ބޯހިޔާވަހިކަމުގެ މަޝްރޫތައް ހިންގުމަށް މިސަރުކާރުން އުފައްދާފައިވާ "ފަހި ދިރިއުޅުން ކޯޕަރޭޝަން ލިމިޓެޑް" އިން މާލޭ ސިޓީ ކައުންސިލްއަށް އެއްބާރުލުން ނުދޭ ކަމަށް ވިދާޅުވެ މާލޭގެ މޭޔަރު ޑރ. މުހައްމަދު މުއިއްޒު ދެއްކެވި ވާހަކަތައް އެ ކޯޕަރޭޝަނުން މިއަދު ދޮގު ކޮށްފި އެވެ.
ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ ސިޓީ ކައުންސިލާ ހަވާލުވި ހިސާބުން މާލެ ސަރަހައްދުގައި ހިންގާ ބޯހިޔާވަހިކަމުގެ މަޝްރޫއެއްގެ މައުލޫމާތު ހޯދަން މަސައްކަތް ފެށި ކަމަށާއި ނަމަވެސް ފަހި ދިރިއުޅުން ކޯޕަރޭޝަންއިން އެ މައުލޫމާތު ދީފައި ނުވާ ކަމަށެވެ.
ފަހި ދިރިއުޅުން ކޯޕަރޭޝަންއާ ބައްދަލު ކުރަން ތަކުރާރުކޮށް ކުރި މަސައްކަތުން ވެސް އެކަން ކާމިޔާބު ނުވި ކަމަށް މުއިއްޒު ވިދާޅުވި އެވެ. އޭނާ ވިދާޅުވި ގޮތުގައި ފޯން ކޯލެއްގެ ފުރުސަތު ނުދޭތާ ބައްދަލު ކުރަން ސިޓީ ފޮނުވުމުން އެއަށް ޖަވާބުވެސް އެ ކޯޕަރޭޝަނުން ނުދިނެވެ.
"ކައުންސިލްގެ ބައިވެރިވުން އޮންނަން ޖެހޭނެ ކަމަށް މިއޮންނަނީ. އެހެން ނަމަވެސް ތަކުރާރުކޮށް އެދި ބައްދަލުވުމަށް އެދިގެން ވެސް އަޅުގަނޑުމެންނަކަށް ފަހި ދިރިއުޅުން ކޯޕަރޭޝަންއަކާ ބައްދަލުވާ ގޮތެއް ނުވި. މިއީ ވަރަށް ހިތާމަ ކުރާ ކަމެއް،" މުއިއްޒު ވިދާޅުވި އެވެ.
އޭނާ ވިދާޅުވީ ބޯހިޔާވަހިކަމަކީ މާލެ ސަރަހައްދަށް އެންމެ ބޭނުންވެފައިވާ އެއްކަންތައް ކަމަށްވާއިރު އެފަދަ މަޝްރޫތަކުގައި ސިޓީ ކައުންސިލް ބައިވެރި ކުރަން ޖެހޭނެ ކަމަށެވެ.
މުއިއްޒުގެ ވާހަކަތައް ދޮގުކޮށް ފަހި ދިރިއުޅުން ކޯޕަރޭޝަންއިން ނެރުނު ބަޔާނެއްގައި ބުނީ މަގާމާ ހާވާލުވުމުގެ ކުރިން، އޭޕްރީލް މަހުގެ 24 ވަނަ ދުވަހު މުއިއްޒު އެ ކޯޕަރޭޝަންއަށް ސިޓީއެއް ފޮނުވާފައިވާ ކަމަށެވެ. ނަމަވެސް އެ ސިޓީގައި އެއްވެސް މައުލޫމާތެއް ހޯދުމަށް އެދިފައި ނުވާ ކަމަށް ބަޔާނުގައިވެ އެވެ.
"މި ސިޓީގައި ވަނީ އިލްތިމާސް ތަކެކެވެ. މި ސިޓީއިން އެއްވެސް މައުލޫމާތަކަށް ނުވަތަ އެއްވެސް ރައްދަކަށް ވެސް އެދިވަޑައިގެންފައިވެސް ނުވެ އެވެ.،" އިންތިހާބީ މޭޔަރުގެ ފަރާތުން މުއިއްޒު ފޮނުއްވި ސިޓީއާ ގުޅޭގޮތުން ކޯޕަރޭޝަންއިން ބުންޏެވެ.
މާލޭ ސިޓީ ކައުންސިލުން އެއްވެސް މައުލޫމާތެއް ބޭނުން ވެގެން އެ ކޯޕަރޭޝަންގައި މިހާތަނަށް އެދިފައި ނުވާ ކަމަށް ވެސް ބަޔާނުގައިވެ އެވެ.
"ތަކުރާރުކޮށް އެދިވަޑައިގަތުމުން ވެސް މި ކޯޕަރޭޝަނުން އެކި ކަންކަމުގައި ފުރުސަތު ދީފައިނުވާ ކަމަށާއި އެއްބާރުލުން ދީފައިނުވާ ކަމަށް ނޫސް ވެރިންގެ ބައްދަލުވުމުގައި މާލޭ ސިޓީގެ މޭޔާ ޑރ. މުހައްމަދު މުއިއްޒު ވިދާޅުވުމަކީ އެކަން ހިނގައިދިޔަގޮތް ނޫންކަމުގައި ދަންނަވަމެވެ." ސިޓީގައިވެ އެވެ.
ފަހި ދިރިއުޅުން ކޯޕަރޭޝަން ރައީސް 2019 ވަނަ އަހަރު އުފައްދާފައިވަނީ ހެޔޮއަގެއްގައި ބޯހިޔާވަހިކަން ފޯރުކޮށްދިނުމަށް މަޝްރޫތައް ހިންގުމަށެވެ.
