިރީގައި ހުރި ބައެއް ސަޕޯޓަރުން ދެއްކި އެ ވެއްޓުނު ސަޕޯޓަރުގެ ވާހަކަ. އެ މީހުންނަށް ތިބީ އަސަރުކޮށްފައި މަންޒަރު ފެނުނު ގޮތުން. އެއީ ސީޓުން ކަހަލައިގެން ތިރިއަށް ވެއްޓި ޖެހުނީ އޭނާގެ ކަރު،" ދަނޑަށް މެޗު ބަލަން ދިޔަ ސަޕޯޓަރަކާ ހަވާލާދީ އިނގިރޭސި މީޑިއާ އިން ރިޕޯޓްކޮށްފައިވެ އެވެ.
ކޮވިޑް-19ގެ ހާލަތުގެ ސަބަބުން މި ފަހަރުގެ ޔޫރޯގެ މެޗުތައް ބަލަން ކޮންމެ ދަނޑަކަށް ވެސް ވަަދެވެނީ އެ ގައުމެއްގެ ސިއްހީ ޕްރޮޓޮކޯލާ ހިލާފުނުވާ އަދަދަށެވެ. ކްރޮއޭޝިއާ އާއި އިންގްލެންޑް މެޗު ބަލަން ވެމްބްލީ ސްޓޭޑިއަމަށް 22،500 ސަޕޯޓަރުން ވަނެވެ. އެ މެޗުން އިންގްލެންޑް 1-0 އިން މޮޅުވިއިރު، ލަނޑު ޖެހީ ރަހީމް ސްޓާލިން އެވެ.
