މާލޭ މަސް މާރުކޭޓުގެ އަށިމަތީގައި ބަހައްޓައިގެން ތާޒާކޮށް މަސް ވިއްކޭ ގޮތަށް ހަދައިފި އެވެ.
ސިޓީ ކައުންސިލުން ބުނީ މާރުކޭޓުގައި މަސް ވިއްކޭ އުސޫލަށް ބަދަލު ގެންނަން ނިންމާފައި ވަނީ މަހުގެ ތާޒާކަން ދެމެހެއްޓޭ ގޮތަށް ހެދުމަށް ކަމަށެވެ.
އެ ބަދަލު ގެނެސްފައި ވަނީ މަސްވެރިންނާއި ގަނެ ވިއްކާ ފަރާތްތަކާ މަޝްވަރާ ކުރެވިގެންނެވެ.
އަށިމަތީ ބަހައްޓައިގެން މަސް ވިއްކޭ ގޮތަށް ބަދަލުކޮށްފައި ވާއިރު މީގެ ކުރިން މާރުކޭޓުގައި މަސް ވިއްކަމުން އައިސްފައި ވަނީ އައިސްބޮކްސް ތަކުގައި ބަހައްޓާއިގެންނެވެ.
މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ މަސް މާރުކޭޓުގެ ކަންކަން ހަރުދަނާ ކުރުމަށް އިތުރު ނިންމުންތައް ވެސް ކައުންސިލުން ނިންމާފައިވާ ކަމަށެވެ.
އެގޮތުން، ގުރުއަތު ނަގައިގެން އަށި ދޫކުރުމާއި މާރުކާޓެުގައި އައިސް ލިބޭނެ އިންތިޒާމު ހަމަޖެއްސުން ހިމެނެ އެވެ.
އިތުރު ނިންމުންތައް
- ގުރުއަތު ނަގައިގެން އަށި ދޫކުރުން
- ކުދި މަސް ވިއްކާ ގޮޅިތަކުން ހުކުރު ދުވަހުވެސް މަސް ވިއްކޭނެ އިންތިޒާމު ހަމަޖެއްސުން
- އެން ހިފައިގެން އަންނަ މަސްވެރިންނަށް ބަނދަރުގައި މަޑުކޮށްލައިގެން ތިބެވޭނެ ޖާގައެއް ހަމަޖެއްސުން
- މަސް މާރުކޭޓު ސަރަހައްދުން އައިސް ލިބޭނެ ގޮތެއް ހެދުން
- ތަން ސާފު ކޮށް ބަލަހައްޓާނެ އިންތިޒާމެއް ހަމަޖެއްސުން
- މަސް މާރުކޭޓާ ބެހޭ ގަވައިދެއް ހަދާ ތަންފީޒުކުރުން
- މަސް ކަންޑަން ބޭނުން ކުރާ ފެނުގެ ރައްކާތެރިކަން ކަނޑައެޅުން
- ގަވައިދުން މަހުގެ ސާމްޕަލް ނެގުން
މަސް މާރުކޭޓުގެ ކަންކަން ރަނގަޅު ކުރުމަށް ގިނަ ކަންކަން ނިންމާފައި ވާއިރު، މާލެ ލޯކަލް މާރުކޭޓުގައި ހުރި މައްސަލަތަކާއި ދަތުރުވެރިންގެ މާރުކޭޓުގައި ހުރި ކަންކަން ހައްލު ކުރުމަށްވެސް ވަނީ ގިނަ ކަންކަން ނިންމާފަ އެވެ.
އެގޮތުން ލޯކަލް މާރުކޭޓުގައި ފްރިޖް ބެހެއްޓުމަށް ހުއްދަ ދިނުމާއި އިތުރު ދެ ފާހަނާ ހެދުން ހިމެނެ އެވެ.
އަދި ވިއްސާރަ ވިއްސާ މައްސަލަ ހައްލު ކުރުމާއި ބިދޭސީން ސޭޓުންގެ ގޮތުގައި ބައިތިއްބާ ގޮޅިތަކުގެ އެގްރިމެންޓް ބާތިލު ކުރުމަށް ވެސް ކައުންސިލުން ވަނީ ނިންމައިފަ އެވެ.
މީގެ އިތުރުން، ދަތުރުވެރިންގެ މާރުކޭޓުގެ ގޮޅީގެ ކުލި ލޯކަލް މާރުކޭޓުގެ ކުއްޔާ އެއްވަރަށް ކުޑަކުރަން ވެސް ކައުންސިލުން ނިންމާފައިވެ އެވެ.
