މާލެ ސިޓީގައި ދިރިއުޅޭ ރައްޔިތުން ދަތުރު ދާން ފަރުކޮޅުފުށި ތަރައްގީކުރުމަށް މާލޭ ސިޓީ ކައުންސިލުން ނިންމާފައިވަނީ ސަރުކާރާ އެއްވެސް މަޝްވަރާއެއް ކުރުމެއް ނެތި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މާލޭ ސިޓީ ކައުންސިލުން ރޭ ބޭއްވި ނޫސްވެރިންގެ ބައްދަލުވުމުގައި މޭޔަރު ޑރ. މުހައްމަދު މުއިއްޒު ވިދާޅުވެފައިވާ ގޮތުގައި، ފަރުކޮޅުފުށި ހިމެނެނީ ސިޓީ ކައުންސިލްގެ އިހްތިސާސްގެ ހިނގާ ރަށްތަކުގެ ތެރޭގަ އެވެ. އެހެންކަމުން އެ ރަށުގައި އެއްވެސް ކަމެއް ދެން ކުރިއަށް ގެންދާނަމަ ކައުންސިލްގެ ބައިވެރިވުން އޮންނަން ޖެހެ އެވެ.
"މާލެ ސަރަހައްދުގެ ރައްޔިތުން ޕިކްނިކް ދާނެ ތަނެއް މި ސަރަހައްދުގައި ނޯންނާތީ، އެކަމަށް އެންމެ އައިޑިއަލް ތަނަަކަށް ވާނީ ފަރުކޮޅުފުށި. އެހެންވީމަ އެޗްޑީސީއާ ވާހަކަ ދައްކާގެން މާލޭ ސީޓީގެ އިހުތިސޯސް ތެރޭ ހިމެނޭ ފަޅު ރަށަކަށް ވާތީ އެތަނަކީ މާލޭގެ ރައްޔިތުން ޕިކްނިކް ދާ ތަނެއްގެ ގޮތުގައި ކަނޑައެޅުމަށް ވަނީ ފާސްކޮށްފައި." މުއިއްޒު ވިދާޅުވެފައިވެ އެވެ.
ކޮވިޑުގެ ހާލަތާ ގުޅިގެން ފަރުކޮޅުފުށި މިހާރު ބޭނުންކުރަމުން އަންނަނީ އައިސޮލޭޝަން ފެސިލިޓީއެއްގެ ގޮތުގަ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވި ގޮތުގައި، ފަރުކޮޅުފުއްޓަކީ ހުޅުމާލޭގެ ތެރޭގައި ހިމެނޭ ތަނަކަށްވާއިރު ހުޅުމާލޭގެ ބިމަކީ އެޗްޑީސީއަށް މިލްކުކޮށްދީފައިވާ ބިމެއް ކަމަށެވެ. އެ ބިމުގައި ކަންކަން ކުރިއަށް ގެންދާނެ ގޮތް އެޗްޑީސީން ވަނީ ޕްލޭންކޮށްފައި ކަމަށެވެ.
"އެ ޕްލޭނަށް ބަދަލެއް ގެންނަ ކަމަށްވާނަމަ އެޗްޑީސީއާ ޖެހޭނެ މަޝްވަރާ ކުރަން، އަދި އަޅުގަނޑު ދެކޭ ގޮތުގައި ސަރުކާރާ ވެސް ޖެހޭނެ މަޝްވަރާ ކުރަން،" ރައީސް ވިދާޅުވި އެވެ.
ނަމަވެސް، ރައީސް ވިދާޅުވި ގޮތުގައި އެކަމުގައި ސިޓީ ކައުންސިލުން ސަރުކާރުގެ އެއްވެސް ފަރާތަކާއެކު އެއްވެސް މަޝްވަރާއެއް މިހާތަނަށް ކޮށްފައެއް ނުވެ އެވެ.
ދަތުރުދާން ފަރުކޮޅުފުށި ތަރައްގީކުރަން ސިޓީ ކައުންސިލުން ފާސްކޮށްފައިވާއިރު، މާލޭގެ ރައްޔިތުންނަށް ޕިކްނިކް އައިލެންޑެއްގެ ގޮތުގައި އެނބޫދޫފަޅުން ހިއްކި ރަށްރަކުގެ ތެރެއިން ރަށެއް ހާއްސަކުރުމަކީ ރައީސް އިބްރާހިމް މުހައްމަދު ސޯލިހްގެ ވައުދުކެވެ.
މާލެއިން ފުރައިގެން 15 މިނިޓުން ދެވޭ އެ ރަށް ތަރައްގީކުރަން ބަޔަކާ ވެސް ހަވާލުކުރި އެވެ. އެނބޫދޫފަޅުގެ ހުޅަނގުން ހިއްކާފައިވާ ސަރަހައްދުގެ ބޮޑު މިނަކީ 3.3 ހެކްޓަރެވެ. އެތަނުގައި މޫދު ކުޅިވަރާއި ބާބަކިއު ހެދޭނެ ތަންތަނާއި ކުޑަކުދިންނަށް ހާއްސަ ކުޅިވަރު ކުޅޭނެ ތަންތަނާއި އާއިލާއެކު ތިބެވޭނެ ކޮޓަރިތަކާއި އަވަސް ފަރުވާ ދޭ ރޫމެއް ހެދުމަށްވެސް އޭރު ނިންމާފައިވެ އެވެ.
އޭގެފަހުން އެހެން ސަރަހައްދަކުން ޕިކްނިކް އައިލެންޑެއް ހޯދުމަށް ފަޅަކުން ތަނެއް ހިއްކުމަށް ސަރުކާރުން މަސައްކަތް ކުރި އެވެ.
ނަމަވެސް، ރައީސް ސޯލިހު މިއަދު ވިދާޅުވި ގޮތުގައި ކޮވިޑާ ގުޅިގެން އެ ދެ މަސައްކަތް ވެސް ވަނީ ހުއްޓިފަ އެވެ. އެހެންކަމުން، ޕިކްނިކް އައިލެންޑެއް މާލޭގެ ރައްޔިތުންނަށް ހަމަޖެހޭނެ ވަކި އިރެއް އަދި ނޭނގެ އެވެ.
