މާލެ ސިޓީގައި ދިރިއުޅޭ ރައްޔިތުން ދަތުރު ދާން ފަރުކޮޅުފުށި ތަރައްގީކުރުމަށް މާލޭ ސިޓީ ކައުންސިލުން ނިންމައިފި އެވެ.
މާލޭ ސިޓީ ކައުންސިލުން ރޭ ބޭއްވި ނޫސްވެރިންގެ ބައްދަލުވުމުގައި މޭޔަރު ޑރ. މުހައްމަދު މުއިއްޒު ވިދާޅުވީ ފަރުކޮޅުފުށި ހިމެނެނީ ސިޓީ ކައުންސިލްގެ އިހްތިސާސްގެ ހިނގާ ރަށްތަކުގެ ތެރޭގައި ކަމަށެވެ. އެ ރަށް މިހާރު އޮތީ ފަޅުުރަށެއްގެ ގޮތުގަ އެވެ.
މުއިއްޒު ވިދާޅުވި ގޮތުގައި ކައުންސިލްގެ ނިންމުމެއް އޮތުމާއެކު ފަރުކޮޅުފުށީގައި އެއްވެސް ކަމެއް ދެން ކުރިއަށް ގެންދާ ނަމަ ކައުންސިލްގެ ބައިވެރިވުން އޮންނަން ޖެހެ އެވެ.
މާލެ ސަރަހައްދުގެ ރައްޔިތުން ޕިކްނިކް ދާނެ ތަނެއް މި ސަރަހައްދުގައި ނޯންނާތީ، އެކަމަށް އެންމެ އައިޑިއަލް ތަނަަކަށް ވާނީ ފަރުކޮޅުފުށި. އެހެންވީމަ އެޗްޑީސީ އާއި ވާހަކަދައްކާގެން މާލޭ ސީޓީގެ އިހުތިސޯސް ތެރޭ ހިމެނޭ ފަޅު ރަށަކަށް ވާތީ އެތަނަކީ މާލޭގެ ރައްޔިތުން ޕިކްނިކް ދާ ތަނެއްގެ ގޮތުގައި ކަނޑައެޅުމަށް މިއަދުު ވަނީ ފާސްކޮށްފައި.
ކޮވިޑުގެ ހާލަތާ ގުޅިގެން ފަރުކޮޅުފުށި މިހާރު ބޭނުންކުރަމުން އަންނަނީ އައިސޮލޭޝަން ފެސިލިޓީއެއްގެ ގޮތުގަ އެވެ.
ދަތުރުދާން ފަރުކޮޅުފުށި ތަރައްގީކުރަން ސިޓީ ކައުންސިލުން ފާސްކުރިއިރު، މާލޭގެ ރައްޔިތުންނަށް އެނބޫދޫފަޅު ހާއްސަކުރުމަކީ ރައީސް އިބްރާހިމް މުހައްމަދު ސޯލިހްގެ ވައުދުކެވެ. މާލެއިން ފުރައިގެން 15 މިނިޓުން ދެވޭ އެ ރަށް ތަރައްގީކުރަން ބަޔަކާ ވެސް ވަނީ ހަވާލުކޮށްފަ އެވެ.
އެނބޫދޫފަޅުގެ ހުޅަނގުން ހިއްކާފައިވާ ސަރަހައްދުގެ ބޮޑު މިނަކީ 3.3 ހެކްޓަރެވެ. އެތަނުގައި މޫދު ކުޅިވަރާއި ބާބަކިއު ހެދޭނެ ތަންތަނާއި ކުޑަކުދިންނަށް ހާއްސަ ކުޅިވަރު ކުޅޭނެ ތަންތަނާއި އާއިލާއެކު ތިބެވޭނެ ކޮޓަރިތަކާއި އަވަސް ފަރުވާ ދޭ ރޫމެއް ހެދުމަ ށްވެސް އޭރު ނިންމާފައިވެ އެވެ.
