ޔޫރަޕްގެ ފުޓްބޯޅައިގައި އަަބަދު ވެސް ނަން ހިނގާ ނެދަލެންޑްސް އިން މި މުބާރާތުގެ ތަށި އުފުލާލީ އެންމެ ފަހަރަކު އެވެ. އެއީ 1988 ވަނަ އަހަރު އެވެ. އޭގެ ފަހުން މި މުބާރާުތުގައި ހަ ފަހަރު ކުޅެގެން ވެސް މާ ބޮޑު ކާމިޔާބެއް ނުލިބުނެވެ. ނެދަލެންޑްސް މި ފަހަރުގެ ޔޫރޯ އަށް މި އަންނަނީ މެދުކެނޑުމަކަށް ފަހު އެވެ. ފްރާންސްގައި 2016 ވަނަ އަހަރު ބޭއްވި ޔޫރޯ އަށް ނެދަލެންޑްސް ކޮލިފައިނުވެ އެވެ.
ނެދަލެންޑްސް މި ފަހަރުގެ ޔޫރޯ އަށް ކޮލިފައިކޮށްދިނުމުގެ އެންމެ މުހިއްމު ދެ ހިއްސާދާރުން މި ވަގުތު ޓީމާ އެކު ނެތެވެ. އެއީ މިދިޔަ އަހަރުގެ ސެޕްޓެމްބަރު މަހު ނެދަލެންޑްސްގެ ކޯޗުކަމުން ވަކިވި މިހާރު ބާސެލޯނާގެ ކޯޗުކަމުގައި ހުރި ރޮނާލްޑް ކޫމަން އާއި އެ ޓީމުގެ ކެޕްޓަން ބޭންޑް އަޅައިގެން ކޮލިފައިން ބުރުގައި މޮޅު ކުޅުމެއް ދެއްކި ޑިފެންޑަރު ވެން ޑައިކް އެވެ. ވެން ޑައިކްގެ ކަކުލަށް ލިބިފައިވާ ސީރިއަސް އަނިޔާއިން ރަނގަޅުވާން ވަގުތު ނަގާނެތީ އޭނާ މި ފަހަރުގެ ޔޫރޯގައި ނުކުޅެން ވަނީ ނިންމައިފަ އެވެ. ކޮލިފައިންގައި ނެދަލެންޑްސް ކުޅުނު އަށް މެޗުގެ ތެރެއިން ހަ މެޗުން މޮޅުވިއިރު، އެއް މެޗުން ބަލި އަދި އަނެއް މެޗުން ވަނީ އެއްވަރުވެފަ އެވެ. ކޮލިފައިން ގްރޫޕްގެ ދެ ވަނައިގެ ގޮތުގައި ކޮލިފައިވި ނެދަލެންޑްސް ބަލިވީ ޖަރުމަނު އަތުންނެވެ.
މި ފަހަރުގެ ޔޫރޯގައި ނެދަލެންޑްސް އިން ވިދާލާނެ ކުޅުންތެރިންގެ ތެރޭގައި ގިނައީ މިޑްފީލްޑަރުންނެވެ. އެ ގޮތުން ކެޕްޓަން ބޭންޑް އަޅައިގެން ކުޅޭ ޖިނީ ވައިނަލްޑަމް އާއި ބާސެލޯނާގެ މިޑްފީލްޑަރު ފްރެންކީ ޑި ޔޯންގެ އިތުރުން ފޯވާޑް މެމްފިސް ޑިޕާއި ހިމެނެ އެވެ. މި ކުޅުންތެރިންގެ އިތުރުން މި ވަގުތު ރަނގަޅު ފޯމެއްގައި ހުރި ފޯވާޑް ޕީއެސްވީގެ ޑޮންޔެލް މާލިން އަކީ ވެސް މި ފަހަރު ނެދަލެންޑްސް ޓީމުގައި މުހިއްމު ދައުރެއް އަދާކުރާނެ ކަމަށް ބެލެވޭ ކުޅުންތެރިއެކެވެ.
ނެދަލެންޑްސްގެ ކޯޗު ޑި ބޮއާ.
ކޯޗު: ފްރޭންކް ޑި ބޮއާ
ސެޕްޓެމްބަރު މަހު ނެދަލެންޑްސްގެ ކޯޗުކަމުން ކޫމަން ވަކިވުމާ އެކު ނެދަލެންޑްސް އިން އެ ޓީމު ހަވާލުކުރަން ކޯޗެއް ހޯދިިއިރު ބެލީ ކޫމަން ފެށި މަސައްކަތް ރަނގަޅު ޓްރެކުގައި ގެންދެވޭނެ ގައުމީ ޓީމަށް ކުޅެފައިވާ ކޯޗަކު ހޯދާށެވެ. އެ ގޮތުން ފްރޭންކް ޑި ބޮއާއާ ޓީމު ހަވާލުކޮށް މަސައްކަތް ފަށައިގަތީ އެވެ. ކްލަބް ލެވަލްގައި ޑި ބޮއާގެ ކޯޗިން ތަޖުރިބާ ރަނގަޅެއް ނޫނެވެ. އިންޓަ މިލާނާއި ކްރިސްޓަލް ޕެލަސްގެ ކޯޗުކަމުން ޑި ބޮއާ ވަކިކުރީ ނަތީޖާ ގޯސްވުމުންނެވެ.
ސްކޮޑު
ކީޕަރުން: ޔެސްޕާ ސިލިސެން (ވެލެންސިއާ)، ޓިމް ކްރުލް (ނޯވިޗް ސިޓީ)، މާޓެން ސްކެޓެލެންބާގް (އަޔަކްސް)
ޑިފެންޑަރުން: ނޭތަން އަކޭ (މެންޗެސްޓާ ސިޓީ)، ޑޭލީ ބްލިންޑް (އަޔަކްސް)، މަތައިސް ޑި ލިޓް (ޔުވެންޓަސް)، ސްޓެެފަން ޑި ވްރައި (އިންޓަ މިލާން)، ޑެންޒެލް ޑަމްފްރީސް (ޕީއެސްވީ)، ޔުރިއެމް ޓިމްބާ (އަޔަކްސް)، ޕެޓްރިކް ވެން އާންހޯލްޓް (ކްރިސްޓަލް ޕެލަސް)، ޔޮއެލް ވެލްޓްމަން (ބްރައިޓަން)، އޮވެން ވައިންޑާލް (އޭޒެޑް އަލްކްމާރް)
މިޑްފީލްޑަރުން: ފްރެންކީ ޑި ޔޯން (ބާސެލޯނާ)، މާޓެން ޑެ ރޫން (އެޓަލަންޓާ) ، ރަޔާން ގްރަވެންބާޗް (އަޔަކްސް)، ޑޭވީ ކްލާސެން (އަޔަކްސް)، ޓެއުން ކޫޕްމިިއެނާސް (އޭޒެޑް އަލްކްމާރް)، ޑޯނީ ވެން ޑަ ބީކް (މެންޗެސްޓާ ޔުނައިޓެޑް)، ޖިނީ ވައިނަލްޑަމް (ލިވަޕޫލް)
ފޯވާޑުން: ސްޓީވެން ބާގައިސް (ފެއިނޫޑް)، ލޫކް ޑި ޔޯން (ސެވިއްޔާ)، މެމްފިސް ޑިޕާއި (ލިޔޯން)، ކޯޑީ ގަކްޕޯ (ޕީއެސްވީ)، ޑޮންޔެލް މާލެން (ޕީއެސްވީ)، ކުއިންސީ ޕްރޯމެސް (ސްޕާޓަކް މޮސްކޯ)، ވޫޓް ވެގޯސްޓް (ވުލްފްސްބާގް)
