ސައްތަ އިން ސައްތަ ރެކޯޑަކާ އެކު މި ފަހަރު ޔޫރޯ ކޮލިފައިން ނިންމާލި މަދު ޓީމުތަކުގެ ތެރޭގައި އިޓަލީ ހިމެނޭނެ އެވެ. އިޓަލީ އަކީ މި ފަހަރުގެ ޔޫރޯގެ އެއް ފޭވަރިޓެވެ. އެ ޓީމުން ކޮލިފައިންގެ 10 މެޗުން މޮޅުވިއިރު 37 ގޯލު ޖެހި އެވެ. ބައިކޮޅަށް ވަނީ ހަތަރު ގޯލެވެ. އަދި މި ފަހަރުގެ ޔޫރޯއާ ކުރިމަތިލާއިރު، އިޓަލީ އެންމެ ފަހުން ކުޅުނު އަށް މެޗުން މޮޅުވިއިރު، ބައިކޮޅަށް ގޯލެއް ނުވަދެ އެވެ.
އިޓަލީން ވަނީ ނުވަ ފަހަރު މިހާތަނަށް ޔޫރޯގައި ވާދަކޮށްފަ އެވެ. އެ ޓީމަށް ޔޫރަޕްގެ ޗެމްޕިއަންކަން ލިބުނީ 1968 ވަނަ އަހަރު އެވެ. އެންމެ ފަހުން 2016 ވަަނަ އަހަރު ފްރާންސްގައި ބޭއްވި ޔޫރޯ އިން އިޓަލީ ކެޓީ ކުއާޓާ ފައިނަލުގައި ޖަރުމަނު އަތުން ޕެނަލްޓީ ޖަހައިގެން 5-6 އިން ބަލިވުމުންނެވެ. . އިޓަލީން ޔޫރޯ އަށް ނެގި ސްކޮޑަށް ގިނަ ބަޔެއްގެ ލޯ އަމާޒުވި އެންމެ ބޮޑު ސަބަބަކީ ވަރަށް ރަނގަޅު ޒުވާން ކުޅުންތެރިންނާއި ތަޖުރިބާކާރު ކުޅުންތެރިން މަސްހުނި ވެގެން ނަގާފައިވާ ޓީމަކަށްވާތީ އެވެ. އަދި އެކި މަގާމުތަކުގައި ބަދަލު ކުޅުންތެރިންގެ ގޮތުގައި ވެސް ފެންވަރު ރަނގަޅު ކުޅުންތެރިން ތިބުމަކީ އިޓަލީ އަށް ލިބޭ އެޑްވާންޓޭޖެކެވެ
މި ފަހަރު ޔޫރޯގައި އިޓަލީގެ ތަރިންނަށްވާނެ ކުޅުންތެރިން ވަރަށް ގިނަ އެވެ. އޭގެ ތެރޭގައި ކޮލިފައިންގައި ި އިޓަލީ އަށް އެންމެ ގިނަ ގޯލު ޖަހައިދިން ފޯވާޑް އަންދްރެއާ ބެލޮއްޓީ އާއި ފަހަކަށް އައިސް ރަނގަޅު ފޯމެއްގައި ހުރި ފޯވާޑް ޗީރޯ އިމޯބިލޭ ހިމެނެ އެވެ. މެދުތެރެއަށް ބަލާއިރު މާކޯ ވެރާޓީ އާއި ޖޯޖީނިއޯ އަދި ނިކޯލޯ ބަރޭލާ ފަދަ ކުޅުންތެރިންގެ ނަން ފާހަގަކުރަން ޖެހެ އެވެ.
އިޓަލީގެ ކޯޗު މަންޗިނީ.
ކޯޗު: ރޮބާޓޯ މަންޗިނީ
ކުރީގެ އިޓަލީގެ ފޯވާޑް ރޮބާޓޯ މަންޗިނީ އެ ޓީމުގެ ކޯޗުކަމާ ހަވާލުވި ވަރަށް މާޔޫސްކޮށް އޮތް ދަނޑިވަޅެއްގަ އެވެ. އެއީ 2018 ވަނަ އަހަރުގެ ފީފާ ވޯލްޑް ކަޕުން އިޓަލީ އަށް ފުރުސަތު ގެއްލުނު ފަހުންނެވެ. އިންޓަ މިލާނާއި މެންޗެސްޓާ ސިޓީއާ އެކު ލީގު ޗެމްޕިއަންކަން ހޯދި މަންޗިނީ މި ވަނީ އިޓަލީގެ ގައުމީ ޓީމު މުޅިން އެއްކޮށް ކަަހަލަ ގޮތަކަށް ބަދަލުކޮށް ބައިނަލްއަގުވާމީ މައިދާނުގައި އިޓަލީ އަކީ އަނެއްކާ ވެސް ވަރުގަދަ ބާރަކަށް ހަދައިފަ އެވެ. މެޗަކުން ބަލިނުވެ ކޮލިފައިން ނިންމާލިއިރު، އިޓަލީން ދެއްކި އާދަޔާހިލާފު ކުޅުމަށް ގިނަ ބަޔަކު ތައުރީފުކުރި އެވެ. އަދި ކޮލިފައިންފަހު މެޗުގައި އިޓަލީން އަރްމީނިއާ އަތުން 9-1 އިން މޮޅުވި މެޗަކީ ފަހަކަށް އައިސް ރަސްމީ މެޗެއްގައި އިޓަލީން ދެއްކި އެންެމެ ފުރިހަމަ ކުޅުމެވެ.
ސްކޮޑު:
ކީޕަރުން: ޖިއަންލުއީޖީ ޑޮންނަރުންމާ (އޭސީ މިލާން)، އަލެކްސް މެރެޓް (ނަޕޯލީ)، ސަލްވަޓޯރް ސިރިގޫ (ޓޮރީނޯ)
ޑިފެންޑަރުން: ފްރަންސެސްކޯ އަސޭރްބީ (ލާޒިއޯ)، އަލެސަންޑްރޯ ބަސްޓޯނީ (އިންޓަ މިލާން)، ލެއޮނާޑޯ ބޮނޫޗީ (ޔުވެންޓަސް)، ޖިއޮޖިއޯ ކިއެލީނީ (ޔުވެންޓަސް)،ޖިއޮވާނީ ޑި ލޮރެންޒޯ (ނަޕޯލީ)، އެމަސަން ޕަލްމިއޭރީ (ޗެލްސީ)، އަލެސަންޑްރޯ ފްލޮރެންޒީ (ޕީއެސްޖީ)، ލެއޮނާޑޯ ސްޕިނަޒޯލާ (ރޯމާ)، ރަފައެލް ޓޮލޯއި (އެޓަލަންޓާ)
މިޑްފީލްޑަރުން: ނިކޯލޯ ބަރެއްލާ (އިންޓަ މިލާން)، ބްރަޔާން ކްރިސްޓަންޓޭ (ރޯމާ)، ޖޯޖީނިއޯ (ޗެލްސީ)، މަނުއެލް ލޮކަޓެއްލީ (ސަސުއޯލޯ)، ލޮރެންޒޯ ޕެލެގްރީނީ (ރޯމާ)، ސްޓެފާނޯ ސެންސީ (އިންޓަ މިލާން)، މާކޯ ވެރާޓީ (ޕީއެސްޖީ)
ފޯވާޑުން: އަންދްރެއާ ބެލޮއްޓީ (ޓޮރީނޯ)، ޑޮމެނިކޯ ބެރާޑީ (ސަސުއޯލޯ)، ފެޑެރީކޯ ބާނަޑޭޝީ (ޔުވެންޓަސް)، ފެޑެރީކޯ ކިއޭސާ (ޔުވެންޓަސް) ޗީރޯ އިމޯބިލޭ (ލާޒިއޯ)، ލޮރެންޒޯ އިންސީނިއޭ (ނަޕޯލީ)، ޖިއަކޯމޯ ރަސްޕަޑޯރީ (ސަސުއޯލޯ)
