މާލޭ ސިޓީ ކައުންސިލްގެ ބައްދަލުވުންތައް އާންމުކޮށް ހުޅުވާލުމަށާއި ލައިވް ކުރަން ދެވަނަ ފަހަރަށް ހުށަހަޅައިގެން މިއަދު ފާސްކޮށްފި އެވެ.
ކައުންސިލްގެ ބައްދަލުވުންތައް ކުރިއަށްދާ ވަގުތު ޖާގަ އޮތް މިންވަރަކުން އާންމުންނަށް ހުޅުވާލުމަށާއި ސޯޝަލް މީޑިއާ މެދުވެރިކޮށް ބައްދަލުވުންތައް ލައިވްކުރުމަށް ކައުންސިލްގައި ތިއްބަވާ އެމްޑީޕީގެ މެންބަރުންގެ ފަރާތުން އެންމެ ފަރަތަމަ ހުށަހެޅީ މިދިޔަ ހޯމަ ދުވަހު ބޭއްވި ބައްދަލުވުމަށެވެ.
އެކަމަކު އެ ހުށަހެޅުންތަކަށް ކައުންސިލްގެ އަޣުލަބިއްޔަތު އޮންނަ ޕީޕީއެމްއަށް ނިސްބަތްވާ މެންބަރުންގެ ތާއިދު ނުލިބުމުން ފާހެއް ނުވި އެވެ.
އެ ހުށަހެޅުމުގެ އިތުރުން ޖަލްސާތަކުގެ އޯޑިއޯ ރެކޯޑިންގް ނަގާ، ބެލެހެއްޓުމަށް ހުށަހެޅި ހުށަހެޅުން ވެސް ފާހެއް ނުވި އެވެ. އަދި، ކައުންސިލް މެންބަރުންގެ މާލީ ބަޔާން ހާމަކުރުމަށާއި މަސްލަހަތު ފުށުއަރާ ހާލަތްތައް ބަޔާންކުރުމަށް ވެސް ފާހެއް ނުވި އެވެ.
އެކަން ކައުންސިލްގެ މެންބަރު ސައިފް ފާތިހު ޓްވިޓާގައި ހިއްސާކުރުމާއެކު ސިޓީ ކައުންސިލަށް ހާއްސަކޮށް، މޭޔަރު ޑރ. މުހައްމަދު މުއިއްޒަށް ވަރަށް ބޮޑަށް ފާޑުކިޔުންތައް އަމާޒުވި އެވެ.
ނަމަވެސް، އެކަމުގެ ދިފާއުގައި މުއިއްޒު ވިދާޅުވީ، ޖަލްސާތައް ލައިވް ކުރުމަކީ ކައުންސިލްގެ ފުރަތަމަ ރަސްމީ ޖަލްސާގައި ފާސްކޮށްފައިވާ އެސްއޭޕީގައި ކަނޑައަޅާ ފާސްކޮށްފައިވާ ކަމެއް ކަމަށެވެ. މުއިއްޒު ވިދާޅުވި ގޮތުގައި، ޖަލްސާތައް ލައިވް ކުރުމަށް އޮފީހުގެ އައިޓީ އިންތިޒާމްތައް ފުރިހަމަ ކުރުމަށް މަސައްކަތް އަންނަނީ ކުރަމުންނެވެ.
ސިޓީ ކައުންސިލް ހިންގުމަށް މުއިއްޒުގެ އޮތް ޕްލޭން ކަމަށްވާ އެސްއޭޕީ ފާސްކޮށްފައިވަނީ ކައުންސިލްގެ ފުރަތަމަ ބައްދަލުވުމުގައި ހުރިހާ މެންބަރުންގެ ވޯޓާއެކު އެވެ.
މެމްބަރަކު ފާޅުކުރެއްވި ކަންބޮޑުވުމާ ގުޅިގެން މޭޔަރު މުއިއްޒު މިއަދު ވަނީ ކައުންސިލްގެ ކުއްލި ބައްދަލުވުމެއް ބާއްވައި، އެ ބައްދަލުވުމަށް އެމްޑީޕީ މެންބަރުންގެ ހުށަހެޅުންތައް އަނެއްކާވެސް ހުށަހަޅާފަ އެވެ. އަދި، މިއަދު ވަނީ ޖަލްސާތައް ލައިވް ކުރުން ވެސް ހިމެނޭ ގޮތަށް އެ ހުރިހާ ހުށަހެޅުމެއް އިއްތިފާގުން ފާސްކޮށްފަ އެވެ.
ހުށަހެޅުންތައް ފާސްކޮށްފައިވަނީ އެސްއޭޕީގައި އެކަން ބަޔާންކޮށްފައި އޮތް ނަމަވެސް، ކައުންސިލްގެ ހިންގާ ގަވައިދުގައި އެ އިސްލާހުތައް ހިމަނަން ޖެހޭ ކަމަށް މެންބަރުންނަށް ގަބޫލުކުރެވިގެންނެވެ. ހުށަހެޅުންތައް ފާސްކުރި ކުއްލި ޖަލްސާ ބާއްވާފައިވަނީ މޭޔަރުގެ އިސްނެންގެވުމަށެވެ.
"އަޅުގަނޑުމެންގެ މި ހުށަހެޅުންތައް ގަވައިދުގައި ހިމަނަން ކުއްލި ޖަލްސާއަކަށް ގޮވާ، ފާސްކުރުމަށް މޭޔަރު އެޅުއްވި ބާރަށް ނުހަނު ޝުކުރު، ހެޔޮ ފާލެއް،" ސައިފް ފާތިހު ވިދާޅުވި އެވެ.
