ދުނިޔޭގެ ރޭންކިންގެ އެއް ވަނައިގައި އޮތް ބެލްޖިއަމަށް މިއީ އެ ގައުމުގެ ފުޓްބޯޅައިގެ ރަން ޖީލު އޮއްވައި ކާމިޔާބެއް ހޯދަން ލިބޭ އިތުރު ފުރުސަތެކެވެ. ޔޫރޯ އެއްގައި މިހާތަނަށް ބެލްޖިއަމްގެ އެންމެ ރަނގަޅު ނަތީޖާ އަކީ 1980 ވަނަ އަހަރުގެ މުބާރާތުގެ ރަނަރަޕް ކަމެވެ. އެ ފަހަރު ފައިނަލުގައި އެ ޓީމު ބަލިވީ ވެސްޓް ޖާަމަނީއާ ވާދަކޮށެވެ. މިއީ ޔޫރޯގައި ބެލްޖިއަމް ކުޅޭ ހަ ވަަނަ ފަަަހަރެވެ. އެ ޓީމުން 2000 ވަނަ އަހަރުގެ ޔޫރޯ އަށް ފަހު 16 އަހަރުގެ މެދުކެނޑުމަށް ފަހު ވާދަކުރީ އެންމެ ފަހުން 2016 ވަނަ އަހަރު ފްރާންސްގައި ބޭއްވި ޔޫރޯގަ އެވެ. އެ މުބާރާތުގެ ކުއާޓާ ފައިނަލުން ވޭލްސް އަތުން ބަލިވެ ކެޓީ އެވެ.
މި ފަހަރުގެ ޔޫރޯ އަށް ބެލްޖިއަމް ނުކުންނާނީ ސައްތަ އިން ސައްތަ ރެކޯޑަކާ އެކު އެވެ. ކޮލިފައިންގައި އެ ޓީމު ކުޅުނު 10 މެޗުން ވެސް މޮޅުވިއިރު، 40 ގޯލު ޖެހި އެވެ. އަދި ބައިކޮޅަށް ވަނީ ތިން ގޯލެވެ. މި ފަހަރު ޔޫރޯ އަށް އެންމެ ރަނގަޅު ފޯމެއްގައި ދާނެ އެއް ޓީމަކީ ބެލްޖިއަމް އެވެ. އެ ޓީމުން މިދިޔަ އަހަރުތަކުގައި ބައިނަލްއަގުވާމީ މުބާރާތްތަކުގައި ރަނގަޅު ކުޅުމެއް ދައްކާފައިވާއިރު، މި ފަހަރުގެ މުބާރާތުގެ އެއް ފޭވަރިޓަކީ ވެސް ބެލްޖިއަމް އެވެ.
ބެލްޖިއަމްގެ ސްކޮޑަށް ބަލާއިރު ދަށްކޮށް ކިޔޭނެ ހަަމަ އެންމެ ކުޅުންތެރިއަކު ވެސް ނެތެވެ. އެ ޓީމުގެ ފޯވާޑް ލައިން ބަލަހައްޓާނީ އިޓާލިއަން ލީގުގެ މޮޅު ކުޅުންތެރިޔާގެ މަގާމު ހޯދި ރޮމެލޫ ލުކާކޫ އެވެ. އޭނާ އަކީ ކޮލިފައިން ބުރުގައި ބެލްޖިއަމަށް އެންމެ ގިނަ ގޯލު ަޖަހައިދިން ކުޅުންތެރިޔާ އެވެ. ޖުމްލަ ހަތް ގޯލު ޖެހި އެވެ. ދެން ބެލްޖިއަމް ޓީމުން ނަން ފަވާލެވޭ ދެ ކުޅުންތެރިންނަކީ މެންޗެސްޓާ ސިޓީގެ ކެވިން ޑިބްރޭނާ އާއި ރެއާލް މެޑްރިޑްގެ އެޑެން ހަޒާޑް އެވެ.
ބެލްޖިއަމްގެ ކޯޗު ރޮބާޓޯ މާޓީނޭޒް.
ކޯޗު: ރޮބާޓޯ މާޓިނޭޒް
ބެލްޖިއަމްގެ ކޯޗުކަމާ 2016 ވަނަ އަހަރު ރޮބާޓޯ މާޓިނޭޒް ހަވާލުވި ފަހުން ދުނިޔޭގެ ރޭންކިންގައި އެ ޓީމުގެ ނަން އެންމެ ކުރީގައި އޮވެ އެވެ. އެކަމަކު ބައިނަލްއަގުވާމީ ދެ މުބާރާތުގައި ވެސް ފަހު ކޮޅުގައި ނަތީޖާ އަށް އަސަރުކުރަނީ އެވެ. އެ ގޮތުން 2016 ވަނަ އަަހަރުގެ ޔޫރޯގެ ކުއާޓާ ފައިނަލުގައި ބަލިވިއިރު، 2018 ވަނަ އަހަރުގެ ސެމީ ފައިނަލުގައި ބަލިވީ އެވެ. މި ފަހަރުގެ ޔޫރޯ އަށް ތައްޔާރުވަމުން އަންނަނިކޮށް ބެލްޖިއަމަށް ލިބުނު އެންމެ ބޮޑު ހިތްހަމަޖެހުމަކީ އަލުން އެ ޓީމުގެ ކޯޗުން ޓީމާ ތިއަރީ އޮންރީ ގުޅުމެވެ. އޮންރީ ވަނީ މީގެ ކުރިން ދެ އަހަރު މާޓިނޭޒްގެ އެސިސްޓަންޓަކަށް މަސައްކަތްކޮށްފަ އެވެ.
ސްކޮޑު
ކީޕަރުން: ތިބައު ކޯޓުއާ (ރެއާލް މެޑްރިޑް)، ސިމޯން މިންޔޮލޭ (ކްލަބް ބްރޫޖް)، މެޓްސް ސެލްޒް (އާރްސީ ސްޓްރޯސްބޯގް)
ޑިފެންޑަރުން: ޓޯބީ އަލްޑަވެއިރަލްޑް (ޓޮޓެންހަމް)، ޑާޑްރީކް ބޮޔާޓާ ( ހާތާ ބާލިން) ޔޭސަން ޑެނަޔާ (ލިޔޯން)، ތޯމަސް ވަމައެލަން (ވިސެލް ކޯބޭ)، ޔޭން ވަޓޯންގެން (ބެންފީކާ)
މިޑްފީލްޑަރުން: ޓިމޮތީ ކަސްޓާންޔޭ (ލެސްޓާ ސިޓީ)، ނާސެރް ޗަޑްލީ (އިސްތަންބޫލް ބަސަކްޝެހީރް)، ޔަނިކް ކަރާސްކޯ (އެތުލެޓިކޯ މެޑްރިޑް)، ކެވިން ޑިބްރޭނާ (މެންޗެސްޓާ ސިޓީ)، ލެއަންޑާ ޑެންޑޮންކާ (ވުލްވްސް)، ތޯގަން ހަޒާޑް (ބޮރޫޝިއާ ޑޯޓްމަންޑް)، ތޯމަސް މޮނިއޭ (ބޮރޫޝިއާ ޑޯޓްމަންޑް)، ޑެނިސް ޕްރައެޓް (ލެސްޓާ ސިޓީ)، ޔޫރީ ޓީލެމަންސް (ލެސްޓާ ސިޓީ)، ހެންސް ވަނަކެން (ކްލަބް ބްރޫޖް)، އެކްސެލް ވިޓްސެލް (ބޮރޫޝިއާ ޑޯޓްމަންޑް)
ފޯވާޑުން: މިޝީ ބަޓްޝުއާޔީ (ކްރިސްޓަލް ޕެލަސް)، ކްރިސްޓިއަން ބެންޓެކޭ (ކްރިސްޓަލް ޕެލަސް)، ޖެރެމީ ޑޮކޫ (ރެނެސް)، އެޑެން ހަޒާޑް (ރެއާލް މެޑްރިޑް)، ރޮމެލޫ ލުކާކޫ (އިންޓަ މިލާން)، ޑްރީސް މާޓެންސް (ނަޕޯލީ)، ލެއަންޑްރޯ ޓްރޮސާޑް (ބްރައިޓަން)
